ഡൽഹിയിൽ വായു മലിനീകരണം രൂക്ഷം; എക്യുഐ 300 രേഖപ്പെടുത്തി

ന്യൂഡൽഹി: രാജ്യതലസ്ഥാനത്ത് വായു മലിനീകരണം രൂക്ഷമാകുന്നു. വായു ​ഗുണനിലവാര സൂചികയിൽ ഇന്ന് അഞ്ചിടങ്ങളിൽ എക്യുഐ (എയർ ക്വാളിറ്റി ഇൻഡക്സ്) 300 ആണ് രേഖപ്പെടുത്തിയത്. 'വളരെ മോശം' (very poor) വിഭാഗത്തിലാണ് ഇന്ന് ഡൽഹിയിലെ വായു ഗുണനിലവാരം. വായു ​ഗുണനിലവാരം പരിശോധിക്കുന്ന നാൽപ്പത് സ്റ്റേഷനുകളാണ് ഡൽഹിയിലുള്ളത്. ഇതിൽ അഞ്ചിടത്താണ് എക്യുഐ 300 രേഖപ്പെടുത്തിയത്. ആനന്ദ് വിഹാറിലാണ് 345 എന്ന ഉയർന്ന വായു ഗുണനിലവാര സൂചിക രേഖപ്പെടുത്തിയത്. തുടർന്ന് ഡിയു നോർത്ത് കാമ്പസ് (307), സിആർആർഐ മഥുര റോഡ് (307), ദ്വാരക സെക്ടർ 8 (314), വസീർപൂർ (325) എന്നിവിടങ്ങളിലും സൂചിക 300 കടന്നു. ഇരുപത് സ്റ്റേഷനുകളിലെ എക്യുഐ 'മോശം' വിഭാഗത്തിലാണ്. 13 സ്റ്റേഷനുകൾ 'മിതമായ' ശ്രേണിയിൽ ഉൾപ്പെട്ടു.

ചൊവ്വാഴ്ച ഡൽഹിയുടെ വായു ഗുണനിലവാര സൂചിക (AQI) 201 ൽ എത്തി 'മോശം' വിഭാഗത്തിൽ രേഖപ്പെടുത്തിയിരുന്നു. ഗതാഗതത്തിൽ നിന്നാണ് മലിനീകരണത്തിന്റെ തോത് വർധിക്കുന്നതെന്ന് ഡിസിഷൻ സപ്പോർട്ട് സിസ്റ്റത്തിന്റെ (DSS) ഡാറ്റ വ്യക്തമാക്കുന്നു.

കേന്ദ്ര മലിനീകരണ നിയന്ത്രണ ബോർഡിന്റെ കണക്കനുസരിച്ച്, പൂജ്യത്തിനും 50 നും ഇടയിലുള്ള എക്യുഐ 'നല്ലത്' എന്നും, 51 നും 100 നും ഇടയിലുള്ളത് 'തൃപ്തികരം' എന്നും, 101 നും 200 നും 'മിതമായത്' എന്നും, 201 നും 300 നും 'മോശം' എന്നും, 301 നും 400 നും 'വളരെ മോശം' എന്നും, 401 നും 500 നും 'ഗുരുതരം' എന്നും കണക്കാക്കപ്പെടുന്നു. ബുധനാഴ്ച തലസ്ഥാനത്തെ ഏറ്റവും കുറഞ്ഞ താപനില 18.3 ഡിഗ്രി സെൽഷ്യസായിരുന്നു. ഇത് സാധാരണയേക്കാൾ 1.3 ഡിഗ്രി കുറവാണെന്ന് കാലാവസ്ഥാ വകുപ്പ് (ഐഎംഡി) അറിയിച്ചു.

വായു മലിനീകരണം വീണ്ടും രൂക്ഷമായതോടെ നിയന്ത്രണങ്ങൾ ഏർപ്പെടുത്താൻ തീരുമാനമാനിച്ചതായി കമീഷൻ ഫോർ എയർ ക്വാളിറ്റി മാനേജ്‌മെന്റ് (സിഎക്യുഎം) അറിയിച്ചു. എൻസിആർ മേഖലയിലുടനീളം ഗ്രേഡഡ് റെസ്‌പോൺസ് ആക്ഷൻ പ്ലാനിന്റെ (ജിആർഎപി) സ്റ്റേജ് 1 പ്രകാരമുള്ള നിയന്ത്രണങ്ങൾ പ്രാബല്യത്തിൽ വരും. വായു ​ഗുണനിലവാരം മോശം അവസ്ഥയിലെത്തിയതോടെ കുട്ടികൾ, പ്രായമായവർ, ശ്വസന പ്രശ്നങ്ങൾ ഉള്ളവർ എന്നിവർക്ക് ആരോഗ്യപരമായ അസ്വസ്ഥതകൾ ഉണ്ടായേക്കാം.