വഖഫിന് പിന്നാലെ സഭയുടെ സ്വത്തുക്കൾ ലക്ഷ്യമാക്കി ചരിത്രവും കണക്കുമായി ആർഎസ്എസ്

തിരുവനന്തപുരം: രാജ്യത്തെ ഏറ്റവും വലിയ ഭൂവുടമസ്ഥർ വഖഫ് ബോർഡല്ല, മറിച്ച് ഇന്ത്യയിലെ കത്തോലിക്കാ സഭയാണെന്ന് ആർഎസ്എസ് മുഖപത്രമായ ഓർഗനൈസറിൽ ലേഖനം. മുസ്ലീം പള്ളികളും ചരിത്ര സ്മാരകങ്ങളും ആക്രമിക്കയും തകർക്കുകയും ചെയ്ത് മുന്നേറുന്നിതിനിടെയാണ് സഭയുടെ ആസ്തി വിവരങ്ങളുടെ കണക്കുമായി പുതിയ ലേഖനം എത്തിയത്. അടുത്ത ലക്ഷ്യം ആരെന്ന് കൃത്യമായ കണക്കും പതിവ് രീതിയിൽ സൃഷ്ടിച്ചെടുത്ത ചരിത്ര തെളിവുകളും നിരത്തുന്നതാണ് ലേഖനം.

ബ്രിട്ടീഷ് ഭരണകാലത്തെ ഔദാര്യങ്ങളാണ് സഭയെ കൊഴുപ്പിച്ചത് എന്ന സ്വന്തമായ ചരിത്ര സൂചന നൽകുന്ന ലേഖനം അടുത്ത ആക്രമണ ലക്ഷ്യം കൃത്യമായി പ്രഖ്യാപിക്കുന്നു-

'ഇന്ത്യയിൽ ആർക്കാണ് കൂടുതൽ ഭൂമിയുള്ളത്?' കാത്തലിക് ചർച്ച് - വഖഫ് ബോർഡ് സംവാദം' എന്ന പേരിൽ ഏപ്രിൽ മൂന്നിനാണ് ലേഖനം പ്രസിധീകരിച്ചത്. ലക്ഷ്യം പുറത്തായത് തിരിച്ചടിക്കും എന്ന് വ്യക്തമായതോടെ ലേഖനം തിടുക്കപ്പെട്ട് പിൻവലിച്ചു.

"സർക്കാർ കഴിഞ്ഞാൽ ഇന്ത്യയിലെ രണ്ടാമത്തെ വലിയ ഭൂവുടമ വഖഫ് ബോർഡാണെന്ന് വർഷങ്ങളായി ഒരു പൊതു വിശ്വാസം നിലവിലുണ്ട്. എന്നിരുന്നാലും, രാജ്യത്തെ ഭൂമിയുടെ ഉടമസ്ഥാവകാശത്തെക്കുറിച്ചുള്ള യഥാർത്ഥ ഡാറ്റയുമായി ഈ അവകാശവാദം പൊരുത്തപ്പെടുന്നില്ല. രാജ്യത്തുടനീളം വ്യാപിച്ചുകിടക്കുന്ന വിശാലമായ ഭൂമി കൈവശം വച്ചിരിക്കുന്ന ഏറ്റവും വലിയ സർക്കാരിതര ഭൂവുടമസ്ഥത സഭയ്ക്കുണ്ട്."

രാജ്യത്തുടനീളം കത്തോലിക്കാ സഭയ്ക്ക് ഏകദേശം 17.29 കോടി ഏക്കർ (7 കോടി ഹെക്ടർ) ഭൂമിയുണ്ടെന്നും ലേഖനത്തിൽ പറയുന്നു.

മുനമ്പം പ്രതിഷേധക്കാർക്ക് ഇടയിൽ വഖഫ് ഭേദഗതി ബിൽ പാസായതിനെ ചൂണ്ടികാണിച്ച് വർഗ്ഗീയ മുതലെടുപ്പിന് ബിജെപി നേതാക്കൾ കേരളത്തിലും ദേശീയതലത്തിലും പ്രചാരണം തുടരുന്നതിനിടെയാണ് ഓർഗനൈസറിലെ ലേഖനം പ്രത്യക്ഷപ്പെട്ടത്. വഖഫ് ബിൽ പാസായതോടെ മുനമ്പം പ്രശ്നം പരിഹരിക്കപ്പെടും. വഖഫ് നിയമമാണ് ഭൂമി പ്രശ്നത്തിൽ തടസം എന്നായിരുന്നു പ്രചാരണം. ബിൽ പാർലമെന്റിന്റെ ഇരുസഭയിലും ചർച്ച ചെയ്യുമ്പോഴും മുനമ്പം പ്രശ്നം മുൻനിർത്തി പരാമർശം ഉണ്ടായി. ന്യൂനപക്ഷ വിഭാഗീയത കൂടി കൊഴുപ്പിച്ചെടുക്കുക. ഇടതുപക്ഷത്തിനെതിരെ ഇരുസമുദായങ്ങളെയും തിരിക്കുക. കേരളത്തിൽ പുതിയ വിഭാഗീയ പിന്തുണ സാധ്യമാക്കുക എന്നിങ്ങനെ ലക്ഷ്യങ്ങൾ പലതായിരുന്നു. വിദ്യാലയങ്ങളുടെ കണക്കുകൾ വരെ ലേഖനത്തിൽ നിരത്തുന്നുണ്ട്.

“സഭയുടെ സ്വത്തുക്കളുടെ ആകെ മൂല്യം ഏകദേശം 20,000 കോടി രൂപയാണ്, ഇത് ഇന്ത്യയുടെ റിയൽ എസ്റ്റേറ്റ് മേഖലയിൽ സഭയെ ഒരു പ്രധാന പങ്കാളിയാക്കി മാറ്റുന്നു. 2012 ലെ കണക്കനുസരിച്ച്, കത്തോലിക്കാ സഭയ്ക്ക് 2,457 ആശുപത്രികൾ, 240 മെഡിക്കൽ അല്ലെങ്കിൽ നഴ്സിംഗ് കോളേജുകൾ, 28 ജനറൽ കോളേജുകൾ, 5 എഞ്ചിനീയറിംഗ് കോളേജുകൾ, 3,765 സെക്കൻഡറി സ്കൂളുകൾ, 7,319 പ്രൈമറി സ്കൂളുകൾ, 3,187 നഴ്സറി സ്കൂളുകൾ എന്നിവ വിദ്യാഭ്യാസ, ആരോഗ്യ സംരക്ഷണ മേഖലകളിലായി ഉണ്ട്.

1927 ൽ ബ്രിട്ടീഷ് ഭരണകൂടം ഇന്ത്യൻ ചർച്ച് ആക്ട് പാസാക്കി, ഇത് സഭയ്ക്ക് വലിയ തോതിലുള്ള ഭൂമി ഗ്രാന്റുകൾക്ക് സൗകര്യമൊരുക്കി”- എന്നിങ്ങനെ ആർ എസ് എസ് മുഖപ്രസിധീകരണമായ ഓർഗനൈസർ കണക്കുകളും അടുത്ത പടി തകർക്കലിനുള്ള കാരണമായി ഉന്നയിക്കാൻ പോകുന്ന ചരിത്ര അടിത്തറയും വ്യക്തമാക്കി.

"ആദിവാസി, ഗ്രാമീണ സമൂഹങ്ങളിൽ നിന്നുള്ള ഭൂവുടമകളെ ക്രിസ്തുമതത്തിലേക്ക് പരിവർത്തനം ചെയ്യാൻ പ്രോത്സാഹിപ്പിച്ചതോ - ചില സന്ദർഭങ്ങളിൽ നിർബന്ധിച്ചതോ ആയ നിരവധി സംഭവങ്ങൾ പുറത്തുവന്നിട്ടുണ്ട്, തുടർന്ന് അവരുടെ ഭൂമി സഭയുമായി ബന്ധപ്പെട്ട സംഘടനകൾ ഏറ്റെടുത്തു. ഈ ആരോപണങ്ങൾ സഭ നിഷേധിക്കുന്നുണ്ടെങ്കിലും, മതപരിവർത്തന പ്രവർത്തനങ്ങളുമായി ബന്ധപ്പെട്ട നിരവധി നിയമവിരുദ്ധ ഭൂമി ഏറ്റെടുക്കലുകൾ വിവിധ സംസ്ഥാനങ്ങളിൽ ഉയർന്നുവന്നിട്ടുണ്ട്, ഇത് ഇന്ത്യയുടെ സാമൂഹിക-മത ഭൂപ്രകൃതിയിൽ മിഷനറി സ്ഥാപനങ്ങളുടെ പങ്കിനെക്കുറിച്ചുള്ള ആശങ്കകൾക്ക് ആക്കം കൂട്ടുന്നു. ഒരുകാലത്ത് തദ്ദേശീയ സമൂഹങ്ങളുടെ വകയായിരുന്ന ഗോത്ര ഭൂമികൾ ക്രമേണ വിവിധ കാരണങ്ങളാൽ സഭാ അധികാരികൾക്ക് കൈമാറിയ നിരവധി സംഭവങ്ങൾ പുറത്തുവന്നിട്ടുണ്ട്," എന്നിങ്ങനെ ലേഖനം ഉത്തരേന്ത്യയിൽ സംഘപരിവാർ ക്രിസ്ത്യൻ സമൂഹത്തിന് എതിരെ നടത്തുന്ന ആക്രമണങ്ങൾക്ക് കാരണായി പറയുന്ന വാദങ്ങളും ലേഖനം ആധികാരിക ധ്വനിയിൽ നിരത്തുന്നുണ്ട്.

ക്രിസ്ത്യൻ പള്ളികൾക്കും ആരാധനായലങ്ങൾക്കും എതിരെ ആർ എസ് എസ് നേതൃത്വത്തിൽ നടത്തുന്ന ആക്രമണങ്ങൾക്ക് തുടർച്ചയും വാദങ്ങൾക്ക് അടിത്തറയും നൽകുന്ന ലേഖനം കേരളത്തിൽ വലിയ ചർച്ച ഉയർത്തുമെന്ന് പെട്ടെന്ന് തിരിച്ചറിഞ്ഞു. സംസ്ഥാനത്ത് ഉൾപ്പെടെ ന്യൂനപക്ഷങ്ങൾക്കിടയിലും നടത്തുന്ന പുതിയ തരം വിഭാഗീയ ശ്രമങ്ങൾക്ക് ഇത് തിരിച്ചടിയാവും എന്ന് തിരിച്ചറിഞ്ഞു. ദേശീയതലത്തിൽ വഫഖ് ബില്ല് വഴി ന്യൂനപക്ഷങ്ങൾക്ക് ഇടയിലും സൃഷ്ടിച്ചെടുത്ത വിഭാഗീയതയുടെ ഊർജ്ജവും മുൻതൂക്കവും കൈമോശം വരുമോ എന്ന ചർച്ചയും സംഘപരിവാർ ഗ്രൂപ്പുകളിൽ തന്നെ ലേഖനം ഉയർത്തി. ഇതോടെ ആർ എസ് എസ് നേതൃത്വം ഇടപെട്ടാണ് ലേഖനം തിടുക്കപ്പെട്ട് പിൻവലിപ്പിച്ചത് എന്നാണ് റിപ്പോർട്ടുകൾ.