ലൈംഗിക വിദ്യാഭ്യാസം പാഠ്യപദ്ധതിയുടെ ഭാഗമാക്കണം; നല്ലതും മോശവുമായ സ്പർശനങ്ങളെ കുട്ടികൾ അറിഞ്ഞിരിക്കണം: സുപ്രീം കോടതി

ന്യൂഡൽഹി: ഡിജിറ്റൽ സുരക്ഷയെക്കുറിച്ചുള്ള അവബോധവും ലൈംഗിക വിദ്യാഭ്യാസവും ഒരൊറ്റ വിഷയമായി കണക്കാക്കണമെന്ന് സുപ്രീം കോടതി. കുട്ടികൾക്കെതിരായ ലൈംഗിക ചൂഷണവും അതിക്രമങ്ങളും അടങ്ങുന്ന ദൃശ്യങ്ങൾക്കെതിരെ നിർദേശിച്ചിട്ടുള്ള സുരക്ഷാ മുൻകരുതലുകളെ കുറിച്ച്, സംരക്ഷിക്കപ്പെടേണ്ട കുട്ടികൾക്ക് അവബോധമില്ലെങ്കിൽ ഫലപ്രദമാകില്ലെന്ന് കോടതി നിരീക്ഷിച്ചു.

ഡിജിറ്റൽ സുരക്ഷയും പ്രായത്തിനനുയോജ്യമായ ലൈംഗിക വിദ്യാഭ്യാസവും പ്രാഥമിക തലം മുതൽ പാഠ്യപദ്ധതിയുടെ ഭാഗമാക്കണമെന്ന് കോടതി നിർദേശിച്ചു. കേന്ദ്ര-സംസ്ഥാന സർക്കാരുകൾ, ബാലാവകാശ കമ്മീഷനുകൾ, വിദ്യാഭ്യാസ സ്ഥാപനങ്ങൾ, മാധ്യമങ്ങൾ എന്നിവർ നടപ്പിലാക്കേണ്ട 16 സുപ്രധാന മാർ​ഗനിർദേശങ്ങളും കോടതി പുറപ്പെടുവിച്ചു.

കോടതിയുടെ പ്രധാന നിർദേശങ്ങൾ

കുട്ടികളെ അവരുടെ ശരീരത്തെക്കുറിച്ചും, നല്ലതും മോശവുമായ സ്പർശനങ്ങൾ തമ്മിലുള്ള വ്യത്യാസത്തെക്കുറിച്ചും, സമ്മതത്തിന്റെ പ്രാധാന്യത്തെക്കുറിച്ചും പ്രായത്തിനനുയോജ്യമായ രീതിയിൽ പഠിപ്പിക്കണം.

പരസ്പരം ബഹുമാനിക്കാനും ആരോഗ്യമുള്ള സൗഹൃദങ്ങൾ നിലനിർത്താനും കുട്ടികളെ പഠിപ്പിക്കണം.

കുട്ടികൾ തന്നെ സ്വന്തം കൂട്ടുകാരുടെ സ്വകാര്യ ചിത്രങ്ങൾ പകർത്തുകയോ പ്രചരിപ്പിക്കുകയോ ചെയ്യുന്ന സംഭവങ്ങൾ ഉണ്ടാകാറുണ്ട്. ഇതിന്റെ ഗൗരവം മനസ്സിലാക്കി ഇത്തരത്തിലുള്ള തെറ്റായ പെരുമാറ്റങ്ങളിൽ നിന്ന് അവരെ പിന്തിരിപ്പിക്കണം.

സ്വകാര്യ വിവരങ്ങളുടെ സുരക്ഷ, ഡിജിറ്റൽ ലോകത്തെ വഞ്ചനകൾ, ബ്ലാക്ക്‌മെയിലിംഗ് , ചൂഷണങ്ങൾ എന്നിവ തിരിച്ചറിയാനുള്ള വഴികൾ കുട്ടികളെ പഠിപ്പിക്കണം.

ഏതെങ്കിലും തരത്തിലുള്ള തെറ്റായ അനുഭവമുണ്ടായാൽ സ്കൂളിലോ വീട്ടിലോ ഉള്ള വിശ്വസ്തരായ മുതിർന്നവരെയോ ബന്ധപ്പെട്ട ഔദ്യോഗിക സംവിധാനങ്ങളെയോ എങ്ങനെ സമീപിക്കണമെന്ന് കുട്ടികൾക്ക് അറിവുണ്ടായിരിക്കണം.

ഭയമില്ലാതെ ഇത്തരം സംഭവങ്ങൾ റിപ്പോർട്ട് ചെയ്യാൻ കുട്ടികളെ പ്രോത്സാഹിപ്പിക്കണം. വിവരങ്ങൾ പൂർണമായും രഹസ്യമായി സൂക്ഷിക്കുമെന്നും അവർക്ക് ആവശ്യമായ പിന്തുണ നൽകുമെന്നും ഉറപ്പുനൽകണം.

പോക്സോ നിയമം, ഐ ടി നിയമം എന്നിവയിലെ വ്യവസ്ഥകളെക്കുറിച്ചും, ലൈംഗിക അതിക്രമ ദൃശ്യങ്ങൾ കാണുന്നതും സൂക്ഷിക്കുന്നതും പ്രചരിപ്പിക്കുന്നതും കുറ്റകരമാണെന്നതിനെക്കുറിച്ചും കുട്ടികളെ ബോധവാന്മാരാക്കണം.

എൻസിഇആർടി, എസ്‍സിഇആർടി എന്നിവ ചൈൽഡ് സൈക്കോളജിസ്റ്റുകൾ, അധ്യാപകർ, രക്ഷാകർതൃ വിദഗ്ധർ എന്നിവരുമായി ആലോചിച്ച് ടെക്സ്റ്റ്, ചിത്രങ്ങൾ, ഓഡിയോ-വീഡിയോ സംവിധാനങ്ങൾ എന്നിവ ഉപയോഗിച്ച് പാഠഭാഗങ്ങൾ തയ്യാറാക്കണം.

ചൈൽഡ് ഹെൽപ്പ് ലൈൻ (1098), സൈബർ ക്രൈം ഹെൽപ്പ് ലൈൻ (1930), നാഷണൽ സൈബർ ക്രൈം റിപ്പോർട്ടിംഗ് പോർട്ടൽ വിവരങ്ങൾ എന്നിവ എല്ലാ ക്ലാസ് മുറികളിലും ഹോസ്റ്റലുകളിലും ലൈബ്രറികളിലും കമ്പ്യൂട്ടർ ലാബുകളിലും സ്കൂൾ വെബ്‌സൈറ്റുകളിലും പ്രദർശിപ്പിക്കണം.

സ്കൂളുകളിലെയും വിദ്യാഭ്യാസ സ്ഥാപനങ്ങളിലെയും ഡിജിറ്റൽ ഉപകരണങ്ങളിലും നെറ്റ്‌വർക്കുകളിലും ഹാനികരമായ ഉള്ളടക്കങ്ങൾ തടയുന്നതിനുള്ള ഫിൽട്ടറുകൾ സ്ഥാപിക്കണം. ഹോസ്റ്റലുകൾ, ട്യൂഷൻ/കോച്ചിംഗ് സെന്ററുകൾ, ചൈൽഡ് കെയർ സ്ഥാപനങ്ങൾ എന്നിവിടങ്ങളിൽ ഇത് കർശനമായി നടപ്പിലാക്കണം.

ഡിജിറ്റൽ സുരക്ഷ, ഗ്രൂമിംഗ് അടയാളങ്ങൾ തിരിച്ചറിയൽ, പോക്സോ നിയമത്തിലെ സെക്ഷൻ 19, 21 പ്രകാരമുള്ള നിർബന്ധിത റിപ്പോർട്ടിംഗ് ചുമതലകൾ, രഹസ്യാത്മകത പരിപാലിക്കൽ എന്നിവയിൽ അധ്യാപകർക്കും ഇതര ജീവനക്കാർക്കും പരിശീലനം നൽകണം.

കുട്ടികൾ അഭിമുഖീകരിക്കുന്ന ഓൺലൈൻ അപകടസാധ്യതകൾ, ഉപകരണങ്ങളിലെ പാരന്റൽ കൺട്രോൾ സംവിധാനങ്ങൾ, കുട്ടികളിലെ മാനസിക സമ്മർദത്തിന്റെ ലക്ഷണങ്ങൾ എന്നിവയെക്കുറിച്ച് രക്ഷിതാക്കൾക്ക് പതിവായി പരിശീലനം നൽകണം.

കുട്ടികളുടെ ഓൺലൈൻ പ്രവർത്തനങ്ങൾ നിരീക്ഷിക്കുമ്പോൾ അവരുമായുള്ള പരസ്പര വിശ്വാസവും ആശയവിനിമയവും നഷ്ടപ്പെടാത്ത രീതിയിൽ പെരുമാറാൻ രക്ഷിതാക്കളെ ബോധവൽക്കരിക്കണം.

പോക്സോ നിയമത്തെക്കുറിച്ചും ഡിജിറ്റൽ അതിക്രമങ്ങളെക്കുറിച്ചും മാധ്യമങ്ങൾ, സോഷ്യൽ മീഡിയ, ടിവി, എസ്എംഎസ്, ഒടിടി പ്ലാറ്റ്‌ഫോമുകൾ എന്നിവ വഴി സർക്കാരുകളും ശിശു അവകാശ കമ്മീഷനുകളും തുടർച്ചയായ പ്രചരണം നടത്തണം.

അപകടകരമായ സാഹചര്യങ്ങളിൽ എങ്ങനെ പ്രതികരിക്കണം എന്നതിനെക്കുറിച്ച് അധ്യാപകർ, രക്ഷിതാക്കൾ, മറ്റ് സംരക്ഷകർ എന്നിവർക്ക് ആവശ്യമായ മാർഗ്ഗനിർദ്ദേശങ്ങൾ നൽകണം.

കുട്ടികൾ അന്യരായ മുതിർന്നവരുമായി ബന്ധപ്പെടാൻ ശ്രമിക്കുമ്പോഴും, പോക്സോ സംബന്ധമായ തിരച്ചിലുകൾ നടത്തുമ്പോഴും മുന്നറിയിപ്പുകൾ നൽകുന്ന തരത്തിൽ ഡിജിറ്റൽ പ്ലാറ്റ്‌ഫോമുകളിൽ സുരക്ഷാ സംവിധാനങ്ങൾ ഏർപ്പെടുത്തണം.

ഇരയാകുന്ന കുട്ടികൾക്ക് ആവശ്യമായത്ര കാലം സൗജന്യ മാനസികാരോഗ്യ പിന്തുണ, കൗൺസിലിംഗ്, തെറാപ്പി എന്നിവ ഉറപ്പാക്കാൻ സൗജന്യ പിന്തുണാ സംവിധാനങ്ങൾ സർക്കാരുകൾ ഒരുക്കണം.

"ഡിജിറ്റൽ സുരക്ഷയും ലൈംഗിക വിദ്യാഭ്യാസവും രണ്ട് വേറിട്ട വിഷയങ്ങളല്ല, മറിച്ച് ഒരേ നാണയത്തിന്റെ രണ്ടു വശങ്ങളാണ്. കുട്ടികൾ ചെറുപ്പത്തിൽത്തന്നെ ആരെയാണ് കാണേണ്ടതെന്നും സംസാരിക്കേണ്ടതെന്നും തിരിച്ചറിയണം. അനുചിതമായ അഭ്യർഥനകളെയും പെരുമാറ്റങ്ങളെയും തിരിച്ചറിയാനും, സ്വന്തം അന്തസ്സും മറ്റുള്ളവരുടെ അന്തസ്സും സംരക്ഷിക്കാനും, ഏതെങ്കിലും അനിഷ്ട സംഭവം ഉണ്ടായാൽ ആരെയാണ് സമീപിക്കേണ്ടതെന്നും അവർ അറിഞ്ഞിരിക്കണം. ഓൺലൈനിലും ഓഫ്‌ലൈനിലും കുട്ടികളുടെ സുരക്ഷയ്ക്ക് ഇത് അത്യാവശ്യമാണ്," എന്ന് ജസ്റ്റിസ് ജെ ബി. പർദിവാല, ജസ്റ്റിസ് കെ വിനോദ് ചന്ദ്രൻ എന്നിവരടങ്ങിയ ബെഞ്ച് നിരീക്ഷിച്ചു.