അഞ്ച് സംസ്ഥാനങ്ങൾ തെരഞ്ഞെടുപ്പിലേക്ക്

വെബ് ഡെസ്ക്

Published on Mar 15, 2026, 11:51 AM | 2 min read

ന്യൂഡൽഹി: രാജ്യത്തെ അഞ്ച് സംസ്ഥാനങ്ങൾ ഏപ്രിലിൽ തെരഞ്ഞെടുപ്പിലേക്ക്. ഇന്ന് (മാര്‍ച്ച് 15)വൈകുന്നേരം നാല് മണിക്ക് തെരഞ്ഞെടുപ്പ് കമ്മീഷൻ മാധ്യമ സമ്മേളനത്തിൽ തീയതികൾ പ്രഖ്യാപിക്കും. നാല് സംസ്ഥാനങ്ങളിലും ഒരു കേന്ദ്ര ഭരണ പ്രദേശവുമാണ് തെര‍ഞ്ഞെടുപ്പിലേക്ക് എത്തുന്നത്.

നിയമസഭാ തെരഞ്ഞെടുപ്പ് നടക്കാനിരിക്കുന്ന അഞ്ച് സംസ്ഥാനങ്ങൾ (കേന്ദ്രഭരണ പ്രദേശം ഉൾപ്പെടെ)

കേരളം
തമിഴ്നാട്
പശ്ചിമ ബംഗാൾ
അസം
പുതുച്ചേരി (കേന്ദ്രഭരണ പ്രദേശം)

ഇന്ന് വൈകുന്നേരം പ്രഖ്യാപനം വരുന്നതോടെ ഈ സംസ്ഥാനങ്ങളിൽ ഉടനടി തിരഞ്ഞെടുപ്പ് പെരുമാറ്റച്ചട്ടം നിലവിൽ വരും. പശ്ചിമ ബംഗാളിൽ മുൻകാലങ്ങളിൽ നിന്ന് വ്യത്യസ്തമായി കുറഞ്ഞ ഘട്ടങ്ങളിലായി (രണ്ട് അല്ലെങ്കിൽ മൂന്ന് ഘട്ടം) വോട്ടെടുപ്പ് പൂർത്തിയാക്കാൻ രാഷ്ട്രീയ പാർട്ടികൾ കമ്മീഷനോട് ആവശ്യപ്പെട്ടിട്ടുണ്ട്. 2021-ലെ എട്ട് ഘട്ടങ്ങളിൽ നിന്ന് വ്യത്യസ്തമായി ഇത്തവണ ഘട്ടങ്ങളുടെ എണ്ണം കുറയ്ക്കാൻ സാധ്യതയുണ്ടെന്ന് റിപ്പോർട്ടുകൾ സൂചിപ്പിക്കുന്നു

കേരളത്തിലും തമിഴ്‌നാട്ടിലും ഒറ്റ ഘട്ടമായി തന്നെ വോട്ടെടുപ്പ് നടക്കാനാണ് സാധ്യത.

അസമിലും രണ്ടോ മൂന്നോ ഘട്ടങ്ങളിലായി വോട്ടെടുപ്പ് നടക്കാൻ സാധ്യതയുണ്ട്. ഏപ്രിലിൽ നടക്കുന്ന ബിഹു ഉത്സവം കണക്കിലെടുത്ത് തെരഞ്ഞെടുപ്പ് തീയതികളിൽ മാറ്റം വേണമെന്ന് രാഷ്ട്രീയ പാർട്ടികൾ ആവശ്യപ്പെട്ടിട്ടുണ്ട്.

എല്ലാ സംസ്ഥാനങ്ങളിലെയും വോട്ടെണ്ണൽ മെയ് ആദ്യവാരം ഒരേ ദിവസം നടക്കാനാണ് സാധ്യത.