ബിഹാർ വോട്ടർപ്പട്ടിക ; ആധാർ രേഖയാക്കുന്നവർ പട്ടികയിൽ 
ഉൾപ്പെടുമോയെന്ന്‌ അവ്യക്തത

ന്യൂഡൽഹി

​ബിഹാറിൽ വോട്ടർപ്പട്ടികയിൽ പേര്‌ ഉൾപ്പെടുത്താൻ ആധാർ പരിഗണിക്കണമെന്ന്‌ സുപ്രീംകോടതിനിർദേശമുണ്ടെങ്കിലും അപേക്ഷകർ പട്ടികയിൽ ഉൾപ്പെടുമോയെന്നതിൽ അവ്യക്തത. തെരഞ്ഞെടുപ്പ്‌ കമീഷൻ ജൂൺ 24ന്‌ പുറത്തിറക്കിയ പട്ടികയിൽ 11 രേഖ ഹാജരാക്കാമെന്നാണ്‌ അറിയിച്ചത്‌. അതിൽ ആധാർ ഉൾപ്പെടുത്തിയിരുന്നില്ല. എന്നാൽ, ആധാറും പരിഗണിക്കണമെന്ന്‌ ആഗസ്‌ത്‌ 22ന്‌ സുപ്രീംകോടതി നിർദേശിച്ചു.

എന്യൂമറേഷൻ ഫോമുകൾ അപ്‌ലോഡ്‌ ചെയ്യാനുള്ള ബൂത്തുതല ഉദ്യോഗസ്ഥരുടെ (ബിഎൽഒ) ആപ്ലിക്കേഷനിൽ 11 രേഖകൾ ഹാജരാക്കാനുള്ള സ‍ൗകര്യമുണ്ട്‌. ഇതോടൊപ്പം, ‘മറ്റ്‌ രേഖകൾ’ എന്നൊരു സാധ്യതയുമുണ്ട്‌. അതുപയോഗിച്ച്‌ ആധാർ കാർഡ്‌ കൈവശമുള്ളവരുടെ അപേക്ഷകളും അപ്‌ലോഡ്‌ ചെയ്യുന്നുണ്ടെന്ന്‌ ചില ജില്ലകളിലെ ബിഎൽഒമാർ പ്രതികരിച്ചു. അതേസമയം, എന്യൂമറേഷൻ ഫോമുകൾ പൂരിപ്പിക്കുന്നവരുടെ പക്കൽ നിന്നും 11 രേഖകളിൽ ഏതെങ്കിലും തന്നെ വാങ്ങി അപ്‌ലോഡ്‌ ചെയ്യണമെന്നാണ്‌ ‘മുകളിൽ നിന്നുള്ള’ നിർദേശം.

ആധാർ സമർപ്പിക്കുന്നവരുടെ അപേക്ഷ വാങ്ങുന്നുണ്ടെങ്കിലും വോട്ടർപട്ടികയിൽ അവരുടെ പേര്‌ ചേർക്കുമോയെന്നതിൽ ഒരുറപ്പുമില്ലെന്ന ആശങ്കയിലാണ്‌ ജനങ്ങൾ. ഇലക്‌ടറൽ രജിസ്‌ട്രേഷൻ ഓഫീസർമാരുടെ (ഇആർഒ) തീരുമാനമാണ്‌ ഇക്കാര്യത്തിൽ നിർണായകമാകുക.