print edition ജൻസുരാജ്‌ പാർടി അനുഭാവിയെ വെടിവച്ചുകൊന്നു
പട്‌ന
ഒന്നാംഘട്ട തെരഞ്ഞെടുപ്പിന്‌ ദിവസങ്ങൾ ശേഷിക്കേ ബിഹാറിൽ ക്രമസമാധനപ്രശ്‌നങ്ങൾ അതിരൂക്ഷം. പ്രശാന്ത്‌ കിഷോറിന്റെ ജൻസുരാജ്‌ പാർടി അനുഭാവി ദുലാർചന്ദ് യാദവിനെ വ്യാഴാഴ്ച വെടിവച്ചുകൊന്നു. മൊകാമാ നിയോജകമണ്ഡലത്തിലെ താർതാർ ഗ്രാമത്തില്‍ പട്ടാപ്പകലുണ്ടായ ആക്രമത്തില്‍ നിരവധി പേർക്ക്‌ പരിക്കേറ്റു. ജെഡിയു സ്ഥാനാർഥി ആനന്ത്സിങ്ങിന്റെ അനുയായികളാണ് ആക്രമണത്തിന് പിന്നിലെന്ന് ജൻസുരാജ്‌ പാർടി സ്ഥാനാർഥി പ്രിയദർശിനി പിയൂഷ്‌ പറഞ്ഞു.
നിതീഷ്‌കുമാർ, ലാലു പ്രസാദ്‌ യാദവ്‌ തുടങ്ങി ബിഹാറിലെ പ്രധാന നേതാക്കളുമായി അടുത്തബന്ധം പുലർത്തുന്ന ആളാണ്‌ കൊല്ലപ്പെട്ടത്. ഇദ്ദേഹത്തിന്റെ അനന്തരവനാണ്‌ ഇക്കുറി മൊകാമയിൽ നിന്നുള്ള ജൻസുരാജ്‌ സ്ഥാനാർഥി പ്രിയദർശിനി പിയൂഷ്‌. വ്യാഴാഴ്ച തെരഞ്ഞെടുപ്പ്‌ പ്രചരണം കഴിഞ്ഞ്‌ മടങ്ങിയ പ്രിയദർശിനി പിയൂഷിന്റെ വാഹനവ്യൂഹത്തെ ആനന്ത്സിങ്ങിന്റെ വാഹനവ്യ‍ൂഹം കുറുകേ നിർത്തി തടഞ്ഞു.
വാക്കുത്തർക്കം വെടിവെപ്പില്‍ കലാശിക്കുകയായിരുന്നു. ആനന്ത്‌സിങ്ങിനെ പ്രതിയാക്കി കേസെടുത്തു. കൊല്ലപ്പെട്ട ദുലാർചന്ദ് നിരവധി കേസില്‍ പ്രതിയാണ്.
അതേസമയം, ബിഹാറിലെ സിവാനിൽ എഎസ്‌ഐയെ കഴുത്ത്‌ മുറിച്ച്‌ കൊല്ലപ്പെട്ട നിലയിൽ കണ്ടെത്തി. ദര‍ൗന്ദാ സ്‌റ്റേഷനിലെ അനിരുദ്ധ്‌കുമാറിനെയാണ്‌ കൊല്ലപ്പെട്ട നിലയിൽ കണ്ടെത്തിയത്‌.
Related News
Dont Miss it
0 comments