കേന്ദ്രസർക്കാരിന്റെ ഏകപക്ഷീയമായ പിഎൽഐ പദ്ധതി: അടിയന്തര പരിഹാരം ആവശ്യപ്പെട്ട് യുഎഫ്ബിയു

ന്യൂഡൽഹി : കേന്ദ്ര സർക്കാർ ഏകപക്ഷീയമായി നടപ്പിലാക്കിയ പെർഫോമൻസ് ലിങ്ക്ഡ് ഇൻസെന്റീവ്- പിഎൽഐ ( PLI- Performance Linked Incentive) പദ്ധതിക്കെതിരെ അടിയന്തര ചർച്ചയിലുടെ പരിഹാരം ഉറപ്പാക്കണമെന്ന് ബാങ്ക് ജീവനക്കാരുടെ സംഘടനയായ യുണൈറ്റഡ്‌ ഫോറം ഓഫ്‌ ബാങ്ക് യൂണിയൻസ്‌ ആവശ്യപ്പെട്ടു. പിഎൽഐ ഫോർമുലയ്ക്കെതിരെ ബാങ്കിങ് മേഖലയിലുടനീളം വ്യാപകവുമായ പ്രക്ഷോഭ പരിപാടികൾ ആരംഭിച്ചതായി യുണൈറ്റഡ് ഫോറം ഓഫ് ബാങ്ക് യൂണിയൻസ് (യുഎഫ്ബിയു) പറഞ്ഞു.

ധനകാര്യ സേവന വകുപ്പ് (ഡി‌എഫ്‌എസ്) (Department of Financial Services (DFS) നിർബന്ധിതമായി നടപ്പിലാക്കാൻ ശ്രമിക്കുന്ന പുതിയ പദ്ധതി, നിലവിലുള്ള ഇരുപക്ഷ ചർച്ചകളിലൂടെ രൂപം കൊണ്ടതും ബൈപാർട്ടൈറ്റ് സെറ്റിൽമെന്റ് / ജോയിന്റ് നോട്ട് ഘടനയിൽ ഉൾപ്പെടുത്തിയതുമായ പദ്ധതിയിൽ നിന്നുള്ള ഏകപക്ഷീയവും വിഭജനപരവുമായ വ്യതിയാനമായാണ് ജീവനക്കാർ കാണുന്നത്. നിലവിലെ പദ്ധതി ബാങ്കിന്റെ കൂട്ടായ പ്രകടനവുമായി ബന്ധിപ്പിച്ച ഏകീകൃത സ്വഭാവമുള്ളതാണ്‌. എന്നാൽ പുതുക്കിയ പദ്ധതി ഓഫീസർമാരിൽ വൃത്യാസങ്ങളും കൃത്രിമ വിഭാഗീകരണവും സൃഷ്ദിക്കാൻ ശ്രമിക്കുന്നതിനാൽ, ദീർഘകാലമായി നിലനിൽക്കുന്ന സേവന വ്യവസ്ഥകളും വ്യവസായ ബന്ധങ്ങളും അസ്ഥിരമാക്കുമെന്ന്‌ ജീവനക്കാർ ആശങ്ക പ്രകടിപ്പിക്കുന്നു.

ബാങ്കിംഗ് തൊഴിലാളികളുടെ ഐക്യത്തെ തകർക്കുന്നതാണ് പുതുക്കിയ ഫോർമുല എന്ന് യുഎഫ്ബിയു പറഞ്ഞു. നിലവിലുള്ള കൂട്ടായ ചർച്ചാ സംവിധാനത്തിൽ നിന്ന് സ്കെയിൽ IV ഉം അതിനു മുകളിലുള്ള ഉദ്യോഗസ്ഥരെയും വേർതിരിക്കാൻ ശ്രമിക്കുകയും വ്യക്തിഗത വിലയിരുത്തലിനെ അടിസ്ഥാനമാക്കി വ്യത്യസ്തമായ ഒരു ഘടന അവതരിപ്പിക്കുകയും ചെയ്യുന്നതിലൂടെ, പദ്ധതി അസമത്വങ്ങൾ സൃഷ്ടിക്കുകയും, ടീം വർക്കിനെയും ധാർമ്മികതയെയും ദുർബലപ്പെടുത്തുകയും ചെയ്യും.

അടിയന്തര ഇടപെടൽ ആവശ്യപ്പെട്ട് യുഎഫ്ബിയു ചീഫ് ലേബർ കമീഷണറെ സമീപിച്ചിട്ടുണ്ട്. 09.03.2026 ന് നടന്ന അനുരഞ്ജന നടപടികളിൽ, നിലവിലുള്ള ബൈപാർട്ടൈറ്റ് സെറ്റിൽമെന്റ് / ജോയിന്റ് നോട്ട് പ്രകാരം 2024-25 സാമ്പത്തിക വർഷത്തേക്ക് സ്കെയിൽ IV മുതൽ VII വരെയുള്ള ഉദ്യോഗസ്ഥർക്ക് PLI ​​നൽകുന്ന വിഷയം സജീവ പരിഗണനയിലായിരുന്നു. വിഷയത്തിൽ ഉഭയകക്ഷി ചർച്ചകളിലൂടെ കൂടുതൽ നടപടികൾ സ്വീകരിക്കേണ്ടതുണ്ട്. അത്തരമൊരു സാഹചര്യത്തിൽ DFS, IBA അല്ലെങ്കിൽ വ്യക്തിഗത ബാങ്ക് മാനേജ്മെന്റുകൾ നടത്തുന്ന ഏതെങ്കിലും ഏകപക്ഷീയമായ നടപ്പാക്കൽ പൂർണ്ണമായും അസ്വീകാര്യമാണ്. അനുരഞ്ജന നടപടികൾ നിലവിലിരിക്കെ ഏകപക്ഷീയമായ നടപ്പാക്കൽ വ്യാവസായിക സമാധാനത്തിന് ഹാനികരമാണെന്നും നിലവിലുള്ള സ്ഥിതി നിലനിർത്തണമെന്ന ആവശ്യകതയ്ക്ക് വിരുദ്ധമാണെന്നും യുഎഫ്ബിയു പരഞ്ഞു. അനുരഞ്ജന വേളയിലെ അത്തരം ഏകപക്ഷീയമായ നടപടി വ്യാവസായിക തർക്ക നിയമത്തിലെ സെക്ഷൻ 33 പ്രകാരം ഗുരുതരമായ പ്രശ്നങ്ങൾ ഉയർത്തുന്നുവെന്നും യുഎഫ്ബിയു പറയുന്നു.

വേഗത്തിലുള്ളതും നീതിയുക്തവുമായ പരിഹാരത്തിനായി ഉടനടി നടപടികൾ സ്വീകരിക്കണം. അതിനാൽ, ഏകപക്ഷീയമായ എല്ലാ നടപടികളും ഉടനടി നിർത്തിവയ്ക്കാനും പ്രശ്നം പരിഹരിക്കാനും ധനകാര്യ സേവന വകുപ്പിനോടും, ഇന്ത്യൻ ബാങ്ക്സ് അസോസിയേഷനോടും, എല്ലാ പൊതുമേഖലാ ബാങ്കുകളുടെയും മാനേജ്മെന്റുകളോടും ആവശ്യപ്പെടുന്നതായി യുഎഫ്ബിയു പറഞ്ഞു.