ആധാറിലെ തിരുത്തലുകൾ ഇനി അത്ര സിംപിളല്ല; അറിഞ്ഞിരിക്കണം ഈ പുതിയ മാറ്റങ്ങൾ

ന്യൂഡൽഹി: ആധാർ കാർഡിലെ തിരുത്തലുകൾ ഇനി അത്ര എളുപ്പത്തിൽ നടക്കില്ല. ആധാർ കാർഡിലെ പേര് മാറ്റുന്നതിനായി യുണീക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (UIDAI) പുതിയ സ്റ്റാൻഡേർഡ് ഓപ്പറേറ്റിംഗ് പ്രൊസീജർ പുറത്തിറക്കി. 2026 സെപ്റ്റംബർ 18-ന് പുറത്തിറക്കിയ പുതിയ ഉത്തരവ് പ്രകാരം, പേര് തിരുത്തുന്നതിനുള്ള അപേക്ഷകൾ വിവിധ വിഭാഗങ്ങളായി തിരിച്ചാണ് ഇനി പരിഗണിക്കുക.

വ്യത്യസ്ത മാനദണ്ഡങ്ങൾ

ചെറിയ തിരുത്തലുകൾ, ഉദ്യോഗസ്ഥരുടെ ഭാഗത്തുനിന്നുള്ള പിഴവുകൾ, വിവാഹം/വിവാഹമോചനം മൂലമുള്ള പേരുമാറ്റം, പൂർണമായ പേര് മാറ്റം എന്നിവയ്ക്ക് വ്യത്യസ്ത രേഖകളാണ് ആവശ്യമായി വരുന്നത്. രേഖകൾ, സത്യവാങ്മൂലങ്ങൾ, ഗസറ്റ് വിജ്ഞാപനം എന്നിവ പരിശോധിച്ച ശേഷമായിരിക്കും നടപടി.

ചെറിയ പേര് തിരുത്തലുകൾ

പേരിന്റെ ആദ്യാക്ഷരങ്ങൾ പൂർണരൂപത്തിലാക്കുക, മധ്യനാമമോ കുടുംബപ്പേരോ ചേർക്കുകയോ ഒഴിവാക്കുകയോ ചെയ്യുക, പേരുകളുടെ ക്രമം മാറ്റുക, ചെറിയ അക്ഷരപ്പിശകുകൾ തിരുത്തുക എന്നിവ ഇതിൽ പെടും.

ഇത്തരം തിരുത്തലുകൾക്ക് ബാധകമായ ഏതെങ്കിലും തിരിച്ചറിയൽ രേഖ സമർപ്പിച്ചാൽ മതിയാകും.

18 വയസ്സിന് താഴെയുള്ള കുട്ടികളുടെ കാര്യത്തിൽ, കുടുംബനാഥനെ അടിസ്ഥാനമാക്കിയുള്ള പേരുമാറ്റമാണെങ്കിൽ ബന്ധം തെളിയിക്കുന്ന രേഖയും ഉപയോഗിക്കാം. ചെറിയ മാറ്റങ്ങൾ വരുത്താൻ സാധാരണ ഐഡന്റിറ്റി പ്രൂഫ് അല്ലെങ്കിൽ 18 വയസ്സിന് താഴെയുള്ള കുട്ടികൾക്ക് റിലേഷൻഷിപ്പ് പ്രൂഫ് മതിയാകും.

വിവരങ്ങൾ രേഖപ്പെടുത്തുമ്പോഴുണ്ടായ പിഴവുകൾ തിരുത്താൻ

ഉദ്യോഗസ്ഥരുടെ ഭാഗത്തുനിന്നോ വിവരശേഖരണത്തിനിടയിലോ ഉണ്ടായ പിഴവുകൾ തിരുത്താൻ പ്രത്യേക നടപടിക്രമം പാലിക്കണം.

മുതിർന്നവർ: അനുബന്ധം ബി (Annexure B) സത്യവാങ്മൂലത്തിനൊപ്പം ബാധകമായ തിരിച്ചറിയൽ രേഖയോ ബന്ധം തെളിയിക്കുന്ന രേഖയോ സമർപ്പിക്കണം.

പ്രായപൂർത്തിയാകാത്തവർ: മാതാപിതാക്കളോ നിയമപരമായ രക്ഷിതാവോ അനുബന്ധം സി (Annexure C) സത്യവാങ്മൂലം സമർപ്പിക്കണം.

അപേക്ഷയിൽ ആവശ്യപ്പെടുന്ന പേര്, നേരത്തെ ആധാറിനായി സമർപ്പിച്ച യഥാർത്ഥ രേഖയിലെ പേരുമായി കൃത്യമായി പൊരുത്തപ്പെടണം. പൊരുത്തക്കേട് കണ്ടെത്തിയാൽ അപേക്ഷ നിരസിക്കപ്പെടും.

പ്രധാന നിയമങ്ങളും നിബന്ധനകളും

ആധാറിലെ പേരുകൾ ഇംഗ്ലീഷ് ബ്ലോക്ക് ലെറ്ററുകളിൽ മാത്രമേ രേഖപ്പെടുത്താൻ പാടുള്ളൂ.

പേരുകൾക്ക് മുന്നിൽ ശ്രീ, ശ്രീമതി, മിസ്, ഡോക്ടർ, പ്രൊഫസർ തുടങ്ങിയ ടൈറ്റിലുകളോ പ്രിഫിക്സുകളോ പാടില്ല. അപരനാമങ്ങൾ , പദവികൾ, പ്രത്യേക ചിഹ്നങ്ങൾ എന്നിവയും അനുവദനീയമല്ല.

സമർപ്പിക്കുന്ന രേഖകളിൽ പേര് എങ്ങനെയുണ്ടോ, അതേ രീതിയിലായിരിക്കും ആധാറിലും അപ്ഡേറ്റ് ചെയ്യുക.

ഇംഗ്ലീഷിൽ പേര് ശരിയാണെങ്കിലും പ്രാദേശിക ഭാഷയിലെഴുതിയതിൽ തെറ്റുകൾ ഉണ്ടെങ്കിൽ സ്റ്റാൻഡേർഡ് പ്രൂഫ് ഓഫ് ഐഡന്റിറ്റി രേഖ നൽകി ഇത് തിരുത്താം.

വിവാഹത്തിനോ വിവാഹമോചനത്തിനോ ശേഷം സർനെയിം മാറ്റാൻ അഫിഡവിറ്റും ഐഡന്റിറ്റി പ്രൂഫും ആവശ്യമാണ്.

പൂർണ്ണമായും പേരോ ഐഡന്റിറ്റിയോ മാറ്റുന്ന സന്ദർഭങ്ങളിൽ, യുഐഡിഎഐ ഗസറ്റ് വിജ്ഞാപനം കർശനമായും ആവശ്യപ്പെടുന്നു. മറ്റ് രേഖകൾ ഈ വിഭാഗത്തിൽ സ്വീകാര്യമാകില്ല.

ആധാറിൽ എത്ര തവണ പേര് മാറ്റാം?

പൊതുവെ ഒരാൾക്ക് ആധാറിൽ പരമാവധി രണ്ട് തവണ മാത്രമേ പേര് മാറ്റാൻ അനുവാദമുള്ളൂ. ഇതിനുശേഷമുള്ള മാറ്റങ്ങൾ പ്രത്യേക പരിശോധനകൾക്ക് വിധേയമായി മാത്രമേ നടപ്പിലാക്കൂ.

അപേക്ഷിക്കേണ്ട വിധം

അടുത്തുള്ള ആധാർ സേവാ കേന്ദ്രത്തിലോ എൻറോൾമെന്റ് സെന്ററിലോ നേരിട്ട് പോകുക

ആധാർ അപ്ഡേറ്റ് ഫോം പൂരിപ്പിച്ച് നൽകുക.

ആവശ്യമായ രേഖകൾ (ഐഡന്റിറ്റി പ്രൂഫ് അല്ലെങ്കിൽ ഗസറ്റ് വിജ്ഞാപനം) സമർപ്പിക്കുക.

ബയോമെട്രിക് പരിശോധന പൂർത്തിയാക്കുക.

ഫീസ് നൽകി URN (Update Request Number) അടങ്ങിയ അക്നോളജ്മെന്റ് രീസീറ്റ് കൈപ്പറ്റുക. ഇതിലൂടെ അപ്ഡേറ്റ് സ്റ്റാറ്റസ് ഓൺലൈനായി ട്രാക്ക് ചെയ്യാം.