ശ്മശാനത്തിന് മുന്നിൽ കുഞ്ഞിന്റെ ഉടലറ്റ ശിരസ്സ്

പലാമു: ജാർഖണ്ഡിലെ പലാമു ജില്ലയിൽ ശ്മശാനത്തിന് സമീപം നവജാത ശിശുവിന്റെ ഛേദിക്കപ്പെട്ട ശിരസ്സ് കണ്ടെത്തി. മൂന്ന് മുതൽ നാല് ദിവസം വരെ പ്രായമുള്ള ശിശുവിന്റേതാണെന്ന് പൊലീസ് പറഞ്ഞു.

മേദിനിനഗർ ടൗൺ പോലീസ് സ്റ്റേഷൻ പരിധിയിലുള്ള തെദ്‌വ പാലത്തിന് സമീപമുള്ള ശ്മശാനത്തിൽ നിന്ന് വ്യാഴാഴ്ച വൈകുന്നേരമാണ് ശിരസ്സ് കണ്ടെത്തിയത്. കുഞ്ഞിന്റെ ശരീരം കണ്ടെത്തിയിട്ടില്ല.

ശരീരം കണ്ടെടുക്കാനുള്ള അന്വേഷണം നടക്കുന്നതായി മേദിനിനഗർ ടൗൺ പോലീസ് സ്റ്റേഷൻ ചുമതലയുള്ള ജ്യോതിലാൽ രാജ്വാർ പറഞ്ഞു.

കഴിഞ്ഞ മൂന്ന് മുതൽ നാല് ദിവസത്തിനുള്ളിൽ എത്ര കുഞ്ഞുങ്ങൾ ജനിച്ചുവെന്നും നിലവിൽ അവർ എവിടെയാണെന്നും കണ്ടെത്താൻ പ്രദേശത്തെ എല്ലാ ആശുപത്രികളിൽ നിന്നുമുള്ള ഡാറ്റ പോലീസ് പരിശോധിച്ചുവരികയാണെന്ന് അദ്ദേഹം പറഞ്ഞു. കുഞ്ഞിനെ ബലി നൽകിയതാണോ എന്ന് സംശയിക്കുന്നുണ്ട്. എന്നാൽ വിവിധ തലങ്ങളിൽ അന്വേഷണം നടക്കുന്നുണ്ടെന്നും ബന്ധപ്പെട്ട തെളിവുകളൊന്നും കണ്ടെത്തിയിട്ടില്ലെന്നും രാജ്വാർ പറഞ്ഞു.

തല കസ്റ്റഡിയിലെടുത്തിട്ടുണ്ട്, ഉടൽ ഭാഗം കണ്ടെടുത്താൽ മൃതദേഹം പോസ്റ്റ്‌മോർട്ടം പരിശോധനയ്ക്ക് വിധേയമാക്കും.