ലോകസിനിമ ഐഎഫ്എഫ്കെയെ ഉറ്റുനോക്കുന്നു, വിദേശത്ത് മേളയുടെ പതിപ്പുകൾ നടത്താൻ ആലോചന: റസൂൽ പൂക്കുട്ടി

ന്യൂഡൽഹി: ലോകസിനിമ ഐഎഫ്എഫ്കെയെ ഉറ്റുനോക്കുന്നുവെന്നും വിദേശത്ത് മേളയുടെ പതിപ്പുകൾ നടത്താൻ ആലോചിക്കുന്നുവെന്നും ചലച്ചിത്ര അക്കാദമി ചെയർമാൻ റസൂൽ പൂക്കുട്ടി. തിരുവനന്തപുരത്ത് അടുത്തമാസം 12ന് ആരംഭിക്കുന്ന മുപ്പതാമത് രാജ്യാന്തര ചലച്ചിത്ര മേളയുടെ പ്രഖ്യാപനം ഡൽഹിയിൽ നടത്തുകയായിരുന്നു ആദ്ദേഹം.

മലയാളത്തിൽ അമ്പരപ്പിക്കുന്ന സിനിമകളാണ് പുതിയ തലമുറ ഒരുക്കുന്നത്. ഐഎഫ്എഫ്കെ കാണമെന്ന് ആഗ്രഹമുണ്ടെങ്കിലും തിരുവനന്തപുരത്ത് എത്താൻ സാധിക്കാത്ത ഒട്ടേറെ പേർ വിവിധ രാജ്യങ്ങളിലായുണ്ട്. ദുബായിൽ അടക്കം മേളയുടെ പതിപ്പ് സംഘടിപ്പിക്കാനാണ് ആലോചന- റസൂൽ പൂക്കുട്ടി പറഞ്ഞു.

കേരള സംസ്ഥാന ചലച്ചിത്ര അക്കാദമി ഡിസംബർ 12 മുതൽ 19 വരെ തിരുവനന്തപുരത്താണ് 30-ാമത് അന്താരാഷ്ട്ര ചലച്ചിത്രമേള ഒരുക്കുന്നത്. 16 തിയേറ്ററുകളിലായി നടക്കുന്ന മേളയിൽ 12000ത്തോളം ഡെലിഗേറ്റുകൾ പങ്കെടുക്കും. registration.iffk.in എന്ന വെബ്സൈറ്റിൽ നൽകിയിട്ടുള്ള ലിങ്കിലൂടെ ഡെലിഗേറ്റ് രജിസ്ട്രേഷൻ നടത്താവുന്നതാണ്. പൊതുവിഭാഗത്തിന് ജിഎസ്ടി ഉൾപ്പെടെ 1180 രൂപയും വിദ്യാർഥികൾക്ക് ജിഎസ്ടി ഉൾപ്പെടെ 590 രൂപയുമാണ് ഡെലിഗേറ്റ് ഫീസ്. പൊതുവിഭാഗം, വിദ്യാർഥികൾ, ഫിലിം സൊസൈറ്റി, ഫിലിം ആൻഡ് ടിവി പ്രൊഫഷണൽസ് തുടങ്ങി എല്ലാ വിഭാഗങ്ങളിലേക്കും ഓൺലൈനായി രജിസ്‌ട്രേഷൻ നടത്താം. മേളയുടെ മുഖ്യവേദിയായ ടാഗോർ തിയേറ്റർ പരിസരത്ത് സജ്ജീകരിച്ചിട്ടുള്ള ഡെലിഗേറ്റ് സെൽ മുഖേന നേരിട്ടും രജിസ്ട്രേഷൻ നടത്താം.

ലോകസിനിമാ വിഭാഗം, ഇന്ത്യൻ സിനിമ നൗ, മലയാളം സിനിമ ടുഡേ, കൺട്രി ഫോക്കസ് വിഭാഗത്തിലുള്ള ചിത്രങ്ങൾ, മൺമറഞ്ഞ ചലച്ചിത്രപ്രതിഭകൾക്ക് സ്മരണാഞ്ജലിയർപ്പിക്കുന്ന ഹോമേജ് വിഭാഗം തുടങ്ങിയ പാക്കേജുകൾ മേളയിലുണ്ടാകും. സംവിധായകരും സാങ്കേതിക പ്രവർത്തകരും ജൂറി അംഗങ്ങളുമുൾപ്പെടെ വിദേശരാജ്യങ്ങളിൽനിന്നുള്ള നൂറിൽപ്പരം അതിഥികൾ മേളയിൽ പങ്കെടുക്കും.