ഥാർ ഓടിക്കുന്നവർക്കെല്ലാം 'ഭ്രാന്താ'യിരിക്കും; ഹരിയാന പൊലീസ്

ചണ്ഡിഗഢ്: മഹീന്ദ്ര ഥാർ കാർ ഉടമകൾക്കും ഓടിക്കുന്നവർക്കുമെല്ലാം ഭ്രാന്താണെന്നാണ് ഹരിയാന ഡിജിപി ഒ പി സിങ്ങ് അഭിപ്രായപ്പെടുന്നത്. ശനിയാഴ്ച മാധ്യമപ്രവർത്തകരുമായി സംസാരിക്കുന്നതിനിടെയാണ് അദ്ദേഹം തന്റെ അഭിപ്രായം പങ്കുവച്ചത്. വാഹന പരിശോധന നടത്തുമ്പോൾ ഉദ്യോഗസ്ഥർ പാലിക്കേണ്ട നടപടിക്രമങ്ങളെക്കുറിച്ച് സംസാരിക്കുകയായിരുന്നു അദ്ദേഹം. പൊലീസുകാർ മാന്യമായി പെരുമാറണമെന്ന് അദ്ദേഹം ഓർമ്മിപ്പിക്കുകയും ചെയ്തു.

പരിശോധനയ്ക്കായി എല്ലാ വാഹനങ്ങളും തടഞ്ഞു നിർത്താനാവില്ലെന്ന് പറഞ്ഞ അദ്ദേഹം ഥാറിനെ ഒഴിവാക്കാൻ കഴിയില്ലെന്ന് പറയുകയായിരുന്നു. 'അതൊരു ഥാർ ആണെങ്കിൽ, ഞങ്ങൾക്ക് എങ്ങനെ വിട്ടയക്കാൻ കഴിയും? അല്ലെങ്കിൽ ബുള്ളറ്റ്... എല്ലാ ക്രിമിനൽ സ്വഭാവമുള്ളവരും ഈ രണ്ട് വാഹനങ്ങളാണ് പ്രധാനമായും ഉപയോ​ഗിക്കുന്നത്.

വാഹനത്തിന്റെ തിരഞ്ഞെടുപ്പ് നിങ്ങളുടെ മനോഭാവത്തെയാണ് പ്രതിഫലിപ്പിക്കുന്നത്. ഥാർ ഓടിക്കുന്നവർ റോഡിൽ അഭ്യാസങ്ങൾ നടത്തുന്നു. ഒരു അസിസ്റ്റന്റ് പൊലീസ് കമ്മീഷണറുടെ മകൻ ഥാർ ഓടിച്ച് ഒരാളെ ഇടിച്ചിട്ടു. മകനെ വിട്ടയക്കണമെന്ന് അദ്ദേഹം ആവശ്യപ്പെട്ടു, അപ്പോൾ ഞങ്ങൾ ചോദിച്ചു, ഈ കാർ ആരുടെ പേരിലാണ് രജിസ്റ്റർ ചെയ്തിരിക്കുന്നതെന്ന്? അത് അദ്ദേഹത്തിന്റെ പേരിലാണ്. അപ്പോൾ യഥാർത്ഥ കുറ്റക്കാരൻ അദ്ദേഹം തന്നെയാണ്," സിംഗ് പറഞ്ഞു.

"ഞങ്ങൾ പൊലീസുകാരുടെ ഒരു ലിസ്റ്റ് എടുത്താൽ, എത്രപേർക്ക് ഥാർ ഉണ്ടാകും? ആ വണ്ടി ആർക്കൊക്കെയുണ്ടോ, അവർക്കൊക്കെ ഭ്രാന്തായിരിക്കും. ഥാർ ഒരു കാറല്ല, അതൊരു പ്രസ്താവനയാണ്, 'ഞാൻ ഇങ്ങനെയാണ്' എന്ന് അത് സ്ഥാപിക്കുകയാണവർ. അങ്ങനെയെങ്കിൽ വരുന്നതിനെ നേരിടുക. രണ്ടും ഒരുമിച്ച് പറ്റില്ല. നിങ്ങൾക്ക് ഗുണ്ടായിസം കാണിക്കുകയും വേണം എന്നിട്ട് പിടിയിലാകാനും കഴിയില്ല എന്ന് പറഞ്ഞാൽ നടക്കില്ല," പിന്നീട് തന്റെ അടുത്ത് നിന്ന സഹപ്രവർത്തകനായ പൊലീസുകാരനെ നോക്കിക്കൊണ്ട് അദ്ദേഹം പറഞ്ഞു.

ഡിജിപിയുടെ ഈ വാക്കുകൾ, തമാശരൂപത്തിൽ പറഞ്ഞതാണെങ്കിലും, ഥാറുകൾ ഉപയോഗിച്ച് വർദ്ധിച്ചു വരുന്ന അഭ്യാസ പ്രകടനങ്ങളുടെയും അപകടങ്ങളുടെയും റിപ്പോർട്ടുകളുടെ അടിസ്ഥാനത്തിലാണ്. വാഹനത്തിന് മുകളിൽ കയറിയിരുന്ന് യുവതികൾ അഭ്യാസം കാണിച്ചതും, റോഡരികിലെ വൈദ്യുത തൂണിൽ ഇടിച്ചതും, ഓടുന്ന ഥാറിൽ നിന്ന് മൂത്രമൊഴിച്ചതുമടക്കമുള്ള സംഭവങ്ങൾ റിപ്പോർട്ട് ചെയ്യപ്പെട്ടിരുന്നു. കൂടാതെ ഥാറുകൾ അശ്രദ്ധമായി ഓടിച്ച് അപകടങ്ങളുണ്ടാക്കിയ നിരവധി സംഭവങ്ങളും റിപ്പോർട്ട് ചെയ്തിട്ടുണ്ട്.