‘ബിഹാർ ഉപമുഖ്യമന്ത്രി 7 പേരെ കൊന്നകേസിലെ പ്രതി’ ; പ്രശാന്ത്‌ കിഷോറിന്റെ വെളിപ്പെടുത്തൽ

ന്യൂഡൽഹി

ബിഹാർ ഉപമുഖ്യമന്ത്രിയും ബിജെപി നേതാവുമായ സമ്രാട്ട്‌ ച‍ൗധരി ഏഴുപേരെ കൊന്നകേസിലെ പ്രതിയാണെന്ന്‌ വെളിപ്പെടുത്തൽ. തെരഞ്ഞെടുപ്പിലേക്ക്‌ നീങ്ങുന്ന ബിഹാറിലെ പ്രധാന ഭരണകക്ഷി നേതാവിനെതിരെ ജൻ സുരാജ്‌ സ്ഥാപകനും തെരഞ്ഞെടുപ്പ്‌ തന്ത്രജ്ഞനുമായ പ്രശാന്ത്‌ കിഷോറാണ്‌ വെളിപ്പെടുത്തൽ നടത്തിയത്‌.

1995ൽ താരാപുരിൽ ഏഴുപേരെ കൊലപ്പെടുത്തിയ കേസിലെ പ്രതിയാണ്‌ സാമ്രാട്ട്‌ ച‍ൗധരിയെന്നും ഉടൻ ഉപമുഖ്യമന്ത്രി സ്ഥാനത്തുനിന്ന്‌ നീക്കി അറസ്റ്റ്‌ ചെയ്യണമെന്നും പ്രശാന്ത്‌ കിഷോർ ആവശ്യപ്പെട്ടു. ജനന സർട്ടിഫിക്കറ്റിൽ കൃത്രിമം കാട്ടി പ്രായപൂർത്തിയായില്ലെന്ന്‌ കോടതിയെ തെറ്റിദ്ധരിപ്പിച്ചാണ്‌ കേസിൽനിന്ന്‌ ഇയാൾ രക്ഷപെട്ടതെന്നും പ്രശാന്ത്‌ കിഷോർ പറഞ്ഞു. 1999ൽ ബലാത്സംഗത്തിനിരയായ ശിൽപിയെന്ന പെൺകുട്ടിയും അവരുടെ സുഹൃത്ത്‌ ഗ‍ൗതവും കൊല്ലപ്പെട്ട കേസിൽ പ്രതിയാണോ അല്ലയോ എന്ന്‌ ച‍ൗധരി വ്യക്തമാക്കണമെന്നും കിഷോർ ആവശ്യപ്പെട്ടു.