പൊലീസ് ഉദ്യോ​ഗസ്ഥന്റെ ആത്മഹത്യാ കുറിപ്പിൽ മുതിർന്ന ഉദ്യോഗസ്ഥർക്കെതിരെ ഗുരുതര ആരോപണങ്ങൾ

ചണ്ഡിഗഢ്: ഹരിയാന എഡിജിപി വെടിയേറ്റ് മരിച്ച സംഭവത്തിൽ, അദ്ദേഹം മുതിർന്ന ഉദ്യോഗസ്ഥർക്കെതിരെ ഗുരുതര ആരോപണങ്ങൾ ഉന്നയിച്ചതായി പൊലീസ്. 'മാനസിക പീഡനം' ആരോപിച്ച് അദ്ദേഹം എഴുതിയ എട്ട് പേജുള്ള ആത്മഹത്യാ കുറിപ്പ് പോലീസ് കണ്ടെടുത്തിട്ടുണ്ട്. ചണ്ഡിഗഢിലെ സെക്ടർ 11-ലെ വസതിയിൽ സർവീസ് റിവോൾവർ ഉപയോഗിച്ചാണ് ഹരിയാന കേഡർ ഉദ്യോ​ഗസ്ഥനായ പുരൺ കുമാർ വെടിയേറ്റ് മരിച്ചത്.

സർവീസിലുള്ളവരും വിരമിച്ചവരുമായ 10 മുതിർന്ന ഉദ്യോഗസ്ഥർക്കെതിരെ 'മാനസിക പീഡനം' നടത്തിയതായി ആത്മഹത്യാ കുറിപ്പിൽ ആരോപിക്കുന്നു. ഈ ഉദ്യോഗസ്ഥർ തന്റെ ഔദ്യോഗിക ജീവിതം തകർക്കാൻ ഗൂഢാലോചന നടത്തിയെന്നും അദ്ദേഹം കുറിപ്പിൽ പറയുന്നു. തുടർച്ചയായ മാനസിക പീഡനത്തിന് താൻ ഇരയായി എന്ന് പുരൺ കുമാർ ആവർത്തിച്ചു പറയുന്നുണ്ട്.

സംസ്ഥാന സർക്കാരിന്റെ അനുമതിയില്ലാതെ ഒരു മദ്യ കരാറുകാരന്റെ പരാതിയുടെ അടിസ്ഥാനത്തിൽ ഒരു കൈക്കൂലിക്കേസിൽ തന്റെ പേര് ഉൾപ്പെടുത്തിയതിൽ അദ്ദേഹം വളരെയധികം അസ്വസ്ഥനായിരുന്നുവെന്ന് റിപ്പോർട്ടുകൾ പറയുന്നു.

റോത്തക്കിലെ ഒരു മദ്യ കരാറുകാരൻ നൽകിയ പരാതിയുടെ അടിസ്ഥാനത്തിൽ റോത്തക്ക് പൊലീസ് കഴിഞ്ഞ തിങ്കളാഴ്ച എഫ്‌ഐആർ രജിസ്റ്റർ ചെയ്തിരുന്നു. ഈ കേസിൽ, പുരൺ കുമാറിന്റെ സഹായിയായ സുശീൽ കുമാർ, പുരണിന്റെ പേരിൽ 2.5 ലക്ഷം രൂപ കൈക്കൂലി ആവശ്യപ്പെട്ടു എന്നാണ് ആരോപണം. പൊലീസ് സുശീലിനെ അറസ്റ്റ് ചെയ്തിരുന്നെങ്കിലും, എഫ്‌ഐആറിൽ പുരൺ കുമാറിന്റെ പേരും ഉൾപ്പെട്ടിരുന്നു. എന്നാൽ, ഈ എഫ്‌ഐആർ ഓൺലൈനിൽ പ്രസിദ്ധീകരിച്ചിട്ടില്ല.

നേരത്തെ റോത്തക്ക് റേഞ്ച് ഇൻസ്പെക്ടർ ജനറലായിരുന്ന പുരണിനെ സെപ്റ്റംബർ 29-ന് റോത്തക്കിലെ സുനാരിയയിലുള്ള പൊലീസ് ട്രെയിനിങ് കോളേജിലേക്ക് സ്ഥലം മാറ്റിയിരുന്നു.

ദളിത് വിഭാ​ഗത്തിൽ നിന്നുള്ള പുരൺ കുമാർ, ഉയർന്ന ജാതിയിലുള്ള മേലുദ്യോഗസ്ഥരിൽ നിന്നും പീഡനം നേരിട്ടതായും ആരോപിച്ചിരുന്നു. 2008-ൽ, ഒരു മുതിർന്ന ഐപിഎസ് ഉദ്യോഗസ്ഥനിൽ നിന്നുണ്ടായ ജാതിയധിക്ഷേപവുമായി ബന്ധപ്പെട്ട് ദേശീയ പട്ടികജാതി കമ്മീഷനിൽ പരാതി നൽകിയിരുന്നു. എന്നാൽ മറ്റ് ഉദ്യോഗസ്ഥരുടെ ഇടപെടലിനെ തുടർന്ന് ഈ പ്രശ്നം പിന്നീട് പരിഹരിക്കുകയായിരുന്നു.

കുമാറിന്റെ ആത്മഹത്യ ഒരു അഴിമതി അന്വേഷണവുമായി ബന്ധപ്പെട്ടതാണെന്ന് സൂചനകളുണ്ടെങ്കിലും, ചണ്ഡിഗഢ് പൊലീസ് ഔദ്യോഗികമായി പേരുകൾ പുറത്തുവിട്ടിട്ടില്ല.

നേരത്തെ, ഐപിഎസ് ഉദ്യോഗസ്ഥർക്ക് നൽകിയ സ്ഥാനക്കയറ്റങ്ങളെ ചോദ്യം ചെയ്തുകൊണ്ട് പുരൺ കുമാർ മുഖ്യമന്ത്രി നയാബ് സിംഗ് സൈനിക്ക് കത്തയച്ചിരുന്നു. കേന്ദ്ര ആഭ്യന്തര മന്ത്രാലയത്തിന്റെ മാർഗ്ഗനിർദ്ദേശങ്ങൾ മറികടന്ന്, ധനകാര്യ വകുപ്പിന്റെ മാത്രം സമ്മതത്തോടെയാണ് ഈ സ്ഥാനക്കയറ്റങ്ങൾ അനധികൃതമായി നടത്തിയതെന്നും അദ്ദേഹം ആരോപിച്ചിരുന്നു.

2001 ബാച്ച് ഐപിഎസ് ഉദ്യോഗസ്ഥനായ കുമാർ 2033 മെയ് 31ന് വിരമിക്കാനിരിക്കെയാണ് ഈ ദാരുണമായ സംഭവം.