ബിഹാർ വോട്ടർപ്പട്ടികയിലെ കൂട്ട പുറന്തള്ളൽ ; സുപ്രീംകോടതി ഇടപെടൽ കനത്ത പ്രഹരം

ന്യൂഡൽഹി

ബിഹാർ വോട്ടർപ്പട്ടികയിൽനിന്ന്‌ തീവ്ര പുനഃപരിശോധനയിലൂടെ പുറത്താക്കിയ 65 ലക്ഷം വോട്ടർമാരുടെ പേരുവിവരം പുറത്തുവിടണമെന്ന സുപ്രീംകോടതി നിർദേശം തെരഞ്ഞെടുപ്പ്‌ കമീഷനും മോദി സർക്കാരിനും കനത്ത തിരിച്ചടി. ഒഴിവാക്കിയവരുടെ പേരുവിവരം പുറത്തുവിടുന്നതിനൊപ്പം വോട്ടർപ്പട്ടികയിൽ ഉൾപ്പെടുന്നതിന്‌ ആധാർ കാർഡും വോട്ടർ തിരിച്ചറിയൽ കാർഡും പരിഗണിക്കണമെന്നും കമീഷൻ നിർദേശിച്ചിട്ടുണ്ട്‌.

തീവ്ര പുനഃപരിശോധനയെന്ന പേരിൽ പരമാവധി ന്യൂനപക്ഷ– പിന്നോക്ക വോട്ടർമാരെ ഒഴിവാക്കി നിയമസഭാ തെരഞ്ഞെടുപ്പിൽ ബിജെപിക്ക്‌ അനുകൂല സാഹചര്യമൊരുക്കുകയായിരുന്നു മോദി സർക്കാരിന്റെയും തെരഞ്ഞെടുപ്പ്‌ കമീഷന്റെയും ലക്ഷ്യം. ആധാർ, വോട്ടർ ഐഡി കാർഡ്‌, റേഷൻ കാർഡ്‌ എന്നിവ തിരിച്ചറിയൽ രേഖകളായി പരിഗണിക്കില്ലെന്ന കമീഷൻ നിലപാട്‌ പരമാവധി പേരെ പട്ടികയിൽനിന്ന്‌ നീക്കാനുള്ള ലക്ഷ്യത്തോടെയായിരുന്നു. ആധാർ കാർഡ്‌ പരിഗണിക്കണമെന്ന നിർദേശത്തിന്‌ തെരഞ്ഞെടുപ്പ്‌ കമീഷൻ വഴങ്ങിയിരുന്നില്ല.

കരടു വോട്ടർപ്പട്ടികയിൽ നിന്ന്‌ 65 ലക്ഷം പേർ പുറന്തള്ളപ്പെട്ടുവെന്നത്‌ കമീഷന്റെ തന്നെ ഒ‍ൗദ്യോഗിക കണക്കാണ്‌. എന്നാൽ ഒരു കോടിയോളം പേർ പുറത്താക്കപ്പെട്ടുവെന്നാണ്‌ അന‍ൗദ്യോഗിക കണക്കുകൾ.

ഉൾപ്പെടാതെ പോയവർക്ക്‌ വീണ്ടും അപേക്ഷ നൽകാൻ ഇ‍ൗ മാസം അവസാനംവരെ സമയമുണ്ട്‌. അപേക്ഷയ്‌ക്കൊപ്പം ആധാർ കാർഡോ നിലവിലെ വോട്ടർ തിരിച്ചറിയൽ കാർഡോ രേഖയായി പരിഗണിക്കാനാണ്‌ സുപ്രീംകോടതി ഇപ്പോൾ നിർദേശിച്ചിട്ടുള്ളത്‌. ബിഹാറിൽ ഭൂരിഭാഗം പേരുടെയും പക്കലുള്ള തിരിച്ചറിയൽ രേഖകളാണ്‌ ആധാർ കാർഡും വോട്ടർ തിരിച്ചറിയൽ കാർഡും. പട്ടികയിൽ കൂടുതൽ പേർ വീണ്ടും ഉൾപ്പെടാൻ സുപ്രീംകോടതി ഇടപെടൽ വഴിയൊരുക്കും.

പുനഃപരിശോധന നടപടികളുമായി മുന്നോട്ടുനീങ്ങാൻ കോടതി കമീഷന്‌ അനുമതി നൽകിയിട്ടുണ്ട്‌. എന്നാൽ നടപടി പൂർണമായും സുതാര്യമാകണമെന്ന കർക്കശ നിലപാടാണ്‌ സ്വീകരിച്ചിരിക്കുന്നത്‌. ഇതേ ആവശ്യമാണ്‌ പ്രതിപക്ഷ പാർടികളും മുന്നോട്ടുവെച്ചിരുന്നത്‌. പ്രതിപക്ഷത്തോട്‌ ധിക്കാരപരമായി പെരുമാറിയ കമീഷന്‌ കോടതി നിർദേശത്തോട്‌ മുഖംതിരിക്കാനാകില്ല.