print edition കശ്‌മീരിൽ ജമാഅത്തെ ഇസ്ലാമി കേന്ദ്രങ്ങളിൽ വ്യാപക റെയ്‌ഡ്‌
ന്യൂഡൽഹി
ഭീകരബന്ധത്തെ തുടർന്ന്‌ കശ്‌മീരിലെ ജമാഅത്തെ ഇസ്ലാമി കേന്ദ്രങ്ങളിൽ പൊലീസിന്റെയും കേന്ദ്രസേനയുടെയും വ്യാപകറെയ്‌ഡ്‌. നവംബർ 10ന്‌ രാജ്യത്തെ നടുക്കിയ ഡൽഹി കാർബോംബ്‌ സ്‌ഫോടനത്തിന്‌ കാരണക്കാരായ ഭീകരർക്ക്‌ ജമാഅത്തെ ഇസ്ലാമിയുമായി അടുത്ത ബന്ധമുണ്ടെന്ന്‌ ബോധ്യപ്പെട്ടതോടെയാണിത്‌. സ്‌ഫോടനത്തിന്‌ പിന്നാലെ രണ്ടുവട്ടം കശ്‌മീരിൽ ജമാഅത്തെ ഇസ്ലാമി കേന്ദ്രങ്ങളിൽ റെയ്‌ഡ്‌ നടത്തിയിരുന്നു.
വ്യാഴം, വെള്ളി ദിവസങ്ങളിൽ ശ്രീനഗർ, ബദ്ഗാം, പുൽവാമ, കുൽഗാം, ഷോപ്പിയാൻ, അനന്ത്‌നാഗ്‌, കുപ്‌വാര എന്നിവിടങ്ങളിലാണ്‌ ജമാഅത്തെ ഇസ്ലാമി നേതാക്കളുടെയും പ്രവർത്തകരുടെയും വീടുകളിലും സ്ഥാപനങ്ങളിലും മറ്റുമായി തെരച്ചിൽ നടത്തിയത്‌. വിദ്യാഭ്യാസസ്ഥാപനങ്ങളടക്കം ജമാഅത്തെ ഇസ്ലാമിയുമായി ബന്ധപ്പെട്ട മറ്റ്‌ കേന്ദ്രങ്ങളിലും പരിശോധന നടത്തി. ഇലക്‌ട്രോണിക്‌സ്‌ ഉപകരണങ്ങളും തീവ്രവാദത്തെ പ്രോത്സാഹിപ്പിക്കുന്ന രേഖകളും മറ്റും കണ്ടെടുത്തായി പൊലീസ്‌ വക്താവ്‌ അറിയിച്ചു. ഇലക്‌ട്രോണിക്‌സ്‌ ഉപകരണങ്ങൾ പരിശോധിക്കും. താഴ്‌വരയിലെ ഭീകരശൃംഖലയ്‌ക്ക്‌ തടയിടുക, യുവാക്കൾ ഭീകരവാദത്തിലേക്ക്‌ ആകർഷിക്കപ്പെടുന്നത്‌ തടയുക എന്നീ ലക്ഷ്യങ്ങളും റെയ്‌ഡുകൾക്ക്‌ പിന്നിലുണ്ടെന്ന്‌ പൊലീസ്‌ വക്താവ്‌ പറഞ്ഞു.
വാരിപുരയിലെ ജാമിയ ഇസ്ലാമിയ ഇൻസ്റ്റിറ്റ്യൂട്ടിൽ നടത്തിയ പരിശോധനയിൽ ഒട്ടനവധി ഡിജിറ്റൽ രേഖകൾ പിടിച്ചെടുത്തു. ജമാഅത്തെ ഇസ്ലാമി നേതാക്കളായ ഉമർ സുൽത്താൻ ഗുരു, മുഹമ്മദ്‌ അബ്‌ദുള്ള വാനി, ജി മുഹമ്മദ്‌ ഭട്ട്‌, ഹാജി മുഹമ്മദ്‌ റംസാൻ ലോൺ, ഷാഹിദ്‌ സദ്‌ഗീർ, മുഹമ്മദ്‌ റംസാൻ നായിക്‌ തുടങ്ങിയവരുടെ വസതികളിലും വ്യാപാരകേന്ദ്രങ്ങളിലും പരിശോധനയുണ്ടായി.
2024 സെപ്‌തംബറിലെ നിയമസഭാ തെരഞ്ഞെടുപ്പിൽ താഴ്‌വരയിൽ ജമാഅത്തെ ഇസ്ലാമിയെ സഹായിക്കുന്ന നിലപാടായിരുന്നു ബിജെപിയും മോദി സർക്കാരും സ്വീകരിച്ചത്‌. എൻസിയും സിപിഐ എമ്മും ഉൾപ്പെടുന്ന ഇന്ത്യ കൂട്ടായ്‌മയെ തോൽപ്പിക്കാനായി മുഹമ്മദ്‌ യൂസുഫ്‌ തരിഗാമി മത്സരിച്ച കുൽഗാമിലടക്കം ജമാഅത്തെ ഇസ്ലാമി നേതാക്കളെ സ്വതന്ത്രരായി മത്സരിക്കാൻ അനുവദിച്ചു. 2019 മുതൽ താഴ്‌വരയിൽ നിരോധിക്കപ്പെട്ട സംഘടനയുടെ പ്രവർത്തകർക്കാണ്‌ തെരഞ്ഞെടുപ്പിൽ മത്സരിക്കാൻ മോദി സർക്കാർ സ‍ൗകര്യമൊരുക്കിയത്‌. എന്നാൽ എല്ലാ സീറ്റിലും ജമാഅത്തെ ഇസ്ലാമി തോറ്റു. ഇക്കാലത്ത്‌ ലഭിച്ച പ്രവർത്തനസ്വാതന്ത്ര്യം ഭീകരശൃംഖല കെട്ടിപ്പടുക്കാൻ ജമാഅത്തെ ഇസ്ലാമി ഉപയോഗപ്പെടുത്തിയെന്നാണ്‌ വിലയിരുത്തൽ.
Related News
Dont Miss it
0 comments