വടക്കേ ഇന്ത്യയിൽ മൂടൽമഞ്ഞ് വ്യാപകം; ഡൽഹിയിൽ റെഡ് അലർട്ട്

ന്യൂഡൽഹി : വടക്കേ ഇന്ത്യയിൽ മൂടൽ‌മഞ്ഞ് വ്യാപകം. പഞ്ചാബ് മുതൽ ബീഹാർ വരെ വ്യാപിച്ചുകിടക്കുന്ന കട്ടിയുള്ള മൂടൽമഞ്ഞ് ദൃശ്യപരത കുറച്ചതിനെ തുടർന്ന് കാലാവസ്ഥാ വകുപ്പ് (ഐഎംഡി) ഡൽഹിയിൽ റെഡ് അലേർട്ട് പ്രഖ്യാപിച്ചു. റോഡ്, റെയിൽ, വ്യോമ ഗതാഗതത്തെ ബാധിച്ചേക്കാമെന്ന് മുന്നറിയിപ്പ് നൽകുകയും ചെയ്തു.

പഞ്ചാബ്, ഹരിയാന, ഡൽഹി, ഉത്തർപ്രദേശ്, വടക്കുകിഴക്കൻ മധ്യപ്രദേശ്, ബീഹാർ എന്നിവിടങ്ങളിൽ മൂടൽമഞ്ഞ് നിറഞ്ഞതായി ഉപഗ്രഹ ചിത്രങ്ങൾ വ്യക്തമാക്കുന്നതായി ഐഎംഡി ഉദ്യോഗസ്ഥർ പറഞ്ഞു. ഉത്തർപ്രദേശിലെ ആഗ്ര, ബറേലി, സഹരൻപൂർ, ഗോരഖ്പൂർ എന്നിവിടങ്ങളിൽ പഞ്ചാബിലെ അംബാല, അമൃത്സർ, ബതിൻഡ, ലുധിയാന, ആദംപൂർ; ഡൽഹിയിൽ സഫ്ദർജംഗ്; ഹരിയാനയിലെ അംബാല; മധ്യപ്രദേശിലെ ഗ്വാളിയോർ; ബിഹാറിലെ ഭഗൽപൂർ; ജാർഖണ്ഡിലെ ദൽതോൻഗഞ്ച് എന്നിവിടങ്ങളിൽ പുലർച്ചെ 5.30ന് ദൃശ്യപരത പൂജ്യം മീറ്ററിൽ രേഖപ്പെടുത്തി.

ഡൽഹിയിൽ ഐഎംഡി റെഡ് അലർട്ട് പ്രഖ്യാപിച്ചു. മൂടൽമഞ്ഞ് ചില വിമാനത്താവളങ്ങളുടെ പ്രവർത്തനങ്ങളെ തടസപ്പെടുത്തുമെന്നും ഹൈവേകളെയും റെയിൽവേ റൂട്ടുകളെയും ബാധിക്കുമെന്നും ഐഎംഡി മുന്നറിയിപ്പ് നൽകി.

ഉത്തർപ്രദേശിലെ ആഗ്ര, അലിഗഡ്, ബാഗ്പത്, ബറേലി, ബിജ്‌നോർ, ബുലന്ദ്ഷഹർ, ഇറ്റാഹ്, ഇറ്റാവ, ഫിറോസാബാദ്, ഗൗതം ബുദ്ധ നഗർ, ഗാസിയാബാദ്, ഹാപൂർ, ഹത്രാസ്, മഥുര, മീററ്റ്, മൊറാദാബാദ്, മുസാഫർനഗർ, പിലിബ്ഹിത്തൻപൂർ, പിലിബ്ഹിത്തൻപൂർ എന്നിവിടങ്ങളിലും ഉത്തരാഖണ്ഡിലെ ഹരിദ്വാർ, ഉദംസിംഗ് നഗർ, പഞ്ചാബിലെ അമൃത്സർ, ഫത്തേഗഡ് സാഹിബ്, ഗുരുദാസ്പൂർ, പട്യാല, സംഗ്രൂർ എന്നിവിടങ്ങളിൽ ഓറഞ്ച് അലർട്ട് പ്രഖ്യാപിച്ചു. ദൃശ്യപരത കുറവായതിനാൽ വാഹനമോടിക്കുന്നവർ ശ്രദ്ധിക്കണമെന്നും റോഡപകട സാധ്യത കൂടുതലാണെന്നും ഐഎംഡി മുന്നറിയിപ്പ് നൽകി. വൈദ്യുതി ലൈനുകൾ പൊട്ടാൻ സാധ്യതയുണ്ടെന്നും ഐഎംഡി മുന്നറിയിപ്പ് നൽകി.

"ബാധിത പ്രദേശങ്ങളിലെ താമസക്കാർ ജാഗ്രത പാലിക്കാനും ആവശ്യമായ മുൻകരുതലുകൾ എടുക്കാനും ഐഎംഡി നിർദ്ദേശിച്ചു. വാഹനമോടിക്കുമ്പോഴോ മറ്റേതെങ്കിലും ഗതാഗത മാർഗത്തിലൂടെ സഞ്ചരിക്കുമ്പോഴോ ജാഗ്രത പാലിക്കുക, ഫോഗ് ലൈറ്റുകൾ ഉപയോഗിക്കുക, റോഡ്- ഗതാഗത സാഹചര്യങ്ങൾ പരിശോധിക്കുക, യാത്രാ ഷെഡ്യൂളുകൾക്കായി എയർലൈനുകൾ, റെയിൽവേ, സംസ്ഥാന ഗതാഗത അധികാരികളുമായി സമ്പർക്കം പുലർത്തുക, അനാവശ്യ യാത്രകൾ ഒഴിവാക്കുക, ബന്ധപ്പെട്ട ഏജൻസികൾ നൽകുന്ന ഉപദേശങ്ങൾ പാലിക്കുക എന്നീ നിർദേശങ്ങളും ഐഎംഡി പുറപ്പെടുവിച്ചു.