ഒമ്പതാം ക്ലാസ് പാഠപുസ്തകങ്ങൾ വീണ്ടും അച്ചടിക്കാൻ നീക്കം; ഉടൻ ലഭ്യമാകുമെന്ന് എൻസിഇആർടി

ന്യൂഡൽഹി: പുതിയ അധ്യയന വർഷത്തിലേക്കുള്ള ഒമ്പതാം ക്ലാസ് പാഠപുസ്തകങ്ങളുടെ വിതരണം വേഗത്തിലാക്കാൻ എൻസിഇആർടി. പാഠപുസ്തകങ്ങളുടെ അച്ചടി യുദ്ധകാലാടിസ്ഥാനത്തിൽ പുരോഗമിക്കുകയാണെന്നും വിദ്യാർത്ഥികൾക്ക് ഉടൻ തന്നെ ഇവ ലഭ്യമാക്കുമെന്നും നാഷണൽ കൗൺസിൽ ഓഫ് എഡ്യൂക്കേഷണൽ റിസർച്ച് ആൻഡ് ട്രെയിനിംഗ് അറിയിച്ചു.

പുതിയ പാഠ്യപദ്ധതി പ്രകാരമുള്ള പരിഷ്കരിച്ച പുസ്തകങ്ങളാണ് തയ്യാറാകുന്നത്. പുസ്തകങ്ങളുടെ ക്ഷാമം പരിഹരിക്കാൻ ഊർജിതമായ നടപടികളാണ് സ്വീകരിച്ചുവരുന്നത്. നിലവിൽ സോഷ്യൽ സയൻസ് ഒഴികെയുള്ള മറ്റ് പ്രധാന വിഷയങ്ങളുടെ പാഠപുസ്തകങ്ങൾ പ്രസിദ്ധീകരിച്ചിട്ടുണ്ട്.

സോഷ്യൽ സയൻസ് പുസ്തകത്തിന്റെ അച്ചടി ഉടൻ പൂർത്തിയാകുമെന്നും അധികൃതർ വ്യക്തമാക്കി. പുസ്തകങ്ങൾ വിപണിയിൽ എത്തുന്നതിലെ കാലതാമസം വിദ്യാർത്ഥികളെ ബാധിക്കാതിരിക്കാൻ എല്ലാ പാഠപുസ്തകങ്ങളുടെയും ഡിജിറ്റൽ പതിപ്പുകൾ എൻസിഇആർടി വെബ്‌സൈറ്റിൽ (ncert.nic.in) സൗജന്യമായി ലഭ്യമാക്കിയിട്ടുണ്ട്.

രണ്ടാഴ്ച മുമ്പ് തന്നെ ഈ പോർട്ടൽ വഴി പുസ്തകങ്ങൾ ഡൗൺലോഡ് ചെയ്യാൻ സാധിക്കുമായിരുന്നു. സ്കൂളുകൾക്കും രക്ഷിതാക്കൾക്കും ബുദ്ധിമുട്ടില്ലാതെ പുസ്തകങ്ങൾ ലഭിക്കുന്നതിനായി പ്രത്യേക സംവിധാനങ്ങൾ ഒരുക്കിയിട്ടുണ്ട്. എൻസിഇആർടി സെയിൽസ് കൗണ്ടറുകൾ വഴിയും ഇ-കൊമേഴ്സ് പ്ലാറ്റ്‌ഫോമുകൾ വഴിയും പുസ്തകങ്ങൾ ലഭ്യമാക്കും.

ബൾക്ക് ഓർഡറുകൾ നൽകുന്ന സ്കൂളുകൾക്ക് നേരിട്ട് പുസ്തകങ്ങൾ എത്തിച്ചുനൽകാനുള്ള സൗകര്യവും കൗൺസിൽ ഉറപ്പുനൽകുന്നു. ദേശീയ വിദ്യാഭ്യാസ നയത്തിന്റെ ഭാഗമായുള്ള പരിഷ്കാരങ്ങൾ നടപ്പിലാക്കുന്നതിനിടെയുണ്ടായ സാങ്കേതിക തടസ്സങ്ങൾ പരിഹരിച്ചതായും വിദ്യാർത്ഥികൾക്ക് ആശങ്ക വേണ്ടെന്നും എൻസിഇആർടി അറിയിച്ചു.