ഡൽഹിയിൽ വായു ​ഗുണനിലവാരം ​'ഗുരുതരം'; മൂന്നാംഘട്ട നിയന്ത്രണങ്ങൾ ഏർപ്പെടുത്തി

ന്യൂഡൽഹി: ഡൽഹിയിൽ വായു ​ഗുണനിലവാരം ​'ഗുരുതരാ'വസ്ഥയിൽ. ഡൽഹി-ദേശീയ തലസ്ഥാന മേഖല(എൻ‌സി‌ആർ)യിലുടനീളം കർശന നിയന്ത്രണം ഏർപ്പെടുത്തി. ഗ്രേഡഡ് റെസ്‌പോൺസ് ആക്ഷൻ പ്ലാനിന്റെ (ജിആർഎപി) മൂന്നാം ഘട്ടം നടപ്പിലാക്കി. നഗരത്തിലെ വായുവിന്റെ ഗുണനിലവാരം 'ഗുരുതര' വിഭാഗത്തിലേക്ക് കുത്തനെ താഴ്ന്നതോടെയാണ് നിയന്ത്രണങ്ങൾ കടുപ്പിച്ചത്.

തിങ്കളാഴ്ച ഡൽഹിയിലെ ശരാശരി വായു ഗുണനിലവാര സൂചിക (എക്യുഐ) 362 (വളരെ മോശം) ൽ നിന്ന് ചൊവ്വാഴ്ച രാവിലെ അപകടകരമായ 425 (തീവ്രം) ആയി ഉയർന്നതിനെ തുടർന്നാണ് കമീഷൻ ഫോർ എയർ ക്വാളിറ്റി മാനേജ്‌മെന്റിന്റെ (സിഎക്യുഎം) തീരുമാനം. ഇതിനകം പ്രാബല്യത്തിലുള്ള ജിആർഎപി ഒന്ന് രണ്ട് ഘട്ടം നടപടികൾക്ക് പുറമേ മൂന്നാം ഘട്ടവും നടപ്പിലാക്കുമ്പോൾ നിരവധി പ്രധാന നിയന്ത്രണങ്ങളാണ് ഏർപ്പെടുത്തിയിരിക്കുന്നത്.

പ്രധാന നിയന്ത്രണങ്ങൾ

1. നിർമാണ പ്രവർത്തനങ്ങൾക്ക് വിലക്ക്: ഡൽഹി-എൻ‌സി‌ആറിൽ ഉടനീളം അത്യാവശ്യമല്ലാത്ത നിർമാണ, പൊളിക്കൽ പ്രവർത്തനങ്ങൾ നിരോധിച്ചിരിക്കുന്നു. എല്ലാ കരിങ്കൽ ക്രഷറുകളും ഖനന പ്രവർത്തനങ്ങളും വിലക്കി.

2. വാഹന നിയന്ത്രണം: ഡൽഹിയിലും എൻസിആറിന്റെ അയൽ ജില്ലകളിലും ബിഎസ്-III പെട്രോൾ, ബിഎസ്-IV ഡീസൽ ഫോർ വീലറുകളുടെ ഉപയോഗം കർശനമായി നിയന്ത്രിച്ചു. അംഗപരിമിതരെ ഈ നിയന്ത്രണത്തിൽ നിന്ന് ഒഴിവാക്കിയിട്ടുണ്ട്.

3. വിദ്യാഭ്യാസ മേഖലയിലും നിയന്ത്രണം: അഞ്ചാം ക്ലാസ് വരെയുള്ള ക്ലാസുകൾ ഹൈബ്രിഡ് പഠന രീതിയിലേക്ക് മാറ്റാൻ സ്കൂളുകൾക്ക് നിർദേശം. മാതാപിതാക്കൾക്കും വിദ്യാർത്ഥികൾക്കും ഓൺലൈൻ വിദ്യാഭ്യാസം ലഭ്യമാകുന്നിടത്ത് ക്ലാസുകൾ തിരഞ്ഞെടുക്കാനുള്ള ഓപ്ഷൻ അനുവദിക്കും.

ഡൽഹി-എൻ‌സി‌ആറിൽ ശൈത്യകാലത്തെ വായു മലിനീകരണം കൈകാര്യം ചെയ്യുന്നതിനുള്ള പ്രാഥമിക സംവിധാനമായാണ് ജിആർഎപി പ്രവർത്തിക്കുന്നത്. വായുവിന്റെ ഗുണനിലവാരത്തെ നാല് വ്യത്യസ്ത ഘട്ടങ്ങളായാണ് തരംതിരിച്ചിരിക്കുന്നത്. ഘട്ടം I (മോശം, 201-300 എക്യുഐ), ഘട്ടം II (വളരെ മോശം, 301-400 എക്യുഐ ), ഘട്ടം III (ഗുരുതരം, 401-450 എക്യുഐ ), ഘട്ടം IV (ഗുരുതരമായ പ്ലസ്, 450 ന് മുകളിലുള്ള എക്യുഐ). പടക്കം പൊട്ടിക്കൽ, അയൽ സംസ്ഥാനങ്ങളിലെ വൈക്കോൽ സംസ്കരണം, പ്രാദേശിക മലിനീകരണം, വാഹനങ്ങളിൽ നിനുള്ള ബഹിർഗമനം തുടങ്ങിയവയാണ് വായു ഗുണനിലവാരം മോശമാക്കുന്നതെന്നാണ് സിഎക്യുഎം പറയുന്നത്.