അഞ്ചുലക്ഷം രൂപയുടെ കൊക്കെയ്നുമായി ആശുപത്രിയുടെ സിഇഒ അറസ്റ്റിൽ

ഹൈദരാബാദ് : അഞ്ചുലക്ഷം രൂപയുടെ കൊക്കെയ്ൻ(മയക്കുമരുന്ന്) വാങ്ങുന്നതിനിടെ ആശുപത്രി സിഇഒ അറസ്റ്റിൽ. ഹൈദരാബാദിലെ ഒരു സ്വകാര്യ ആശുപത്രിയുടെ സിഇഒ ആയ നമ്രത ചിഗുരുപതി(34) ആണ് പൊലീസ് പിടിയിലായത്. നമ്രത ചിഗുരുപതി മുംബൈ ആസ്ഥാനമായുള്ള വിതരണക്കാരനായ വാൻഷ് ധാക്കറിൽ നിന്ന് കൊറിയർ വഴിയാണ് കൊക്കെയ്ൻ വാങ്ങിയത്. സ്ഥിരമായി മയക്കുമരുന്ന് ഇടപാട് നടത്തവരാണ് ഇരുവരും.

മയക്കുമരുന്ന് എത്തിച്ചുകൊടുത്ത ധാക്കറിന്റെ സഹായി ബാലകൃഷ്ണനൊപ്പമാണ് നമ്രത ചിഗുരുപതി പൊലീസ് പിടിയിലായത്. ചിഗുരുപതി വാട്‌സ്ആപ്പ് വഴി ധാക്കറിന്റെ പക്കൽ നിന്ന് അഞ്ചുലക്ഷം രൂപയുടെ കൊക്കെയ്ൻ ഓർഡർ ചെയ്തുവെന്നും ഓൺലൈൻ വഴിയാണ് പണം കൈമാറിയതെന്നും പൊലീസ് പറഞ്ഞു. തുടർന്ന് ബാലകൃഷ്ണ കൊക്കെയ്ൻ ചിഗുരുപതിക്ക് കൈമാറാനായി റായദുർഗത്തിൽ എത്തി.

പൊലീസ് ഓഫീസർ ശ്രീ വെങ്കണ്ണയുടെ നേതൃത്വത്തിലുള്ള സംഘം ഇവരെ പിന്തുടർന്ന് പിടികൂടുകയായിരുന്നു. ഇവരിൽ നിന്ന് 10,000 രൂപയും 53 ഗ്രാം കൊക്കെയ്നും രണ്ട് മൊബൈൽ ഫോണും പൊലീസ് പിടിച്ചെടുത്തു.