ഇന്ത്യയിലെ മോശം വായു; യുഎൻ മാനദണ്ഡങ്ങളേക്കാളും വളരെ താഴെയെന്ന്‌ റിപ്പോർട്ട്‌

ന്യൂഡൽഹി: ഇന്ത്യയിലെ വായുവിന്റെ ഗുണനിലവാരം ലോകാരോഗ്യ സംഘടനയുടെ മാനദണ്ഡങ്ങളേക്കാൾ വളരെ താഴെയാണെന്നും ജനസംഖ്യയുടെ 40 ശതമാനത്തിലധികം പേർ ഇപ്പോഴും ബയോമാസ് ഇന്ധനങ്ങളെ ആശ്രയിക്കുന്നുണ്ടെന്നും ഐക്യരാഷ്ട്രസഭ. പാചകത്തിന് ബയോമാസ് ഇന്ധനങ്ങൾ ഉപയോഗിക്കുന്നത് മൂലമുണ്ടാകുന്ന ഗാർഹിക വായു മലിനീകരണം കുറയ്ക്കാൻ നടപ്പാക്കുന്ന നിലവിലുള്ള പരിപാടികൾ വിപുലീകരിക്കണമെന്ന് ലോകാരോഗ്യ സംഘടന ഇന്ത്യയോട്‌ ആവശ്യപ്പെട്ടിരുന്നു.

ഇന്ത്യയിൽ 41 ശതമാനം കുടുംബങ്ങളും ഇപ്പോഴും ബയോമാസ് ഇന്ധനത്തെ ആശ്രയിക്കുന്നവരാണ്‌. ഇത് രാജ്യത്ത്‌ രോഗങ്ങൾക്കും മരണനിരക്ക്‌ ഉയരുന്നതിനും കാരണമാകുന്നു. സാംക്രമികേതര രോഗങ്ങൾ അഥവാ എൻ‌സി‌ഡികൾക്ക് വായു മലിനീകരണം ഒരു പ്രധാന കാരണമാണെന്നും സെപ്‌തംബറിൽ നടക്കാനിരിക്കുന്ന ഐക്യരാഷ്ട്രസഭയുടെ പൊതുസഭയിൽ ഇത് ഒരു വിഷയമാകുമെന്നും ഐക്യരാഷ്‌ട്ര സഭ ആരോഗ്യ വകുപ്പിന്റെ ഡയറക്ടർ ഡോ. മരിയ നീര പറഞ്ഞു.

വായു ഗുണനിലവാരം മോശമായിട്ടുള്ളത്‌ ഡൽഹിയിൽ മാത്രമല്ലെന്നും രാജ്യത്തുടനീളമുണ്ടെന്നും അവർ പറഞ്ഞു. എന്നാൽ മലിനീകരണത്തിന്റെ കാര്യത്തിൽ നമ്മൾ എപ്പോഴും ന്യൂഡൽഹിയിലാണ് ശ്രദ്ധ കേന്ദ്രീകരിക്കുന്നത്‌. മലിനീകരണത്തെ ചെറുക്കുന്നതിനുള്ള വിഭവങ്ങളും, നൂതനാശയങ്ങളും, സാങ്കേതികവിദ്യയും രാജ്യത്തുണ്ട്‌. അവയുടെ ഉപയോഗത്തിലൂടെ ഇന്ത്യ മറ്റ് രാജ്യങ്ങൾക്ക് ഒരു മാതൃക യാവണമെന്ന്‌ മരിയ നീര പറഞ്ഞു.