ആധാർ കാർഡ് ഇനി ജനനത്തീയതിയുടെ തെളിവല്ല; ഉത്തരവുമായി ഉത്തർപ്രദേശും മഹാരാഷ്ട്രയും

മുംബൈ: ജനന സർട്ടിഫിക്കറ്റിനോ ജനനത്തീയതിയുടെ തെളിവിനോ വേണ്ടി ഇനിമുതൽ ആധാർ കാർഡ് സ്വീകരിക്കേണ്ടതില്ലെന്ന് ഉത്തർപ്രദേശ്, മഹാരാഷ്ട്ര സംസ്ഥാന സർക്കാരുകൾ പ്രഖ്യാപിച്ചു. ഇതുമായി ബന്ധപ്പെട്ട് ഇരു സംസ്ഥാനങ്ങളും ഔദ്യോഗിക ഉത്തരവുകൾ പുറത്തിറക്കി.

ആധാർ വിവരങ്ങൾ ദുരുപയോഗം ചെയ്ത്, പ്രത്യേകിച്ചും വൈകി അല്ലെങ്കിൽ സംശയകരമായ രീതിയിൽ, ജനന സർട്ടിഫിക്കറ്റുകൾ നേടിയെടുക്കുന്നതിനെക്കുറിച്ചുള്ള റിപ്പോർട്ടുകൾ ഉയർന്നതിനെ തുടർന്നാണ് ഈ നീക്കം. ജനനവുമായി ബന്ധപ്പെട്ട ആശുപത്രി രേഖകളോ സർക്കാർ രേഖകളോ ആധാറിൽ ഉൾപ്പെടുന്നില്ല എന്നതാണ് സംസ്ഥാന സർക്കാരുകളുടെ പ്രധാന വിശദീകരണം. ആധാർ അടിസ്ഥാനപരമായ തിരിച്ചറിയൽ വിവരങ്ങൾ മാത്രമാണ് കാണിക്കുന്നതെന്നും അവർ വ്യക്തമാക്കി.

മഹാരാഷ്ട്ര റവന്യൂ വകുപ്പ് ജനനവുമായി ബന്ധപ്പെട്ട രേഖകൾക്ക് 16 ഇന പരിശോധനാ പ്രക്രിയ അവതരിപ്പിച്ചു. ആധാർ മാത്രം ഉപയോഗിച്ച് ജനന സർട്ടിഫിക്കറ്റുകൾ നൽകിയ ഉദ്യോഗസ്ഥർക്കെതിരെ നടപടിയെടുക്കാൻ സർക്കാർ നിർദ്ദേശം നൽകി. കൂടാതെ, 2023 ഓഗസ്റ്റിലെ ഭേദഗതിക്ക് ശേഷം ഡെപ്യൂട്ടി തഹസിൽദാർമാർ നൽകിയ പഴയ ഉത്തരവുകൾ റദ്ദാക്കാനും ജില്ലാ കളക്ടർ അവ വീണ്ടും പരിശോധിക്കാനും ആവശ്യപ്പെട്ടിട്ടുണ്ട്. ഔദ്യോഗിക ഉത്തരവിന് വിരുദ്ധമായ റെക്കോർഡുകൾ റദ്ദാക്കാനും സിവിൽ രജിസ്ട്രേഷൻ സിസ്റ്റം (CRS) പോർട്ടലിലെ തെറ്റായ രേഖകൾ ഉടൻ നീക്കം ചെയ്യാനും നിർദ്ദേശമുണ്ട്. അനധികൃത രജിസ്ട്രേഷൻ കൂടുതലായി നടന്ന 14 പ്രദേശങ്ങൾ സംസ്ഥാനം കണ്ടെത്തിയിട്ടുണ്ട്.

ഉത്തർപ്രദേശിൽ പ്ലാനിങ് വകുപ്പാണ് ഇതുമായി ബന്ധപ്പെട്ട് ഉത്തരവ് പുറത്തിറക്കിയത്. ജനനവുമായി ബന്ധപ്പെട്ട ഒരു രേഖയും ആധാറിനൊപ്പം ചേർത്തിട്ടില്ലാത്തതിനാൽ അത് ജനന സർട്ടിഫിക്കറ്റായി കണക്കാക്കാനാവില്ലെന്ന് സ്പെഷ്യൽ സെക്രട്ടറി അമിത് സിംഗ് ബൻസാൽ പുറത്തിറക്കിയ ഉത്തരവിൽ പറയുന്നു.

അതേസമയം, അനധികൃത കുടിയേറ്റക്കാർക്കെതിരെ കർശന നടപടിയെടുക്കാൻ മുഖ്യമന്ത്രി യോഗി ആദിത്യനാഥ് കഴിഞ്ഞയാഴ്ച ഉദ്യോഗസ്ഥർക്ക് നിർദ്ദേശം നൽകിയിരുന്നു. തിരിച്ചറിയൽ നടപടികൾ പൂർത്തിയാകുംവരെ വിദേശികളെ താമസിപ്പിക്കാനായി ഓരോ ജില്ലയിലും താൽക്കാലിക തടങ്കൽ കേന്ദ്രങ്ങൾ സ്ഥാപിക്കാനും അദ്ദേഹം ഉത്തരവിട്ടിട്ടുണ്ട്. നടപടിക്രമങ്ങൾ പൂർത്തിയാക്കിയ ശേഷം അനധികൃത കുടിയേറ്റക്കാരെ നാടുകടത്തുമെന്നും യുപി സർക്കാർ അറിയിച്ചു.