204 മൃതദേഹങ്ങള്‍ കണ്ടെത്തി; ഡിഎൻഎ ഫലം ലഭിച്ച ശേഷം ബന്ധുക്കള്‍ക്ക് കൈമാറും

അഹമ്മദാബാദ് : അഹമ്മദാബാദ് വിമാനാപകടത്തില്‍ മരണപ്പെട്ടവരിൽ 204 മൃതദേഹങ്ങള്‍ കണ്ടെത്തി. ഡിഎൻഎ ഫലം ലഭിച്ച ശേഷമായിരിക്കും മൃതദേഹങ്ങള്‍ ബന്ധുക്കള്‍ക്ക് കൈമാറുക. മൃതദേഹങ്ങൾ കൈമാറുന്നതിനായി അടുത്ത ബന്ധുക്കളുടെ ഡിഎൻഎ സാമ്പിൾ ശേഖരണം തുടങ്ങി.

ബിജെ മെഡിക്കൽ കോളേജിലെ കസോതി ഭവനിലാണ് രക്ത സാമ്പിൾ ശേഖരണ നടപടി തുടങ്ങിയത്. ​ഗാന്ധിന​ഗർ ഫോറൻസിക് ലാബിലാണ് ഡിഎൻഎ പരിശോധന നടത്തുക.അതിനിടെ, അപകട മേഖലയില്‍ നിന്ന് ഒരാളെ ജീവനോടെ കണ്ടെത്തിയെന്ന് റിപ്പോര്‍ട്ടുണ്ട്. 11A സീറ്റിൽ യാത്ര ചെയ്തിരുന്ന രമേഷ് വിശ്വാസ് കുമാർ എന്ന യുവാവാണ് അത്ഭുതകരമായി രക്ഷപ്പെട്ടത്.

ലണ്ടനിലേക്ക് പുറപ്പെട്ട എയർ ഇന്ത്യ ബോയിംഗ് ഡ്രീംലൈനർ അഹമ്മദാബാദ് വിമാനത്താവളത്തിൽ നിന്ന് പറന്നുയർന്നതിന് തൊട്ടുപിന്നാലെയാണ് നിലംപതിച്ചത്. റൺവേയ്ക്ക് സമീപമുള്ള ജനസാന്ദ്രതയുള്ള പ്രദേശത്താണ് വീണത്.അഹമ്മദാബാദ്-ലണ്ടൻ ഗാറ്റ്‌വിക്ക് സർവീസ് നടത്തുന്ന ഫ്ലൈറ്റ് AI171 ആണ്. ദീർഘ യാത്രാ റെക്കോഡുള്ള ക്യാപ്റ്റൻ സുമീത് സബർവാൾ ആണ് വിമാനം പറത്തിയിരുന്നത്.

റൺ‌വേ 23 ൽ നിന്ന് 13.39 മണിക്ക് പറന്ന് ഉയർന്ന ഉടനെ   എ‌ടി‌സിയിലേക്ക് "മെയ്ഡേ കോൾ" (അടിയന്തിര സഹായ സൂചന) നൽകി. തൊട്ടു പിന്നാലെ തന്നെ വിമാനം റൺവേ പരിധിക്ക് പുറത്ത് നിലത്തു വീണതായി ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ അറിയിച്ചു. രണ്ട് പൈലറ്റും ക്രൂവും ഉൾപ്പെടെ 242 യാത്രക്കാർ വിമാനത്തിലുണ്ടായിരുന്നു.