വീണ്ടും ഉബർ ഡ്രൈവറുടെ മോശം പെരുമാറ്റം; സ്വന്തം നാട്ടിൽ പോലും സുരക്ഷിതരല്ലെന്ന് യുവതി, ദിവസങ്ങൾക്കിടെ രണ്ടാമത്തെ സംഭവം

ബംഗളൂരു: ബംഗളൂരു നഗരത്തിൽ ഉബർ ഓട്ടോ ഡ്രൈവർമാരിൽ നിന്നുള്ള മോശം പെരുമാറ്റത്തെക്കുറിച്ച് ദിവസങ്ങൾക്കിടെ രണ്ടാമത്തെ പരാതി ഉയർന്നത് യാത്രക്കാരുടെ സുരക്ഷയെക്കുറിച്ചുള്ള ആശങ്ക വർധിപ്പിക്കുന്നു. വടക്കുകിഴക്കൻ സംസ്ഥാനത്ത് നിന്നുള്ള യുവതിയാണ് ഇത്തവണ ഉബർ ഡ്രൈവറുടെ മോശം പെരുമാറ്റത്തിന് ഇരയായത്. തനിക്ക് അറിയാത്ത കന്നഡ ഭാഷയിൽ സംസാരിക്കാൻ ഓട്ടോ ഡ്രൈവർ പറയുന്നതും തല്ലാൻ ശ്രമിക്കുന്നതും കാണിക്കുന്ന വീഡിയോയും യുവതി ഇൻസ്റ്റാഗ്രാമിൽ പോസ്റ്റ് ചെയ്തു.

താൻ വടക്കുകിഴക്കൻ മേഖലയിൽ നിന്നുള്ള ആളായതുകൊണ്ട് ഒരു ഉബർ ഓട്ടോ ഡ്രൈവർ തന്നെ അധിക്ഷേപിച്ചു എന്നാണ് എൻ ബീ എന്ന യുവതിയുടെ ആരോപണം. ഒക്ടോബർ 2 ന് ബുക്ക് ചെയ്ത റൈഡ് വൈകിയിട്ടും എത്താത്തതിനെ തുടർന്ന് റദ്ദാക്കിയതാണ് തർക്കത്തിലേക്ക് നയിച്ചത്. ആപ്പിൽ റൈഡ് എത്തിയെന്ന് കാണിച്ചുവെങ്കിലും ഓട്ടോ വന്നിരുന്നില്ല. ഇതേത്തുടർന്ന് ആദ്യത്തേത് റദ്ദ് ചെയ്ത് യുവതി മറ്റൊരു ഓട്ടോയിൽ കയറി യാത്ര തുടർന്നു. അപ്പോഴേക്കും ഡ്രൈവർ എച്ച് എസ് പവൻ അവിടേക്ക് എത്തി യുവതി സഞ്ചരിക്കുകയായിരുന്ന ഓട്ടോ തടഞ്ഞുവെച്ച് പണം ആവശ്യപ്പെടുകയായിരുന്നു.

തനിക്ക് മനസ്സിലാകാത്ത കന്നഡ ഭാഷയിൽ സംസാരിച്ച് ഡ്രൈവർ പ്രകോപനം സൃഷ്ടിക്കുന്നതിന്റെ ദൃശ്യങ്ങൾ യുവതി ഇൻസ്റ്റാഗ്രാമിൽ പോസ്റ്റ് ചെയ്ത വീഡിയോയിൽ കാണാം. "ഞാൻ വടക്കുകിഴക്കൻകാരിയായതുകൊണ്ടാണ് ഇയാൾ എന്നെ ഇങ്ങനെ അധിക്ഷേപിക്കുന്നത്," എന്നും "നമ്മുടെ സ്വന്തം നാട്ടിൽപോലും നമ്മൾ സുരക്ഷിതരല്ല," എന്നും യുവതി ഇൻസ്റ്റാഗ്രാമിൽ കുറിച്ചു.

പരാതിയെ തുടർന്ന് ബംഗളൂരു സിറ്റി പൊലീസ് യുവതിയുടെ സ്ഥലവും നമ്പറും ആവശ്യപ്പെട്ടിരുന്നു. ഉബർ ഡ്രൈവർ വ്യാജ നമ്പർ പ്ലേറ്റ് ആയിരുന്നു ഉപയോ​ഗിച്ചത് എന്നും പൊലീസ് കണ്ടെത്തി. ആഴ്ചകളോളം ഓടാതെയിരുന്ന ഒരാളുടെ വണ്ടി നമ്പറായിരുന്നു പവന്‍ ഉപയോഗിച്ചത്.

സംഭവത്തെ തുടർന്ന് ഉബർ ക്ഷമ ചോദിച്ചു. ഈ പെരുമാറ്റം അതീവ ഗൗരവകരമാണ് എന്ന് വിശേഷിപ്പിച്ച ഉബർ വിഷയം കൈകാര്യം ചെയ്യാൻ പ്രത്യേക ടീമിന് കൈമാറിയതായും വ്യക്തമാക്കി.

ദിവസങ്ങൾക്കിടെ രണ്ടാമത്തെ സംഭവമാണിത്. മുമ്പും സമാന പരാതി ഉയർന്നിരുന്നു. തുടർച്ചയായ ഇത്തരം സംഭവങ്ങൾ ഉബർ പോലുള്ള റൈഡ്-ഹെയ്‌ലിങ് ആപ്പുകളുടെ സുരക്ഷാ സംവിധാനങ്ങളെ വീണ്ടും ചോദ്യം ചെയ്യുകയാണ്. ഇതിനു ദിവസങ്ങൾക്കു മുമ്പ് പ്രമുഖ സോഷ്യൽ മീഡിയ ഇൻഫ്ലുവൻസറായ ആമി എന്ന യുവതിയും ബംഗളൂരുവിൽ സമാനമായ ദുരനുഭവം പങ്കുവെച്ചിരുന്നു.

ലക്ഷ്യസ്ഥാനത്ത് ഇറക്കാൻ ഊബർ ഓട്ടോ ഡ്രൈവർ വിസമ്മതിക്കുകയും അവിടെ ഇറക്കാൻ ആവശ്യപ്പെട്ടപ്പോൾ വണ്ടി പെട്ടെന്ന് തിരിച്ചു പോവുകയും ചെയ്തു എന്നായിരുന്നു ആമിയുടെ പരാതി. പരാതിപ്പെട്ടപ്പോൾ ഡ്രൈവർ ആക്രമണോത്സുകനാവുകയും തല്ലാൻ ശ്രമിക്കുകയും ചെയ്തു.

വാഹനത്തിന്റെ രജിസ്‌ട്രേഷൻ നമ്പർ ആപ്പിൽ കാണിച്ച നമ്പറുമായി പൊരുത്തക്കേടുകൾ ഉണ്ടായിരുന്നു എന്നും ആമി ആരോപിച്ചിരുന്നു.