തെലങ്കാനയിൽ ബസ് അപകടം; സ്കൂൾ വിദ്യാർഥികൾക്ക് പരിക്ക്

തെലങ്കാന: രാജന്ന സിറിസില്ല ജില്ലയിലെ സിറിസില്ല ടൗണിൽ ന്യൂ ബസ് സ്റ്റാൻഡിന് സമീപം അമിതവേഗത്തിലെത്തിയ സ്വകാര്യ ബസ് സ്കൂൾ ബസിൽ ഇടിച്ച് നിരവധി വിദ്യാർഥികൾക്ക് പരിക്കേറ്റു.

ഇടിയുടെ ആഘാതത്തിൽ സ്കൂൾ ബസിന് കാര്യമായ കേടുപാടുകൾ സംഭവിക്കുകയും ജനൽച്ചില്ലുകൾ തകരുകയും ചെയ്തു. ചില്ലുകൾ ശരീരത്തിൽ തറച്ചാണ് ചില വിദ്യാർഥികൾക്ക് പരിക്കേറ്റതെന്നാണ് വിവരം. അപ്രതീക്ഷിതമായ അപകടത്തിൽ വിദ്യാർഥികൾ പരിഭ്രാന്തരാകുകയും ചെയ്തു.

അപകടത്തെ തുടർന്ന് 108 ആംബുലൻസ് സംഘം സ്ഥലത്തെത്തി പരിക്കേറ്റ വിദ്യാർഥികൾക്ക് പ്രാഥമിക ചികിത്സ നൽകി സമീപത്തെ ആശുപത്രിയിലേക്ക് മാറ്റി. ഇവരുടെ പരിക്കുകളുടെ ഗുരുതരാവസ്ഥ സംബന്ധിച്ച് വ്യക്തമായ വിവരങ്ങൾ ലഭ്യമായിട്ടില്ല.

അപകടത്തിന് പിന്നാലെ പൊലീസ് സ്ഥലത്തെത്തി കൂട്ടിയിടിയിൽപ്പെട്ട സ്വകാര്യ ബസ് സ്റ്റേഷനിലേക്ക് മാറ്റുന്നതിനുള്ള നടപടികളും സ്വീകരിച്ചു. അപകടത്തിന്റെ സാഹചര്യം സംബന്ധിച്ച് പൊലീസ് അന്വേഷണം ആരംഭിച്ചു. സ്വകാര്യ ബസിന്റെ വേഗത, ഇരുവാഹനങ്ങളുടെയും സഞ്ചാരപാത, അപകടത്തിന് കാരണമായ മറ്റ് ഘടകങ്ങൾ എന്നിവ അന്വേഷണ സംഘം പരിശോധിക്കുന്നുണ്ട്.