കശ്മീർ വിദ്യാർഥികൾക്കായി ഹെൽപ് ഡസ്ക് ആരംഭിച്ച് എസ്എഫ്ഐ

ന്യൂഡൽഹി : പഹൽഗാം ഭീകരാക്രമണത്തിൽ കശ്മീരിൽ നിന്നുള്ള വിദ്യാർഥികൾക്കായി ഹെൽപ് ഡസ്ക് ആരംഭിച്ച് എസ്എഫ്ഐ. വിവിധ സംസ്ഥാനങ്ങളിൽ എസ്‌എഫ്‌ഐ കേന്ദ്ര എക്സിക്യൂട്ടീവ് കമ്മിറ്റി ഹെൽപ്പ്‌ലൈൻ ആരംഭിച്ചു. ഭീകരാക്രമണത്തിനെതിരെ രാജ്യം മുഴുവൻ ഒറ്റക്കെട്ടായി നിന്നപ്പോഴും ജമ്മു കശ്‌മീരിൽനിന്നുള്ള വിദ്യാർഥികളെയും വ്യാപാരികളെയും സംഘപരിവാർ ഭീഷണിപ്പെടുത്തുന്നതായി റിപ്പോർട്ടുകൾ പുറത്തുവന്നിരുന്നു.

ഉത്തരാണ്ഡ്‌, ഉത്തർപ്രദേശ്‌, മഹാരാഷ്‌ട്ര തുടങ്ങിയ സംസ്ഥാനങ്ങളിൽ കശ്‌മീരി വിദ്യാർഥികളെ ഭീഷണിപ്പെടുത്തുകയും ഉപദ്രവിക്കുകയും ചെയ്തു. ഡറാഡൂണിൽ സംഘപരിവാറുകാരുടെ ഭീഷണിയും അന്ത്യശാസനവും കാരണം കശ്‌മീരി വിദ്യാർഥികൾക്ക്‌ വീട്‌ വിട്ട്‌ പോകേണ്ടിവന്നു. കശ്മീരികൾക്കും ന്യൂനപക്ഷങ്ങൾക്കുമെതിരെ വിദ്വേഷം പ്രചരിപ്പിക്കാൻ സോഷ്യൽ മീഡിയയും ഉപയോഗിക്കുകയാണ് സംഘപരിവാർ. ഭീകരസംഘടനയെ തള്ളിപ്പറഞ്ഞും പ്രതിഷേധിച്ചും അപലപിച്ചും കശ്‌മീരികൾ ഒരേ സ്വരത്തിൽ രംഗത്തുവന്നത്‌ രാജ്യം കണ്ടതാണെന്നും എന്നാൽ അതിന് ശേഷവും ഉണ്ടാകുന്ന കുപ്രചാരണങ്ങൾ ഭീകരരുടെ അജണ്ടയെ സഹായിക്കാനേ വഴിയൊരുക്കൂവെന്നും എസ്എഫ്ഐ വ്യക്തമാക്കി. വിനാശകരമായ ഇത്തരം പ്രവർത്തനങ്ങളിൽ ഏർപ്പെടുന്നവർക്കെതിരെ അധികൃതർ കർശന നടപടി എടുക്കണം.

ഈ സാഹചര്യങ്ങൾ കണക്കിലെടുത്ത് ആക്രമണത്തിനും ഭീഷണിക്കും വിധേയരായ വിദ്യാർഥികൾക്ക് അഭയം നൽകുന്നതിനായി എസ്‌എഫ്‌ഐ കേന്ദ്ര എക്സിക്യൂട്ടീവ് കമ്മിറ്റി ഹെൽപ്പ്‌ലൈൻ ആരംഭിച്ചിരിക്കുകയാണെന്നും എസ്എഫ്ഐ അറിയിച്ചു. ഹെൽപ്‌ലൈൻ നമ്പറിൽ ബന്ധപ്പെടുന്നവർക്ക്‌ അതത്‌ സംസ്ഥാനങ്ങളിൽ എസ്‌എഫ്‌ഐയുടെ നേതൃത്വത്തിൽ താമസവും സുരക്ഷയും ഒരുക്കും. എല്ലാ വിധത്തിലും വിദ്യാർഥികൾക്കൊപ്പം നിൽക്കുമെന്നും എസ്‌എഫ്‌ഐ വ്യക്തമാക്കി.