​ഉത്തർപ്രദേശിൽ ഫാക്ടറിയിൽ പൊട്ടിത്തെറി; 3 പേർ മരിച്ചു

ലക്നൗ : ഉത്തർപ്രദേശിൽ റബർ ഫാക്ടറിയിലുണ്ടായ പൊട്ടിത്തെറിയിൽ മൂന്ന് തൊഴിലാളികൾ മരിച്ചു. ഒരാൾക്ക് പരിക്കേറ്റു. ​ഗാസിയാബാദ് അത്രൗലിയിലുള്ള റബർ മാനുഫാക്ചറിങ് യൂണിറ്റിലാണ് പൊട്ടിത്തെറിയുണ്ടായത്. ഫാക്ടറിയിലെ ബോയിലർ പൊട്ടിത്തെറിക്കുകയായിരുന്നു.

ഭോജ്പൂർ സ്വദേശി യോ​ഗേന്ദ്ര കുമാർ (48), കൃഷ്ണ ന​ഗറിൽ നിന്നുള്ള അനുജ് സിങ് (27), ​ഗ്രേറ്റർ നോയിഡ സ്വ​ദേശി ജെവാർ (21) എന്നിവരാണ് മരിച്ചത്. ഇന്ന് പുലർച്ചെയോടെയാണ് സ്വകാര്യ ഫാക്ടറിയിൽ പൊട്ടിത്തെറിയുണ്ടായതെന്ന് മോദിന​ഗർ എസിപി ​ഗ്യാൻ പ്രകാശ് റായ് പറഞ്ഞു. നാലു പേരാണ് അപകടസമയത്ത് ഫാക്ടറിയിൽ പണിയെടുത്തിരുന്നത്. ഇവർക്ക് സുരക്ഷ ഉപകരണങ്ങളൊന്നും നൽകിയിരുന്നില്ലെന്നും പൊലീസ് പറഞ്ഞു.