ഐഎസ്‌ഐ പിന്തുണയുള്ള ഭീകര മൊഡ്യൂൾ തകർത്തു; ഗ്രനേഡുകളുമായി ഒരാൾ പിടിയിൽ

ചണ്ഡീ​ഗഡ് : പാകിസ്ഥാന്റെ ഐ‌എസ്‌ഐയുടെ പിന്തുണയുള്ള ഒരു ഭീകര മൊഡ്യൂൾ തകർത്തതായി പഞ്ചാബ് പൊലീസ് അറിയിച്ചു. ഒരാളെ അറസ്റ്റ് ചെയ്യുകയും നാല് ഹാൻഡ് ഗ്രനേഡുകൾ കണ്ടെടുക്കുകയും ചെയ്തതായും പൊലീസ് വ്യക്തമാക്കി.

അമൃത്സറിലെ സ്റ്റേറ്റ് സ്‌പെഷ്യൽ ഓപ്പറേഷൻസ് സെല്ലുകളും പഞ്ചാബ് പൊലീസിന്റെ കൗണ്ടർ ഇന്റലിജൻസ് വിഭാഗമായ മൊഹാലിയും സംയുക്തമായാണ് ഓപ്പറേഷൻ നടത്തിയത്. ഓപ്പറേഷനിൽ ​ഗ്രനേഡുകൾക്ക് പുറമെ രണ്ട് വിദേശ നിർമ്മിത പിസ്റ്റളുകളും വെടിക്കോപ്പുകളും കണ്ടെടുത്തതായി ഡിജിപി ഗൗരവ് യാദവ് പറഞ്ഞു.

വിദേശത്ത് പ്രവർത്തിക്കുന്ന ഹാൻഡ്‌ലർമാരുടെ നിർദ്ദേശപ്രകാരമാണ് പ്രതി പ്രവർത്തിച്ചിരുന്നതെന്നും ചണ്ഡീഗഡിൽ അടുത്തിടെ നടന്ന ഗ്രനേഡ് ആക്രമണത്തിൽ ഉൾപ്പെട്ട തീവ്രവാദ മൊഡ്യൂളുമായി ഇയാൾക്ക് ബന്ധമുണ്ടെന്നും പ്രാഥമിക അന്വേഷണത്തിൽ വ്യക്തമായതായും യാദവ് പറഞ്ഞു.

അമൃത്സറിലെ പൊലീസ് സ്റ്റേഷൻ സ്റ്റേറ്റ് സ്പെഷ്യൽ ഓപ്പറേഷൻ സെല്ലിൽ എഫ്‌ഐആർ രജിസ്റ്റർ ചെയ്തിട്ടുണ്ടെന്നും മൊഡ്യൂളിലെ മറ്റ് അംഗങ്ങളെ തിരിച്ചറിയാനും ട്രാക്ക് ചെയ്യാനും അറസ്റ്റ് ചെയ്യാനും കൂടുതൽ അന്വേഷണം നടന്നുവരികയാണെന്നും ഡിജിപി പറഞ്ഞു.