ആധാർ ഉണ്ടായാലും വോട്ട് ഉറപ്പില്ല ; സുപ്രീംകോടതിയെ വെല്ലുവിളിച്ച്‌ തെരഞ്ഞെടുപ്പ്‌ കമീഷൻ

ന്യൂഡൽഹി

വോട്ടർപ്പട്ടികയുടെ പ്രത്യേക തീവ്ര പുനഃപരിശോധന (എസ്‌ഐആർ) നടപ്പാക്കുന്പോൾ ആധാർ കാർഡ്‌ പന്ത്രണ്ടാമത്തെ രേഖയായി പരിഗണിക്കണമെന്ന സുപ്രീംകോടതി നിർദേശം വെല്ലുവിളിച്ച്‌ മുഖ്യ തെരഞ്ഞെടുപ്പ്‌ കമീഷണർ. ആധാർ പ‍ൗരത്വം തെളിയിക്കാനോ വാസസ്ഥാനം തെളിയിക്കാനോ ജനനത്തീയതി തെളിയിക്കാനോ മതിയായ രേഖയല്ലെന്നും വോട്ടിനുള്ള യോഗ്യത തെളിയിക്കാൻ മറ്റ്‌ രേഖകൾ ആവശ്യമാണെന്നും മുഖ്യ തെരഞ്ഞെടുപ്പ്‌ കമീഷണർ ഗ്യാനേഷ്‌കുമാർ പട്‌നയിൽ വാർത്താസമ്മേളനത്തിൽ പ്രഖ്യാപിച്ചു.

ബിഹാർ മാതൃകയിൽ രാജ്യവ്യാപകമായി എസ്‌ഐആർ നടപ്പാക്കുന്പോൾ ആധാർ കാർഡ്‌ മതിയായ രേഖയായി പരിഗണിക്കുമോയെന്ന ചോദ്യത്തിനുള്ള മറുപടിയായാണ്‌ ഇക്കാര്യം പറഞ്ഞത്‌.

കേന്ദ്ര ബിജെപി സർക്കാരിന്റെ തീട്ടൂരത്തിന്‌ വഴങ്ങി പ‍ൗരത്വ രജിസ്റ്റർ ഒളിച്ചുകടത്താനും ദളിതരെയും ന്യൂനപക്ഷങ്ങളെയും കൂട്ടമായി ഒഴിവാക്കാനുമുള്ള നീക്കമാണ്‌ കമീഷൻ നടത്തുന്നതെന്ന വിമർശം ശക്തമായിരിക്കെയാണ്‌ പുതിയ വിവാദ പ്രതികരണം. ജനാധിപത്യവിരുദ്ധമായ രീതിയിൽ എസ്‌ഐആർ നടപ്പാക്കുന്നതിലൂടെ ബിഹാറിൽ ലക്ഷക്കണക്കിന്‌ വോട്ടർമാരുടെ വോട്ടവകാശം ഹനിക്കപ്പെടുന്നുവെന്ന്‌ ചൂണ്ടിക്കാട്ടിയുള്ള നിരവധി ഹർജികൾ പരിഗണിച്ച്‌ സുപ്രീംകോടതി സെപ്‌തംബർ എട്ടിനാണ്‌ ആധാറിനെ പന്ത്രണ്ടാം രേഖയായി പരിഗണിക്കണമെന്ന്‌ തെരഞ്ഞെടുപ്പ്‌ കമീഷന്‌ കർശനനിർദേശം നൽകിയത്‌.

എന്നാൽ, പരമോന്നത കോടതിയുടെ നിർദേശം അംഗീകരിക്കാൻ കഴിയില്ലെന്ന പ്രഖ്യാപനമാണ്‌ തെരഞ്ഞെടുപ്പ്‌ കമീഷണറുടേത്‌.

‘ആധാർ പന്ത്രണ്ടാമത്തെ രേഖയാക്കണമെന്ന്‌ സുപ്രീംകോടതി നിർദേശിച്ചിട്ടുണ്ട്‌. അതനുസരിച്ച്‌ ഇപ്പോൾ ആധാർ സ്വീകരിക്കുന്നുണ്ട്‌. എന്നാൽ, ഭരണഘടനയിലെ 326–ാം അനുച്ഛേദത്തിൽ വോട്ടർമാർക്കുള്ള യോഗ്യത എന്തെല്ലാമാണെന്ന്‌ വ്യക്തമായി പരാമർശിച്ചിട്ടുണ്ട്‌. ഇന്ത്യൻ പ‍ൗരനാകണം, 18 വയസ്സിന്‌ മുകളിൽ പ്രായമുണ്ടാകണം, പോളിങ് ബൂത്തിന്‌ അടുത്ത്‌ താമസിക്കുന്നയാളാകണം. ഇ‍ത്‌ മൂന്നും സ്ഥാപിക്കാൻ ആധാർ മതിയായ രേഖയല്ല. സുപ്രീംകോടതിയുടെ മുൻ ഉത്തരവുകളിലും ആധാർ നിയമത്തിലെ ഒന്പതാം വകുപ്പിലും ഇക്കാര്യം പറഞ്ഞിട്ടുണ്ട്‌’ –ഗ്യാനേഷ്‌കുമാർ പറഞ്ഞു.

സുപ്രീംകോടതി നിർദേശമുണ്ടായിട്ടും ബിഹാറിൽ വോട്ടർപ്പട്ടികയിൽ പേര്‌ ചേർക്കാൻ തെരഞ്ഞെടുപ്പ്‌ കമീഷൻ ആധാർ സ്വീകരിക്കുന്നില്ലെന്ന്‌ ആർജെഡി ഉൾപ്പടെയുള്ള പാർടികൾ ആരോപിച്ചിരുന്നു. വോട്ടിനെയും പ‍ൗരത്വത്തെയും കൂട്ടിക്കെട്ടാനുള്ള കമീഷന്റെ നീക്കങ്ങളെ നേരത്തെ സുപ്രീംകോടതി ചോദ്യംചെയ്‌തിരുന്നു. ‘പ‍ൗരത്വം നിങ്ങളുടെ അധികാരപരിധിയിൽ വരുന്ന കാര്യമല്ലല്ലോ. ആഭ്യന്തരമന്ത്രാലയത്തിന്റെ പരിധിയിൽ വരുന്ന വിഷയമല്ലേ’ എന്നായിരുന്നു കോടതിയുടെ ചോദ്യം.