ക്ലാസ് മുറിയിൽ ചാണകം തേച്ച് ഡിയു കോളേജ് പ്രിൻസിപ്പൽ: ​ഗവേഷണത്തിനെന്ന് വാദം

ന്യൂഡൽഹി : ക്ലാസ് മുറിയുടെ ചുമരിൽ മുഴുവൻ ചാണകം മെഴുകി കോളേജ് പ്രിൻസിപ്പൽ. ഡൽഹി യൂണിവേഴ്സിറ്റിക്ക് കീഴിലുള്ള ലക്ഷ്മിബായ് കോളേജ് പ്രിൻസിപ്പലായ പ്രത്യുഷ് വത്സലയാണ് ക്ലാസ് മുറി മുഴുവൻ ചാണകം മെഴുകിയത്. പുതിയ ​ഗവേഷണത്തിന്റെ ഭാ​ഗമായാണ് ഇതെന്നും ചൂടിനെ പ്രതിരോധിക്കാനാണെന്നുമാണ് അധ്യാപികയുടെ വാദം.

സംഭവത്തിന്റെ വീഡിയോ അധ്യാപിക തന്നെ സമൂഹമാധ്യമങ്ങളി‍ൽ പങ്കുവച്ചു. കസേരയിൽ കയറി നിന്നുകൊണ്ട് ഭിത്തി മുഴുവൻ ചാണകം തേക്കുന്ന അധ്യാപികയേയും സഹായിക്കുന്ന സ്റ്റാഫുകളെയും ചിത്രത്തിൽ കാണാം. പരമ്പരാ​ഗത ഇന്ത്യൻ രീതികളിലൂടെ ചൂടിനെ പ്രതിരോധിക്കാനുള്ള ​ഗവേഷണത്തിന്റെ ഭാ​ഗമാണ് നടപടിയെന്ന് പ്രിൻസിപ്പൽ പറയുന്നു. ഒരാഴ്ചയ്ക്കുള്ളിൽ ​ഗവേഷണത്തിന്റെ പൂർണവിവരങ്ങൾ‌ പുറത്തുവിടുമെന്നും അധ്യാപിക വാദിക്കുന്നു. അധ്യാപികയുടെ പ്രവർത്തിക്കെതിരെ മറ്റ് ഫാക്കൽറ്റികളിൽ നിന്നു തന്നെ വിമർശനം ഉയരുന്നുണ്ട്.