വിവാദം പുകയുന്നു ; പ്രശാന്ത്‌ കിഷോറിന്‌ കോടികള്‍ എവിടെനിന്ന്

ന്യൂഡൽഹി

ബിഹാറിൽ എൻഡിഎ സർക്കാരിനെതിരായ ഭരണവിരുദ്ധ വോട്ടുകൾ ഭിന്നിപ്പിച്ച്‌ ബിജെപിയെ സഹായിക്കുകയെന്ന ലക്ഷ്യത്തോടെ മത്സരിക്കുന്ന പ്രശാന്ത്‌ കിഷോറിന്റെ ജൻ സുരാജ്‌ പാർടിക്ക്‌ ലഭിക്കുന്ന കോടികളുടെ വരുമാനം തെരഞ്ഞെടുപ്പ്‌ ഘട്ടത്തിൽ ചർച്ചയാകുന്നു. രണ്ടുവർഷം ബിഹാറിൽ ഉടനീളം സംഘടിപ്പിച്ച പദയാത്രക്കായി കോടികളാണ്‌ പ്രശാന്ത്‌ കിഷോർ ചെലവഴിച്ചത്‌. പ്രചാരണത്തിനും വലിയതോതിൽ പണമൊഴുക്കുന്നു.

കന്നിതെരഞ്ഞെടുപ്പിന്‌ ഒരുങ്ങുന്ന പാർടിക്ക്‌ ഇത്രമാത്രം ഫണ്ടിന്റെ ഉറവിടം ഏതെന്ന ചോദ്യം വിവാദമായതോടെ മൂന്നുവർഷം വൻകിട കോർപറേറ്റുകൾക്കും രാഷ്‌ട്രീയ പാർടികൾക്കും നേതാക്കൾക്കും വിവിധ ഉപദേശം നൽകിയ വകയിൽ 241 കോടി രൂപയുടെ വരുമാനമുണ്ടായെന്ന വിശദീകരണവുമായി പ്രശാന്ത്‌ കിഷോർ രംഗത്തുവന്നു. ഇതിൽ 99 കോടി രൂപ ജൻ സുരാജ്‌ പാർടിക്കായി സംഭാവന ചെയ്‌തെന്നും 51 കോടി രൂപ നികുതിയിനത്തിൽ ചെലവഴിച്ചുവെന്നും അവകാശപ്പെട്ടു.

നവയുഗ കൺസ്‌ട്രക്‌ഷൻസ്‌ എന്ന കമ്പനിക്ക്‌ രണ്ടുമണിക്കൂർ ബിസിനസ്‌ ഉപദേശം നൽകുകവഴി 11 കോടി രൂപ ലഭിച്ചെന്ന്‌ കിഷോർ പറയുന്നു. പണം നൽകിയ മറ്റ്‌ വൻകിട കമ്പനികളുടെയൊന്നും പേര്‌ വെളിപ്പെടുത്തിയില്ല. ഏതെല്ലാം രാഷ്‌ട്രീയ പാർടികൾക്കും നേതാക്കൾക്കുമാണ്‌ മൂന്നുവർഷമായി ഉപദേശം നൽകിയതെന്നും വ്യക്തമാക്കിയിട്ടില്ല. ‘പൊളിറ്റിക്കൽ കൺസൾട്ടൻസി’ സേവനം 2021ൽ പ്രശാന്ത്‌ കിഷോർ അവസാനിപ്പിച്ചിരുന്നു. പിന്നീട്‌ ജൻ സുരാജ്‌ പദയാത്രക്ക്‌ തുടക്കമിട്ടു. 2024 ഒക്‌ടോബറിൽ ജൻ സുരാജ്‌ രാഷ്‌ട്രീയ പാർടിയായി രജിസ്റ്റർ ചെയ്‌തു. കൺസൾട്ടൻസി അവസാനിപ്പിച്ച്‌ രാഷ്‌ട്രീയത്തിൽ പ്രവേശിച്ച വ്യക്തി തുടർന്നും വൻകിട കുത്തകകൾക്കും മറ്റ്‌ പാർടികൾക്കും ഉപദേശം നൽകുന്നതിലെ ഒ‍ൗചിത്യവും കിഷോർ വിശദീകരിക്കുന്നില്ല. സനാതനധർമ വിശ്വാസപ്രകാരം സംഭാവനകൾ വെളിപ്പെടുത്തേണ്ടതില്ലെന്നും എതിരാളികൾ ആരോപണം ഉന്നയിക്കുന്നതിനാലാണ്‌ വിശദീകരിച്ചതെന്നും കിഷോർ ന്യായീകരിച്ചു.

തേജസ്വിക്കെതിരെ പ്രശാന്ത്‌ കിഷോർ

ബിഹാറിൽ മഹാസഖ്യത്തെ തോൽപ്പിക്കാൻ സംഘപരിവാറിനായി രംഗത്തുള്ള പ്രശാന്ത്‌ കിഷോർ, രാഘോപുർ മണ്ഡലത്തിൽ പ്രതിപക്ഷ നേതാവ്‌ തേജസ്വി യാദവിനെതിരെ മത്സരിക്കാൻ സാധ്യത. രാഘോപുരിൽ തേജസ്വിക്കെതിരെയോ സ്വന്തം മണ്ഡലമായ കർഗഹാറിലോ മത്സരിക്കുമെന്നാണ്‌ പ്രശാന്ത്‌ കിഷോര്‍ നേരത്തെ പ്രഖ്യാപിച്ചിരുന്നത്. എന്നാൽ വ്യാഴാഴ്‌ച ജൻ സുരാജ്‌ പാർടി 51 മണ്ഡലത്തിൽ സ്ഥാനാർഥികളെ പ്രഖ്യാപിച്ചതിൽ കർഗഹാറും ഉൾപ്പെട്ടു. ഭോജ്‌പുരി ഗായകൻ റിതേഷ്‌ രഞ്‌ജൻ പാണ്ഡെയാണ്‌ കർഗഹാറിൽ ജൻ സുരാജ്‌ സ്ഥാനാർഥി. ആദ്യ പട്ടികയിലില്ലാത്ത പ്രശാന്ത്‌ കിഷോർ രാഘോപുരിൽ തേജസ്വി യാദവിനെതിരായി മൽസരിക്കാൻ സാധ്യതയേറി.