ഡൽഹിയിലെ ദാബ്രിയിൽ ആശുപത്രിയിൽ തീപിടിത്തം; രോഗികളെ ഒഴിപ്പിച്ചു

ന്യൂഡൽഹി : തെക്കുപടിഞ്ഞാറൻ ഡൽഹിയിലെ ദാബ്രിയിലുള്ള എഎസ് ആശുപത്രിയിൽ തീപിടിത്തം. ആശുപത്രിയിലെ ഇലക്ട്രിക്കൽ മീറ്ററിലും പാനലിലും തീപിടിത്തമുണ്ടായതിനെത്തുടർന്ന് പത്തിലധികം രോഗികളെ ഒഴിപ്പിച്ചതായി ഡൽഹി പൊലീസ് അറിയിച്ചു. ആർക്കും പരിക്കുകളില്ലെന്നാണ് വിവരം.

ഞായറാഴ്ച രാത്രി 10.25 ഓടെയാണ് ഡാബ്രി-പാലം റോഡിലെ എഎസ് മൾട്ടി കിഡ്നി ഹോസ്പിറ്റലിൽ തീപിടിത്തമുണ്ടായതായി വിവരം ലഭിച്ചതെന്ന് ഡൽഹി ഫയർ സർവീസ് (ഡിഎഫ്എസ്) പറഞ്ഞു. മൂന്ന് ഫയർ ടെൻഡറുകൾ സ്ഥലത്തെത്തി അരമണിക്കൂറിനുള്ളിൽ തീ നിയന്ത്രണവിധേയമാക്കിയതായി ഡിഎഫ്എസ് ഉദ്യോഗസ്ഥൻ പറഞ്ഞു. തീപിടിത്തമുണ്ടായ ഉടൻ തന്നെ രോ​ഗികളെ ഒഴിപ്പിച്ചു.

പ്രാഥമിക അന്വേഷണത്തിൽ ഷോർട്ട് സർക്യൂട്ടാണ് തീപിടുത്തത്തിന് കാരണമെന്ന് സൂചന ലഭിച്ചതായി പൊലീസ് പറഞ്ഞു. സംഭവം നടക്കുമ്പോൾ ആശുപത്രിക്കുള്ളിൽ 15 ലധികം രോഗികൾ ഉണ്ടായിരുന്നു. എല്ലാ രോഗികളെയും ഉടൻ തന്നെ ഒഴിപ്പിച്ചതിനാൽ അപകടം ഒഴിവായി.