print edition പിന്നിൽനിന്ന് കുത്തി 
ഒവൈസി, പ്രശാന്ത്‌ കിഷോര്‍

ന്യൂഡൽഹി

​ബിഹാറിൽ മഹാസഖ്യത്തെ പല മണ്ഡലങ്ങളിലും വീഴ്‌ത്തിയത്‌ അസദുദീൻ ഒവൈസിയുടെ എഐഎംഐഎം, പ്രശാന്ത്‌കിഷോറിന്റെ ജൻസുരാജ്‌, മായാവതിയുടെ ബിഎസ്‌പി, ആസാദ്‌സമാജ്‌ പാർടി (കാൻഷിറാം) തുടങ്ങിയ കക്ഷികൾ. ഷെർഘട്ടി, നാഥ്നഗർ, കേവടി, ജാലേ, നവാഡ, മധുബനി, ദർഭംഗ റൂ‍റൽ തുടങ്ങി നിരവധി സീറ്റുകളിൽ മഹാസഖ്യത്തിന്റെ സ്ഥാനാർഥികൾ പരാജയപ്പെട്ടത്‌ എഐഎംഐഎം, ജൻസുരാജ്‌, ബിഎസ്‌പി, ആസാദ്‌സമാജ്‌ പാർടികൾ പിടിച്ച വോട്ടുകൾ കാരണം.

മാഞ്ചിയിൽ സിപിഐ എം സ്ഥാനാർഥി സത്യേന്ദ്രയാദവിനെ വീഴ്‌ത്തിയതും ജൻസുരാജ്‌ പാർടിയുടെ വോട്ടുകൾ.

നവാഡയിൽ ജെഡിയു സ്ഥാനാർഥി 11284 വോട്ടുകൾക്ക്‌ മുന്നിലായപ്പോൾ ജൻസുരാജ്‌, എഐഎംഐഎം സ്ഥാനാർഥികൾ പിടിച്ചത്‌ 13084 വോട്ട്‌. ദർഭംഗ റൂറലിൽ ജെഡിയു സ്ഥാനാർഥി 14,588 വോട്ടിന് മുന്നിലായപ്പോൾ എഐഎംഐഎം, ജൻസുരാജ്‌ സ്ഥാനാർഥികൾ ചേർന്ന്‌ 20,000ത്തോളം വോട്ട്‌ പിടിച്ചു. സിക്കന്ദ്രയിൽ എച്ച്‌എഎം സ്ഥാനാർഥി 14,000 വോട്ടുകൾക്ക്‌ മുന്നിലായപ്പോൾ ജൻസുരാജ്‌, എഐഎംഐഎം സ്ഥാനാർഥികൾ 14,500 വോട്ടിലേറെ പിടിച്ചു. സമാനമായ രീതിയിൽ ബിഎസ്‌പിയും ആസാദ്‌സമാജ്‌പാർടിയും ചില മണ്ഡലങ്ങളിൽ നിർണായകവോട്ടുകൾ പിടിച്ചു. മഹാസഖ്യത്തിന്റെ വോട്ട്‌ബാങ്കിൽ വിള്ളൽവീഴ്‌ത്തുകയാണ്‌ ഒവൈസിയുടെയും ജൻസുരാജ്‌ പാർടിയുടെയും ലക്ഷ്യമെന്ന ആരോപണങ്ങൾ നേരത്തെ ഉയർന്നിരുന്നു.