ഇന്ത്യ - കാനഡ വ്യാപാര ചർച്ച; അഞ്ചാം ഘട്ടത്തിന് ഇന്ന് തുടക്കം

ന്യൂഡൽഹി : സമഗ്ര സാമ്പത്തിക പങ്കാളിത്ത കരാർ സംബന്ധിച്ച ഇന്ത്യ - കാനഡ അഞ്ചാം ഘട്ട ചർച്ചയ്ക്ക് ഇന്ന് ഒട്ടാവയിൽ തുടക്കം. ഈ വർഷം അവസാനത്തോടെ വ്യാപാര കരാർ പൂർത്തിയാക്കുക എന്ന ലക്ഷ്യത്തോടെയാണ് ഒക്ടോബർ 9 വരെ നീളുന്ന ചർച്ച ആരംഭിക്കുന്നത്.

നാലാം ഘട്ട ചർച്ചകൾ സെപ്തംബർ 18ന് ന്യൂഡൽഹിയിൽ നടന്നിരുന്നു. കാനഡ പ്രധാനമന്ത്രി മാർക്ക് കാർണി കഴിഞ്ഞ മാസം നടത്തിയ പ്രസ്താവനയനുസരിച്ച്, ഡിസംബറോടെ ഇന്ത്യൻ പ്രധാനമന്ത്രി നരേന്ദ്ര മോദി കാനഡ സന്ദർശിക്കും.

ഉഭയകക്ഷി ചർച്ചകൾ വേ​ഗത്തിലാക്കുക എന്ന ലക്ഷ്യത്തോടെ കാനഡയുടെ വ്യാപാര മന്ത്രി മനിന്ദർ സിദ്ധു 300 അംഗ ബിസിനസ് സംഘത്തോടൊപ്പം ഈ മാസം അവസാനം ഡൽഹി സന്ദർശിക്കാനും തീരുമാനിച്ചിട്ടുണ്ട്.

കഴിഞ്ഞ സാമ്പത്തിക വർഷം ഇരുരാജ്യങ്ങളും തമ്മിലുള്ള ചരക്ക് വ്യാപാരം 8.23 ശതമാനം ഇടിവ് രേഖപ്പെടുത്തിയിരുന്നു. ഇന്ത്യയിൽ നിന്നുള്ള കയറ്റുമതി 4.67 ബില്യൺ ഡോളറായി ഉയർന്നപ്പോൾ കാനഡയിൽ നിന്നുള്ള ഇറക്കുമതി 3.28 ബില്യാൺ ഡോളറായി കുറഞ്ഞു.