ബിഹാർ വോട്ടർപ്പട്ടിക ; പാർലമെന്റ്‌ വീണ്ടും പ്രക്ഷുബ്‌ധം

ന്യൂഡൽഹി

​ബിഹാറിലെ വോട്ടർപ്പട്ടിക തീവ്രപുനഃപരിശോധന ഉൾപ്പെടെയുള്ള വിഷയങ്ങളിൽ ചർച്ച ആവശ്യപ്പെട്ടുള്ള പ്രതിപക്ഷ പ്രതിഷേധത്തിൽ പാർലമെന്റ്‌ വീണ്ടും പ്രക്ഷുബ്‌ധം. ‘വോട്ട്‌ കള്ളന്മാരേ, കസേര കാലിയാക്കൂ...’–തുടങ്ങിയ മുദ്രാവാക്യങ്ങൾ ഉയർത്തി പ്രതിപക്ഷം നടുത്തളത്തിലിറങ്ങി. ഇതിനിടെ, ചെറിയ കുറ്റങ്ങൾക്ക്‌ മുന്നറിയിപ്പുകളോ ചെറിയ ശിക്ഷകളോ മാത്രം നൽകി തീർപ്പാക്കാനുള്ള വ്യവസ്ഥകളുള്ള ജൻവിശ്വാസ്‌ ഭേദഗതി ബിൽ, ഇന്ത്യൻ ഇൻസ്റ്റിറ്റ്യൂട്ട്‌ ഓഫ്‌ മാനേജ്‌മെന്റ്‌ ഭേദഗതി ബിൽ തുടങ്ങിയവ അവതരിപ്പിച്ചു. ജൻവിശ്വാസ്‌ ഭേദഗതി ബിൽ സെലക്‌റ്റ്‌ കമ്മിറ്റിക്ക്‌ വിട്ടു.

മന്ത്രി സർബാനന്ദ സോനോവാൾ ‘ഇന്ത്യൻ തുറമുഖ ബിൽ’ അവതരിപ്പിക്കുന്നതിനിടെ രാജ്യസഭ പ്രതിപക്ഷ നേതാവ്‌ മല്ലികാർജുൻ ഖാർഗെ എസ്‌ഐആർ വിഷയം സഭ ചർച്ച ചെയ്യണമെന്ന്‌ ആവശ്യപ്പെട്ടു.

സഭാധ്യക്ഷൻ ആവശ്യം തള്ളിയതിനെ തുടർന്ന്‌ പ്രതിപക്ഷം മുദ്രാവാക്യങ്ങളുയർത്തി സഭ ബഹിഷ്‌കരിച്ചു. പ്രതിപക്ഷത്തിന്റെ അഭാവത്തിൽ തുറമുഖ ബിൽ രാജ്യസഭ പാസാക്കി. 1908ലെ ‘ഇന്ത്യൻ തുറമുഖ നിയമം’ റദ്ദാക്കിയാണ്‌ പുതിയ നിയമം കൊണ്ടുവന്നത്‌.

ഇന്ത്യൻ ബഹിരാകാശ സഞ്ചാരി ശുഭാംശു ശുക്ലയുടെ നേട്ടം ചർച്ചചെയ്യാൻ ലോക്‌സഭയിൽ പ്രത്യേക ചർച്ച തുടങ്ങി. 2026ൽ ബഹിരാകാശത്തേക്ക്‌ ‘വ്യോംമിത്ര’ റോബോട്ടിനെ എത്തിക്കാനുള്ള പദ്ധതിയുണ്ടെന്ന്‌ ബഹിരാകാശ സഹമന്ത്രി ജിതേന്ദ്രസിങ് പറഞ്ഞു. 2027ൽ മനുഷ്യനെ ബഹിരാകാശത്ത്‌ എത്തിക്കാനുള്ള ‘ഗഗൻയാൻ’പദ്ധതി യാഥാർഥ്യമാക്കും. 2035ഓടെ ഇന്ത്യയുടെ ബഹിരാകാശ നിലയം സ്ഥാപിക്കും.

2040ൽ ഇന്ത്യൻ ബഹിരാകാശ യാത്രികൻ ചന്ദ്രനിൽ കാലുകുത്തും– ജിതേന്ദ്രസിങ് പറഞ്ഞു. ശുഭാംശു തിങ്കളാഴ്‌ച പ്രധാനമന്ത്രി നരേന്ദ്ര മോദിയെ സന്ദർശിച്ചു.