പ്രതിഷേധങ്ങൾ 'ഹൈജാക്ക്' ചെയ്യാൻ അനുവദിക്കരുത്; വിദ്യാർഥികൾക്കൊപ്പമെന്ന് പ്രീതി സിന്റ

ന്യൂഡൽഹി: വിദ്യാഭ്യാസ പരിഷ്‌കാരങ്ങൾ ആവശ്യപ്പെട്ട് പ്രതിഷേധിക്കുന്ന വിദ്യാർഥികൾക്ക് പിന്തുണ ആവർത്തിച്ച് നടി പ്രീതി സിന്റ. വിദ്യാർഥികളുടെ സമാധാനപരമായ പ്രതിഷേധം രാജ്യവിരുദ്ധ ശക്തികൾ വഴിതിരിച്ചുവിടാതിരിക്കാൻ ജാഗ്രത വേണമെന്നും വിഷയത്തിൽ സർക്കാർ അർഥവത്തായ ചർച്ചയ്ക്ക് തയ്യാറാകണമെന്നും പ്രീതി ആവശ്യപ്പെട്ടു.

യുവാക്കളുടെ ഭാവിയെ ഗുണകരമായി സ്വാധീനിക്കുന്ന വിദ്യാഭ്യാസ പരിഷ്‌കാരങ്ങൾ ആവശ്യപ്പെടുന്ന വിദ്യാർഥികൾക്ക് പിന്തുണ നൽകേണ്ടത് പ്രധാനമാണെന്ന് പ്രീതി സിന്റ എക്‌സിൽ കുറിച്ചു. അതേസമയം, സമാധാനപരമായ പ്രതിഷേധത്തിന്റെ സ്വഭാവം മാറ്റി അരാജകത്വം സൃഷ്ടിക്കാൻ ശ്രമിക്കുന്ന ശക്തികൾ പ്രക്ഷോഭത്തെ ഹൈജാക്ക് ചെയ്യാതിരിക്കാൻ ജാഗ്രത വേണമെന്നും അവർ ചൂണ്ടിക്കാട്ടി.

സിജെപി നേതൃത്വത്തിലുള്ള വിദ്യാർഥി പ്രതിഷേധങ്ങൾക്ക് ചൊവ്വാഴ്ചയും അവർ പിന്തുണ അറിയിച്ചിരുന്നു. നിരാഹാര സമരം തുടരുന്ന പരിസ്ഥിതി പ്രവർത്തകനും നവീനാശയങ്ങളുടെ പ്രചാരകനുമായ സോനം വാങ്ചുക്കിന്റെ ആരോഗ്യനിലയിൽ ആശങ്ക രേഖപ്പെടുത്തിയ പ്രീതി, അദ്ദേഹവുമായും വിദ്യാർഥി സംഘടനകളുമായും സർക്കാർ ഉടൻ ചർച്ച ആരംഭിക്കണമെന്ന് ആവശ്യപ്പെട്ടു.

ഇന്ത്യയിലെ യുവാക്കളുടെ ഭാവിക്കും വിദ്യാഭ്യാസ സംവിധാനത്തിന്റെ പുരോഗതിക്കും വേണ്ടിയാണ് സോനം വാങ്ചുക്കും വിദ്യാർഥികളും പോരാടുന്നതെന്നും ഈ സമരത്തിന് തന്റെ പൂർണ പിന്തുണയുണ്ടെന്നും പ്രീതി വ്യക്തമാക്കി.