കുനാൽ കമ്രയ്ക്ക് ഇടക്കാല മുൻകൂർ ജാമ്യം അനുവദിച്ച്‌ മദ്രാസ്‌ ഹൈക്കോടതി

ചെന്നെ: സ്റ്റാൻഡ്-അപ്പ് കൊമേഡിയൻ കുനാൽ കമ്രയ്ക്ക് മദ്രാസ്‌ ഹൈക്കോടതി ഇടക്കാല മുൻകൂർ ജാമ്യം അനുവദിച്ചു. മഹാരാഷ്ട്ര ഉപമുഖ്യമന്ത്രി ഏക്‍നാഥ് ഷിന്‍ഡെയെ പരിഹസിച്ചെന്ന കേസിലാണ്‌ മുൻകൂർ ജാമ്യം അനുവദിച്ചത്‌.

ഷിന്‍ഡെയെ പരിഹസിച്ചെന്ന് ആരോപിച്ച് കുനാൽ കമ്രയ്ക്ക് ശിവസേന പ്രവര്‍ത്തകരുടെ വധ ഭീഷണിയുണ്ടായിരുന്നു. കൊല്ലുമെന്നും വെട്ടിനുറുക്കുമെന്നുമുള്ള അഞ്ഞൂറിലേറെ ഭീഷണി ഫോൺകോളുകളാണ് കുനാലിന് ലഭിച്ചതായി റിപ്പോർട്ട് ചെയ്യപ്പെട്ടത്.

കുനാല്‍ കമ്രയുടെ ഷോ നടക്കുന്ന മുംബെെയിലെ ഹാബിറ്റാറ്റ് സ്റ്റുഡിയോ ശിവസേന പ്രവർത്തകർ ഞായറാഴ്ച രാത്രി അടിച്ചുതകർത്തിരുന്നു. സ്റ്റുഡിയോയുടെ നിർമാണത്തിൽ അപാകമുണ്ടെന്ന്‌ കാട്ടി ബ്രിഹൻ മുംബൈ മുനിസിപ്പാലിറ്റി അധികൃതരും കെട്ടിടത്തിന്റെ ചിലഭാഗങ്ങൾ ഇടിച്ചുനിരത്തി. ശിവസേന പ്രവര്‍ത്തകന്റെ പരാതിയില്‍ കമ്രയ്‌ക്കെതിരെ പുതിയതായി പൊലീസ് കേസെടുത്തിരുന്നു.