ബിഹാറിൽ അന്തിമ പട്ടികയിലും വ്യാപക ക്രമക്കേട് ; വ്യാജവിലാസത്തിൽ 1.32 കോടി വോട്ടർമാർ

ന്യൂഡൽഹി

നിയമസഭാ തെരഞ്ഞെടുപ്പ്‌ പ്രഖ്യാപിക്കപ്പെട്ട ബിഹാറിൽ തീവ്ര പുനഃപരിശോധനയ്‌ക്ക്‌ ശേഷം പുറത്തുവിട്ട അന്തിമ വോട്ടർപ്പട്ടികയിലും വ്യാപക ക്രമക്കേടുകൾ കണ്ടെത്തി അന്വേഷണാത്മക മാധ്യമപ്രവർത്തകരുടെ കൂട്ടായ്‌മയായ റിപ്പോർട്ടേഴ്‌സ്‌ കളക്ടീവ്‌. അന്തിമ വോട്ടർപ്പട്ടികയിൽ 14.35 ലക്ഷം "ദുരൂഹ വോട്ടർമാരെ' പരിശോധനയിൽ തിരിച്ചറിഞ്ഞു. ഇവർക്ക്‌ ഒരേ പേരിൽ രണ്ട്‌ വ്യത്യസ്‌ത തിരിച്ചറിയൽ കാർഡുണ്ട്‌. വിലാസവും ബന്ധുക്കളുടെ പേരും സമാനമാണ്‌. പ്രായത്തിൽ മാത്രമാണ്‌ നേരിയ വ്യത്യാസമുള്ളത്‌. ഇതിൽ തന്നെ 3.42 ലക്ഷം പേർക്ക്‌ ഒരേ പ്രായം. ഒരേ പേരിൽ മൂന്ന്‌ തിരിച്ചറിയൽ കാർഡുള്ള പതിനായിരക്കണക്കിന്‌ കേസുകളും പരിശോധനയിൽ തെളിഞ്ഞു.

വ്യാജ വിലാസത്തിലും ഇല്ലാത്ത വിലാസത്തിലുമായി 1.32 കോടി വോട്ടർമാരുണ്ട്‌. സാധാരണ ഭവനരഹിതർക്കും രജിസ്റ്റർചെയ്‌ത പാർപ്പിടമില്ലാത്തവർക്കും തെരഞ്ഞെടുപ്പ്‌ കമീഷൻ സാങ്കൽപ്പിക വിലാസങ്ങൾ നൽകാറുണ്ട്‌. എന്നാൽ, ഇല്ലാത്ത വിലാസത്തിലോ വ്യാജ വിലാസത്തിലോ രജിസ്റ്റർ ചെയ്‌ത 1.32 കോടി വോട്ടർമാരെയാണ്‌ റിപ്പോർട്ടേഴ്‌സ്‌ കളക്ടീവ്‌ കണ്ടെത്തിയത്‌. വ്യത്യസ്‌ത ജാതിയിലും സമുദായത്തിലും കുടുംബത്തിലും ഉൾപ്പെട്ട നൂറുകണക്കിനുപേർ ഒരേ വിലാസത്തിയുണ്ട്‌.

കരടു വോട്ടർപ്പട്ടിക പ്രസിദ്ധീകരിച്ചപ്പോഴും വ്യാപകമായ ക്രമകേടുകൾ ഉയർന്നുവന്നിരുന്നു. അന്തിമ വോട്ടർപ്പട്ടികയിൽ ഇവയെല്ലാം തിരുത്തപ്പെടുമെന്നാണ്‌ കമീഷൻ അവകാശപ്പെട്ടെങ്കിലും ഒന്നുമുണ്ടായില്ലെന്നാണ്‌ വ്യക്തമാകുന്നത്‌.

കൂട്ട സ്ഥലംമാറ്റം

​ബിഹാറിൽ തെരഞ്ഞെടുപ്പ്‌ പ്രഖ്യാപിച്ചതിന്‌ പിന്നാലെ ഉദ്യോഗസ്ഥതലത്തിൽ വലിയ അഴിച്ചുപണി നടത്തി ജെഡിയു–ബിജെപി സർക്കാർ. ആറ്‌ ഐഎഎസ്‌ ഉദ്യോഗസ്ഥരെയും അഞ്ച്‌ ഐപിഎസ്‌ ഉദ്യോഗസ്ഥരെയും 102 ബിഹാർ അഡ്‌മിനിസ്‌ട്രേറ്റീവ്‌ സർവീസ്‌ (ബിഎഎസ്‌) ഉദ്യോഗസ്ഥരെയും തിടുക്കത്തിൽ സ്ഥലംമാറ്റി.
 എഡിഎം, അഡീഷണൽ കലക്ടർ, ലാൻഡ്‌ റെവന്യു ഓഫീസർ തുടങ്ങിയ തസ്‌തികകളിൽ ജോലി ചെയ്‌തിരുന്ന നൂറുകണക്കിന്‌ ഉദ്യോഗസ്ഥരെ തലങ്ങും വിലങ്ങും മാറ്റി. കൂട്ടസ്ഥലംമാറ്റം ദുരൂഹമാണെന്ന്‌ ചൂണ്ടിക്കാട്ടി ആർജെഡി തെരഞ്ഞെടുപ്പ്‌ കമീഷന്‌ പരാതി നൽകി.