print edition ഡൽഹി വായു മലിനീകരണം ; പ്രതിഷേധങ്ങള്‍ അടിച്ചമർത്തി ബിജെപി സർക്കാർ

ന്യൂഡൽഹി

വായു മലിനീകരണം അസഹ്യമായതോടെ ഡൽഹിയിൽ ശക്തമായ പ്രതിഷേധങ്ങൾ അടിച്ചമർത്തി ബിജെപി സർക്കാർ. ഞായറാഴ്‌ച ഇന്ത്യാഗേറ്റ്‌ പരിസരത്ത്‌ പ്രതിഷേധിച്ച നിരവധി പേരെ പൊലീസ്‌ വലിച്ചിഴച്ച്‌ കൊണ്ടുപോയി. കുട്ടികളും സ്‌ത്രീകളും ഉൾപ്പെടെയുള്ളവരാണ്‌ ശുദ്ധവായു അവകാശമാണെന്ന്‌ ചൂണ്ടിക്കാട്ടി പ്രതിഷേധിച്ചത്‌. ജെഎൻയു ഉൾപ്പെടെയുള്ള സർവകലാശാലകളിലെ വിദ്യാർഥികളും അണിനിരന്നു. സമൂഹ മാധ്യമങ്ങളിലും സർക്കാരിനെതിരെ പ്രതിഷേധം ശക്തം. കേന്ദ്രത്തിലും ഡൽഹിയിലും കോർപ്പറേഷനിലും ഭരണത്തിലുള്ള ബിജെപി പ്രതിരോധത്തിലായതോടെയാണ്‌ കേന്ദ്ര സർക്കാരിന്റ നിയന്ത്രണത്തിലുള്ള ഡൽഹി പൊലീസിന്റെ അടിച്ചമർത്തൽ.

വായു ഗുണനിലവാര സൂചിക(എക്യുഐ) യിൽ കൃത്രിമം കാണിച്ച്‌ ജനങ്ങളെ സർക്കാർ കബളിപ്പിക്കുകയാണെന്ന്‌ ആരോപണമുണ്ട്‌. മിക്ക സമയങ്ങളിലും കേന്ദ്ര മലിനീകരണ നിയന്ത്രണ ബോർഡ്‌(സിപിസിബി) രേഖപ്പെടുത്തുന്ന എക്യുഐയക്കാൾ കൂടുതലാണ്‌ മറ്റ്‌ സ്വകാര്യ ഏജൻസികൾ രേഖപ്പെടുത്തുന്ന എക്യുഐ. സിപിസിബി രേഖപ്പെടുത്തിയതനുസരിച്ച്‌ ഡൽഹിയിലെ എക്യുഐ തിങ്കളാഴ്‌ചയും ‘അതീവ മോശം’ വിഭാഗത്തിൽ തുടരുകയാണ്‌. സ്വിസ്‌ ഏജൻസിയായ ഐക്യു എയർ രേഖപ്പെടുത്തിയത്‌ ‘അതീവ ഗുരുതരം’ വിഭാഗത്തിലാണ്‌.