യുപിയിൽ പൊലീസുകാരുടെ ചവിട്ടേറ്റ് ​ഗർഭിണി മരിച്ച സംഭവത്തിൽ 6 പേർക്ക് സസ്പെൻഷൻ

ഫിറോസാബാദ്: ഉത്തർപ്രദേശിൽ പൊലീസുകാരുടെ ചവിട്ടേറ്റ ​ഗർഭിണി പ്രവസത്തിനു പിന്നാലെ മരിച്ചതിൽ വ്യാപക പ്രതിഷേധം ഉയരുന്നു. ഫിറോസാബാദിലെ ഷികോഹാബാദ് സ്വദേശി അഞ്ജലിയാണ് (28) മരിച്ചത്. സംഭവത്തിൽ ആറ് പൊലീസുകാരെ സസ്പെൻഡ് ചെയ്തു. . എസ്ഐമാരായ ധർമപാൽ സിങ്, സത്യപാൽ സിങ്, ഹെഡ് കോൺസ്റ്റബിൾമാരായ മോഹൻ സിങ്, അരവിന്ദ് കുമാർ, കോൺസ്റ്റബിൾമാരായ ഭവ്തോഷ് കുമാർ, കുൽദീപ് കുമാർ എന്നിവർക്കെതിരെയാണ് നടപടി.

മോഷണക്കേസിൽ പ്രതിയായ ​ഗൗരവിനെ അന്വേഷിച്ച് ഞായറാഴ്ച രാത്രി 11.45 ഓടെയാണ് പൊലീസ് സംഘം വീട്ടിലേയ്ക്ക് അതിക്രമിച്ചു കയറിയത്. ഭർത്താവിനെ അറസ്റ്റ് ചെയ്യരുതെന്ന് അപേക്ഷിച്ച അജ്ഞലിയുടെ വയറ്റിൽ പൊലീസ് സംഘത്തിലുണ്ടായിരുന്ന സബ് ഇൻസ്പെക്ടർ ധർമപാൽ സിങ് ചവിട്ടുകയായിരുന്നു. തുടർന്ന് ആരോ​ഗ്യനില മോഷമായ അഞ്ജലിയെ ഷിക്കോബാദിലെ ആശുപത്രിയിൽ പ്രവേശിപ്പിക്കുകയും തിങ്കളാഴ്ച രാവിലെ അഞ്ജലി കുഞ്ഞിന് ജന്മം നൽകുകയും ചെയ്തു.

എന്നാൽ പിന്നീട് അഞ്ജലിയുടെ നില വഷളാവുകയും ഫിറോസാബാദിലെ സ്വകാര്യ ആശുപത്രിയിലേക്ക് മാറ്റുകയും ചെയ്തു. പക്ഷേ ജീവൻ രക്ഷിക്കാനായില്ല. കുഞ്ഞിന്റെ ആരോ​ഗ്യനിലയും മോശമായി തുടരുകയാണ്. പൊലീസ് അതിക്രമത്തിനെതിരെ വ്യാപക പ്രതിഷേധം ഉയരുകയാണ്. കൊലപാതക കുറ്റം ചുമത്തണമെന്നാവശ്യപ്പെട്ട് പൊലീസ് സ്റ്റേഷനു മുൻപിൽ ഉപരോധം ആരംഭിച്ചു. പിന്നാലെയാണ് അന്വേഷണവിധേയമായി പൊലീസുകാരെ സസ്പെൻഡ് ചെയ്തത്.