ഫീസ്‌ കുത്തനെ കൂട്ടി: അലിഗഡ്‌ സർവകലാശാലയിൽ വിദ്യാർഥി പ്രക്ഷോഭം

ന്യൂഡൽഹി : യുപിയിലെ അലിഗഡ്‌ മുസ്‌ലീം സർവകലാശാലയിൽ(എഎംയു) വിവിധകോഴ്‌സുകളിലേയ്‌ക്കുള്ള ഫീസ്‌ കുത്തനെ വർധിപ്പിച്ചതിനെതിരെ വിദ്യാർഥി പ്രക്ഷോഭം ശക്തമാകുന്നു. വിദ്യാർഥികളെ അറിയിക്കാതെ പിൻവാതിലിലൂടെ നടപ്പാക്കിയ വർധന പിൻവലിക്കണമെന്നാവശ്യപ്പെട്ട്‌ സർകലാശാലയിൽ സമരം ചെയ്‌തവരെ പൊലീസ്‌ ക്രൂരമായാണ്‌ നേരിട്ടത്‌. നിരവധി വിദ്യാർഥികളെ സസ്‌പെൻഡ്‌ ചെയ്‌തു. മുൻവർഷത്തെ അപേക്ഷിച്ച്‌ നാൽപ്പത്‌ ശതമാനത്തോളമാണ്‌ ഫീസ്‌ വർധന. ഇത്‌ പിൻവലിക്കണമെന്നും ഹോസ്റ്റൽ അടിസ്ഥാന സ‍ൗകര്യങ്ങളടക്കം വികസിപ്പിക്കണമെന്നും എസ്‌എഫ്‌ഐ യൂണിറ്റ്‌ കമ്മിറ്റി ആവശ്യപ്പെട്ടു. എന്നാൽനേരിയ വർധനമാത്രമാണ്‌ നടപ്പാക്കിയതെന്നാണ്‌ അധികൃതരുടെ വാദം.

ബിഎ എൽഎൽഎബിക്ക്‌ മുൻവർഷം 14,425 രൂപയായിരുന്നുവെങ്കിൽ ഇത്‌ 18,700രൂപയായി വർധിപ്പിച്ചു. നഴ്‌സിങ്‌ കോഴ്‌സിന്‌ 25,700 ആയിരുന്നത്‌ ഒറ്റയടിക്ക്‌ 33,000 രൂപയാക്കി. വിവിധ കോഴ്‌സുകൾക്ക്‌ ഇത്തരത്തിൽ നാൽപ്പത്‌ ശതമാനത്തോളമാണ്‌ ഫീസ്‌ നിരക്ക്‌ കൂട്ടിയത്‌. വർധന അധികൃതർ മൂടിവെച്ചുവെങ്കിലും സർവകലാശാല വെബ്‌സൈറ്റിൽ നിന്ന്‌ വിദ്യാർഥികൾ ഇത്‌ കണ്ടെത്തി. പര്യാപ്‌തമായാ ഹോസ്‌റ്റൽ സ‍ൗകര്യമോ ശുചിമുറികളോ സർവകലാശാലയിൽ ഇല്ലെന്നും വിദ്യാർഥികൾ പറഞ്ഞു. രണ്ടുവർഷം പിന്നിട്ടും പലർക്കും ഹോസ്റ്റലുകൾ നൽകുന്നില്ല. വിദ്യാർഥി യൂണിയൻ തെരഞ്ഞെടുപ്പ്‌ തടഞ്ഞതിനാൽ വിദ്യാർഥികൾക്ക്‌ സമിതികളിലും പ്രാതിനിധ്യം നിഷേധിക്കപ്പെടുന്നു. പരീക്ഷ ഫലങ്ങളും വൈകുകയാണ്‌. പിന്നാക്കവിഭാഗങ്ങളിൽ നിന്നുള്ള വിദ്യാർഥികളെ കൊള്ളയടിക്കുകയാണ്‌ സർവകലാശാല ചെയ്യുന്നതെന്ന്‌ എസ്‌എഫ്‌ഐ കുറ്റപ്പെടുത്തി. എഎംയു കോർട്ട്‌ അംഗങ്ങളും എംപിമാരുമായ എ എ റഹീം, ഇമ്രാൻ പ്രതാപ്ഗർഹി എന്നിവർക്ക്‌ എസ്‌എഫ്‌ഐ ഡൽഹിയിലെത്തി വിഷയത്തിൽ ഇടപെടൽ ആവശ്യപ്പെട്ട്‌ നിവേദനം സമർപ്പിച്ചു.