ഹിമാലയൻ വിസ്മയം; തണുത്തുറഞ്ഞ മലനിരകളിൽ മഞ്ഞുപുലികൾ; ദൃശ്യങ്ങൾ പങ്കുവെച്ച് ബിആർഒ

ലഡാക്: ഹിമാലയൻ മലനിരകളിലെ 'മഞ്ഞുപുലി' കുടുംബത്തിന്റെ അപൂർവ്വ ദൃശ്യങ്ങൾ സമൂഹമാധ്യമങ്ങളിൽ തരംഗമാകുന്നു. തണുത്തുറഞ്ഞ മഞ്ഞുപാളികൾക്കിടയിലൂടെ മൂന്ന് മഞ്ഞുപുലികൾ ഒന്നിച്ച് നടന്നുനീങ്ങുന്ന ദൃശ്യങ്ങളാണ് ബോർഡർ റോഡ്‌സ് ഓർഗനൈസേഷൻ (ബിആർഒ) പുറത്തുവിട്ടത്.

'പർവ്വതങ്ങളിലെ പ്രേതം' എന്നറിയപ്പെടുന്ന മഞ്ഞുപുലികളെ ഒരുമിച്ച് കാണുന്നത് അതീവ വിരളമാണ്. ലഡാക്കിലെ ഉയർന്ന മലനിരകളിൽ റോഡ് നിർമ്മാണവും പരിപാലനവും നടത്തുന്ന ബി.ആർ.ഒയുടെ 'പ്രോജക്ട് ഹിമാങ്ക്' സംഘമാണ് ഈ ദൃശ്യങ്ങൾ പകർത്തിയത്.

മഞ്ഞിൽ പൊതിഞ്ഞ പാറക്കെട്ടുകൾക്കിടയിലൂടെ ഒന്നിന് പുറകെ ഒന്നായി വളരെ ശാന്തരായി നടന്നുപോകുന്ന പുലികളെ വീഡിയോയിൽ വ്യക്തമായി കാണാം. അടിസ്ഥാന സൗകര്യ വികസനവും പ്രകൃതി സംരക്ഷണവും ഒരേപോലെ മുന്നോട്ട് കൊണ്ടുപോകാൻ കഴിയുമെന്നതിന്റെ തെളിവാണ് ഈ ദൃശ്യങ്ങളെന്ന് വീഡിയോ പങ്കുവെച്ചുകൊണ്ട് ബി.ആർ.ഒ കുറിച്ചു.

സാധാരണയായി ഒറ്റയ്ക്ക് സഞ്ചരിക്കാൻ ഇഷ്ടപ്പെടുന്നവരാണ് മഞ്ഞുപുലികൾ. എന്നാൽ ഒരു കുടുംബത്തെ മുഴുവനായി ഇത്തരത്തിൽ കാണാൻ സാധിച്ചത് മേഖലയിലെ വന്യജീവി സമ്പത്ത് മെച്ചപ്പെടുന്നതിന്റെ സൂചനയാണെന്ന് വന്യജീവി വിദഗ്ധർ പറയുന്നു. ഇന്ത്യയിൽ നിലവിൽ ഏകദേശം 718 മഞ്ഞുപുലികളുണ്ടെന്നാണ് കണക്ക്.

ഇതിൽ ഭൂരിഭാഗവും (477 എണ്ണം) ലഡാക്കിലാണുള്ളത്. ഉത്തരാഖണ്ഡ്, ഹിമാചൽ പ്രദേശ്, സിക്കിം, അരുണാചൽ പ്രദേശ് എന്നിവിടങ്ങളിലും ഇവയെ കണ്ടുവരുന്നു. മഞ്ഞിൽ പെട്ടെന്ന് തിരിച്ചറിയാൻ കഴിയാത്ത നിറവും നിശബ്ദമായ നീക്കങ്ങളും കാരണമാണ് ഇവയെ 'ഗോസ്റ്റ് ഓഫ് ദി മൗണ്ടൈൻസ്' എന്ന് വിളിക്കുന്നത്.

ഹിമാലയത്തിലെ ദുർഘടമായ പാതകളിൽ സേവനം അനുഷ്ഠിക്കുന്ന സൈനികർക്കും ഉദ്യോഗസ്ഥർക്കും ലഭിച്ച ഈ ദൃശ്യങ്ങൾ പ്രകൃതിസ്നേഹികൾക്കിടയിൽ വലിയ ചർച്ചയായിരിക്കുകയാണ്.