ജെഎൻയുവിലെ അധ്യാപകനെതിരെ ലൈം​ഗികാതിക്രമ പരാതി

ന്യൂഡൽഹി: ഡൽഹി ജെഎൻയുവിലെ അധ്യാപകനെതിരെ ലൈം​ഗികാതിക്രമ പരാതി. 10 ഓളം വിദ്യാർഥിനികളാണ് രം​ഗത്ത് വന്നത്. ലൈം​ഗികതാത്പര്യത്തോടെ സമീപിച്ചതായി വിദ്യാർഥിനികൾ പറഞ്ഞു. സംഭവത്തിൽ സർവകലാശാല അന്വേഷണം ആരംഭിച്ചു. ഒരു മാസം മുൻപാണ് അധ്യാപകനെതിരെ വിദ്യാർഥികൾ സർവകലാശാലയിലെ ആഭ്യന്തര പരാതി പരിഹാര സമിതിക്ക് പരാതി നൽകിയത്.

ക്യാമ്പസിനുള്ളിൽ തന്നെ താമസമാക്കിയ അധ്യാപകൻ തങ്ങളെ വീട്ടിലേയ്ക്ക് വിളിച്ചുവരുത്തുകയും ലൈം​ഗികാസക്തിയോടെ സ്പർശിക്കുകയും സംസാരിക്കുകയും ചെയ്തതായാണ് വിദ്യാർഥികളുടെ പരാതി. കൂടാതെ ക്ലാസെടുക്കുന്ന സമയത്തും മോശമായ രീതിയിലായിരുന്നു പെരുമാറ്റമെന്നും ഇവർ ആരോപിക്കുന്നു. കോളേജിലെ മറ്റു കുട്ടികളും സമാന ആരോപണവുമായി രം​ഗത്തുവന്നിട്ടുണ്ട്. തങ്ങൾക്ക് നിലവിൽ പരാതി നൽകാത്തതിനാൽ കേസ് രജിസ്റ്റർ ചെയ്തിട്ടില്ലെന്ന് പൊലീസ് അറിയിച്ചു. കോളേജിന്റെ പരാതി പരിഹാര സമിതി അന്വേഷിച്ച് റിപ്പോർട് കൈമാറിയ ശേഷം അധ്യാപകനെതിരെ നടപടിയുണ്ടായേക്കുമെന്നാണ് വിവരം.