മൈസൂരിൽ ബസ് അപകടം; നാല് മലയാളികൾ മരിച്ചു

ബം​ഗളൂരു: മൈസൂരിലുണ്ടായ വാഹനാപകടത്തിൽ നാല് മലയാളികൾ മരിച്ചു. കൊയിലാണ്ടി സ്വദേശി മുഹമ്മദ് ഫർഹാൻ(22), റഫീസ്(45), റഷീദ്(45), മാഹി സ്വദേശി സാക്കിർ(27) എന്നിവരാണ് മരിച്ചത്. ചന്നപ്പട്ടണയ്ക്കു സമീപം പുലർച്ചെ 3 മണിയോടെയാണ് അപകടം.

കോഴിക്കോടുനിന്ന് ബംഗളൂരുവിലേക്ക് പോയ ബസാണ് അപകടത്തിൽപ്പെട്ടത്. പി കെ ട്രാവൽസിന്റെ സ്ലീപർ ബസ് ഡിവൈഡറിലേക്ക് ഇടിച്ചു കയറുകയായിരുന്നു. ഡ്രൈവർ ഉറങ്ങിപ്പോയതാണ് അപകടത്തിന് ഇടയാക്കിയതെന്നാണ് പ്രാഥമിക നിഗമനം. ബസിന്റെ മുൻവശം തകർന്നു. പരുക്കേറ്റവരെ അടുത്തുള്ള ആശുപത്രികളിലേക്ക് മാറ്റി.