മഴ പെയ്താൽ തകർന്നുവീഴുന്ന ബാൽക്കണികൾ; ഗ്രേറ്റർ നോയിഡയിൽ ഫ്ലാറ്റുകൾ അപകടാവസ്ഥയിൽ

ഗ്രേറ്റർ നോയിഡ : ഗ്രേറ്റർ നോയിഡയിലെ ജനതാ ഫ്ലാറ്റുകൾ കനത്ത തകർച്ചാഭീതിയിൽ. നിർമിച്ച് 16 വർഷം മാത്രം പിന്നിട്ട ഈ ഗവൺമെന്റ് റെസിഡൻഷ്യൽ കോംപ്ലക്സിൽ താമസിക്കുന്ന നാനൂറിലധികം കുടുംബങ്ങളാണ് നിലവിൽ വലിയ സുരക്ഷാ ഭീഷണി നേരിടുന്നത്. മഴക്കാലമായതോടെ ഫ്ലാറ്റുകളിലെ അവസ്ഥ കൂടുതൽ അപകടകരമായിരിക്കുകയാണ്. ചുവരുകളിൽ നിന്ന് പ്ലാസ്റ്ററുകൾ അടർന്നുവീഴുന്നതും ബാൽക്കണികൾ തകർന്നുവീഴുന്നതും ഇവിടെ പതിവായി മാറിയിരിക്കുന്നു.

കഴിഞ്ഞ വ്യാഴാഴ്ച പെയ്ത കനത്ത മഴയിൽ ബാൽക്കണിയുടെ വലിയൊരു ഭാഗം തകർന്നുവീണ് താഴെ പാർക്ക് ചെയ്തിരുന്ന കാറും ബൈക്കും പൂർണമായും തകർന്നു. മഴക്കാലത്ത് ഫ്ലാറ്റുകളിലെ സാഹചര്യം വളരെ മോശമാകാറുണ്ടെന്നും, ദിവസങ്ങൾക്ക് മുൻപ് സമാനമായ രീതിയിൽ ബാൽക്കണി തകർന്നു വീണ് സമീപത്തുണ്ടായിരുന്ന കുട്ടികൾക്ക് പരിക്കേറ്റതായും പ്രദേശവാസികൾ സാക്ഷ്യപ്പെടുത്തുന്നു.

ഗ്രേറ്റർ നോയിഡ അതോറിറ്റിയുടെ മോശം നിർമാണ നിലവാരവും കൃത്യമായ അറ്റകുറ്റപ്പണികളുടെ കുറവുമാണ് ഫ്ലാറ്റുകളുടെ ഈ അവസ്ഥയ്ക്ക് കാരണമെന്ന് താമസക്കാർ ആരോപിച്ചു. പലതവണ പരാതി നൽകിയിട്ടും അധികൃതരുടെ ഭാഗത്തുനിന്ന് യാതൊരു നടപടിയും ഉണ്ടായില്ല. ഇതിനകം പന്ത്രണ്ടോളം ബാൽക്കണികളാണ് ഇവിടെ തകർന്നുവീണത്. നിലവിൽ വയോധികരും കുട്ടികളും ഉൾപ്പെടെയുള്ള കുടുംബങ്ങൾ എപ്പോൾ വേണമെങ്കിലും കെട്ടിടം തകരാം എന്ന ആശങ്കയിലാണ് ഇവിടെ കഴിയുന്നത്.