അഹമ്മദാബാദില്‍ പടക്കനിർമ്മാണശാലയിൽ സ്ഫോടനം; എട്ട് മരണം, രക്ഷാപ്രവർത്തനം തുടരുന്നു

അഹമ്മദാബാദ് : അഹമ്മദാബാദിലെ പടക്കനിർമ്മാണശാലയിൽ സ്ഫോടനത്തെ തുടർന്നുണ്ടായ തീപിടിത്തത്തിൽ എട്ട് പേർ മരിച്ചു. അഹമ്മദാബാദിലെ റാമോൽ ​ഗാത്രഡ് റോഡിന് സമീപത്തുള്ള പടക്കനിർമ്മാണശാലയിലാണ് സ്ഫോടനമുണ്ടായതെന്ന് ദി ന്യൂ ഇന്ത്യൻ എക്സ്പ്രസ് റിപ്പോർട്ട് ചെയ്തു.

അപകടത്തിൽ അഞ്ച് പേർക്ക് പരിക്കേറ്റു. പരിക്കേറ്റവരെ എൽ ജി ആശുപത്രിയിൽ പ്രവേശിപ്പിച്ചിരിക്കുകയാണ്. രക്ഷാപ്രവർത്തനം തുടരുകയാണ്. മരണസംഖ്യ ഇനിയും ഉയരാനാണ് സാധ്യതയെന്നാണ് റിപ്പോർട്ടുകൾ സൂചിപ്പിക്കുന്നത്. തീ അണക്കുന്നതിനായി അ​ഗ്നിശമന യൂണിറ്റുകൾ സ്ഥലത്തെത്തിയിട്ടുണ്ട്. ഫാക്ടറിക്കുള്ളിൽ ആരെങ്കിലും കുടുങ്ങിക്കിടക്കുന്നുണ്ടോയെന്നും പരിശോധിക്കുകയാണ്. അതേസമയം, അപകടമുണ്ടായതിന്റെ കാരണം വ്യക്തമല്ല.