പഞ്ചാബ് പോലീസ് ഉദ്യോഗസ്ഥന്റെ കൊലപാതകം: പ്രതി ഏറ്റുമുട്ടലിൽ കൊല്ലപ്പെട്ടു

ചണ്ഡിഗഡ്: പഞ്ചാബ് പോലീസ് അസിസ്റ്റന്റ് സബ് ഇൻസ്‌പെക്ടർ ഹർജിത് സിങിനെ വെടിവെച്ച് കൊലപ്പെടുത്തിയ കേസിലെ പ്രതികളിലൊരാളായ ദീപക് സിങ് പോലീസ് ഏറ്റുമുട്ടലിൽ കൊല്ലപ്പെട്ടു. അമൃത്സർ സ്വദേശിയായ ദീപക് സിങിന് പാകിസ്ഥാൻ ആസ്ഥാനമായി പ്രവർത്തിക്കുന്ന ഒരു ഭീകരനുമായി ബന്ധമുണ്ടോയെന്ന് പോലീസ് അന്വേഷിച്ചുവരികയാണ്.

സിസിടിവി ദൃശ്യങ്ങൾ, സാങ്കേതിക വിവരങ്ങൾ, ടവർ-ഡംപ് വിശകലനം, പ്രാദേശിക ഇന്റലിജൻസ്, മനുഷ്യവിവരങ്ങൾ എന്നിവയുടെ അടിസ്ഥാനത്തിലാണ് പ്രതിയെ കണ്ടെത്തിയതെന്ന് പോലീസ് അറിയിച്ചു. രാത്രി 9.45 ഓടെ ചെക്ക്പോസ്റ്റിൽ സ്കൂട്ടറിൽ എത്തിയ രണ്ട് പേരെ പോലീസ് തടയാൻ ശ്രമിച്ചപ്പോൾ ഇവർ നാല് റൗണ്ട് വെടിയുതിർത്തു. തുടർന്ന് സ്വയ രക്ഷയ്ക്കായി പോലീസ് തിരിച്ചുവെടിയുതിർക്കുകയായിരുന്നു.

വെടിയേറ്റ ദീപകിനെ ആശുപത്രിയിലെത്തിച്ചെങ്കിലും മരണം സംഭവിച്ചു. രണ്ടാമത്തെ പ്രതി രക്ഷപ്പെട്ടതായും ഇയാൾക്കായി തിരച്ചിൽ തുടരുകയാണെന്നും പോലീസ് അറിയിച്ചു. സംഭവവുമായി ബന്ധപ്പെട്ട് .30 ബോർ പിസ്റ്റൾ, രണ്ട് മാഗസിനുകൾ, എട്ട് വെടിയുണ്ടകൾ, മൊബൈൽ ഫോൺ, ഹോണ്ട ആക്ടീവ സ്കൂട്ടർ എന്നിവ പോലീസ് കണ്ടെടുത്തു.

ഭഗ്തൻവാല ധാന്യ മാർക്കറ്റിൽ പിസിആർ ഡ്യൂട്ടിയിലായിരുന്ന ഹർജിത് സിങിനെ ബൈക്കിലെത്തിയ രണ്ട് പേർ പിന്നിൽ നിന്ന് വെടിവെച്ച് കൊലപ്പെടുത്തുകയായിരുന്നു. സംഭവസ്ഥലത്ത് നിന്ന് .30 ബോർ തോക്കിന്റെ ഒഴിഞ്ഞ വെടിയുണ്ടയും കണ്ടെത്തിയിരുന്നു.