പാൽ വിലയും കൂട്ടി കർണാടക; ലിറ്ററിന് 4 രൂപ വർധന

ബംഗളൂരു: കർണാടകയിൽ പാൽ വില ഏപ്രിൽ 1 മുതൽ ലിറ്ററിന് 4 രൂപ വർധിപ്പിക്കുമെന്ന് സംസ്ഥാന സഹകരണ മന്ത്രി കെ എൻ രാജണ്ണ. വൈദ്യുതി, ബസ്, മെട്രോ നിരക്ക് വര്‍ധനയ്ക്ക് പിന്നാലെയാണ്‌ പാലിന്റെയും വില വർധന. കഴിഞ്ഞവര്‍ഷം പായ്ക്കറ്റിന് 2 രൂപ കര്‍ണാടക മിൽക്ക് ഫെഡറേഷന്‍ കൂട്ടിയിരുന്നു. സാധാരണ ടോൺഡ് പാലിന് 42 രൂപയും തൈരിന് 50 രൂപയുമാണ് നിലവിലെ വില. പാൽ ഫെഡറേഷനുകളുടെയും കർഷകരുടെയും സമ്മർദ്ദത്തെ തുടർന്നാണ്‌ നടപടിയെന്നാണ്‌ മന്ത്രിയുടെ ന്യായീകരണം.

"വില വർധിപ്പിക്കാനുള്ള തീരുമാനം പാൽ ഫെഡറേഷനാണ് എടുത്തത്, അവർ ലിറ്ററിന് 5 രൂപ വർധനവ് ആവശ്യപ്പെട്ടിരുന്നു. സർക്കാർ സമ്മതിക്കുകയും ഏപ്രിൽ 1 മുതൽ 4 രൂപ വർധനവ് പ്രാബല്യത്തിൽ കൊണ്ടുവരാൻ തീരുമാനിക്കുകയും ചെയ്തു' മന്ത്രി പറഞ്ഞു. നേരത്തെ കർണാടക മിൽക്ക് ഫെഡറേഷൻ (കെഎംഎഫ്) ചെയർമാൻ ഭീമ നായിക്കും പാൽ വിലയിൽ വർധനവ് ഉണ്ടാകാനുള്ള സാധ്യതയെക്കുറിച്ച് സൂചന നൽകിയിരുന്നു.

കർണാടക മിൽക്ക് ഫെഡറേഷൻ (കെഎംഎഫ്) 'നന്ദിനി' ബ്രാൻഡിലാണ് പാലുൽപ്പന്നങ്ങൾ വിപണനം ചെയ്യുന്നത്. 2024 ൽ കെഎംഎഫ് പാലിന്റെ വില പാക്കറ്റിന് 2 രൂപ വർധിപ്പിച്ചിരുന്നു. അപ്പോൾ ഒരു പാക്കറ്റിൽ 50 മില്ലി പാലിന്റെ വർധനവുണ്ടെന്നായിരുന്നു സർക്കാരിന്റെ ന്യായം. വിതരണം ചെയ്യുന്ന പാലിന്റെ അളവും വർധിച്ചതിനാൽ 2024 ലെ വില വർധനവ് ഒരു വർധനവല്ലെന്നാണ്‌ കെഎംഎഫിന്റെ വാദം. സംസ്ഥാനം കടുത്ത സാമ്പത്തിക പ്രതിസന്ധിയിലൂടെയാണ്‌ കടന്നു പോകുന്നത്‌. എന്നാൽ അപ്പോഴും മുഖ്യമന്ത്രിയുടെയും മന്ത്രിമാരുടെയും എംഎൽഎമാരുടെയും ശമ്പളം 100 ശതമാനം വര്‍ധിപ്പിക്കുകയും ചെയ്തിട്ടുണ്ട്.

നന്ദിനി പാലിന്റെ പുതുക്കിയ വില (നിലവിലുള്ള വിലകൾ ബ്രാക്കറ്റിൽ)

● ടോൺഡ് (നീല പാക്കറ്റ്): 46 രൂപ (42 രൂപ)

● ഹോമോജെനൈസ്ഡ് ടോൺഡ്: 47 രൂപ (43 രൂപ)

● പച്ച പാക്കറ്റ്: 50 രൂപ (46 രൂപ)

● ശുഭം (സ്പെഷ്യൽ/ഓറഞ്ച് പാക്കറ്റ്): 52 രൂപ (48 രൂപ)

● തൈര്: 54 രൂപ (50 രൂപ)

● സമൃദ്ധി (പിങ്ക് പാക്കറ്റ്, ഫുൾ ക്രീം): 60 രൂപ (56)