മുംബൈയിൽ ഇന്ന് കനത്ത മഴയ്ക്ക് സാധ്യത; മുന്നറിയിപ്പുമായി കാലാവസ്ഥാ നിരീക്ഷണ കേന്ദ്രം

മുംബൈ: മഹാരാഷ്ട്രയുടെ തീരദേശ മേഖലകളിൽ മഴ ശക്തമാകുമെന്ന മുന്നറിയിപ്പുമായി കേന്ദ്ര കാലാവസ്ഥാ വകുപ്പ്. മുംബൈ, താനെ, പാൽഘർ എന്നീ ജില്ലകളിൽ ഇന്ന് ഒറ്റപ്പെട്ടയിടങ്ങളിൽ അതിശക്ത മഴയ്ക്ക് സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ പ്രവചനം.

തുടർച്ചയായി പെയ്യുന്ന മഴയെ തുടർന്ന് മുംബൈയിലും സമീപ നഗരങ്ങളിലും താഴ്ന്ന പ്രദേശങ്ങളിൽ വെള്ളപ്പൊക്ക ഭീഷണിയും യാത്രാ തടസ്സങ്ങളും ഉണ്ടാകാൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകുന്നു. മുംബൈ നഗരത്തിലും നഗരപ്രാന്തങ്ങളിലും താനെയിലും ഇടിയോടുകൂടിയ ശക്തമായ മഴയ്ക്കുള്ള സാധ്യത മുൻനിർത്തി യെല്ലോ അലർട്ട് പ്രഖ്യാപിച്ചിട്ടുണ്ട്. മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ ശക്തമായ കാറ്റടിക്കാനും സാധ്യതയുണ്ട്.

വടക്കൻ കൊങ്കൺ തീരത്തോടടുത്ത പാൽഘർ ജില്ലയിൽ മഴ കൂടുതൽ ശക്തമാകാൻ സാധ്യതയുള്ളതിനാൽ പ്രാദേശിക ഭരണകൂടം മുൻകരുതൽ നടപടികൾ സ്വീകരിച്ചിട്ടുണ്ട്. കനത്ത മഴ പെയ്താൽ മുംബൈയിലെ ലോക്കൽ ട്രെയിൻ ഗതാഗതത്തെയും റോഡ് ഗതാഗതത്തെയും ബാധിച്ചേക്കാം. താഴ്ന്ന പ്രദേശങ്ങളിലുള്ളവർ ജാഗ്രത പാലിക്കണമെന്ന് കോർപ്പറേഷൻ അധികൃതർ നിർദ്ദേശിച്ചു.

മത്സ്യത്തൊഴിലാളികൾ കടലിൽ പോകരുതെന്നും, അടിയന്തര സാഹചര്യങ്ങൾ നേരിടാൻ ദുരന്തനിവാരണ സേനകൾ സജ്ജമാണെന്നും മഹാരാഷ്ട്ര സർക്കാർ അറിയിച്ചിട്ടുണ്ട്. വരും മണിക്കൂറുകളിൽ മഴയുടെ തീവ്രത അനുസരിച്ച് മുന്നറിയിപ്പുകളിൽ മാറ്റം വരുത്തിയേക്കാം.