വയനാട് കോഴ ഇടപാട്: ആറു കോൺ​ഗ്രസ് നേതാക്കൾക്കെതിരെ പൊലീസ് കേസെടുത്തു

കൽപ്പറ്റ> വയനാട്‌ ഡിസിസി ട്രഷറർ എൻ എം വിജയനും മകൻ ജിജേഷും ജീവനൊടുക്കാനിടയായ കോൺഗ്രസ്‌ നേതാക്കളുടെ കോഴ ഇടപാടിൽ പൊലീസ് കേസെടുത്തു. താളൂർ സ്വദേശി പത്രോസ്, പുൽപ്പള്ളി സ്വദേശി സായൂജ് എന്നിവരുടെ പരാതിയിൽ ബത്തേരിയിലെ ആറ് കോൺ​ഗ്രസ് നേതാക്കൾക്കെതിരെയാണ് ബത്തേരി പൊലീസ് കേസെടുത്തത്. വഞ്ചന കുറ്റത്തിനാണ് കേസ്.

അതേസമയം സംഭവത്തിൽ അന്വേഷക സംഘം കൂടുതൽ പേരുടെ മൊഴിയെടുത്തു. എൻ എം വിജയന്റെ ബന്ധുക്കളുടെയും അദ്ദേഹവുമായി അടുത്ത ബന്ധമുള്ളവരുടെയും മൊഴികളാണ്‌ എടുത്തത്‌. വീട്ടിൽ ജോലി ചെയ്‌തിരുന്ന സ്‌ത്രീയുടെ മൊഴിയും ചൊവ്വ രേഖപ്പെടുത്തി. കുടുംബാംഗങ്ങളുടെ മൊഴി നേരത്തേ എടുത്തിരുന്നു. വിജയൻ ഇടപാട്‌ നടത്തിയ 15 ബാങ്കുകളിൽനിന്ന്‌ സ്‌റ്റേറ്റ്‌മെന്റ്‌ ലഭിച്ചു. മൂന്ന്‌ ബാങ്കുകളിൽനിന്ന്‌ വിവരങ്ങൾ ലഭിക്കാനുണ്ട്‌. ഇതുവരെയുള്ള പരിശോധനയിൽ 1.13 കോടിയോളം രൂപയുടെ ബാധ്യതയാണ്‌ പൊലീസ്‌ കണ്ടെത്തിയിട്ടുള്ളത്‌. മറ്റാരുടെയെങ്കിലും വസ്‌തുക്കൾ ഈട്‌ നൽകി വായ്‌പ എടുത്തിട്ടുണ്ടോയെന്നതും പരിശോധനയിലാണ്‌.

ബാങ്ക്‌ നിയമനത്തിന്‌ കോൺഗ്രസ്‌ നേതാക്കൾക്ക്‌ പണം നൽകിയവരുടെ മൊഴികളും രേഖപ്പെടുത്തും. വിജയന്റെ വീട്ടിൽനിന്ന്‌ കണ്ടെത്തിയ രേഖകളുടെ പരിശോധന പൂർത്തിയായി. കണക്കെഴുതിയ ഡയറികൾ, കുറിപ്പുകൾ, ചെക്കുകൾ തുടങ്ങിയവയാണ്‌ കണ്ടെടുത്തിരുന്നത്‌. ഇവ ഓരോന്നായി പരിശോധിച്ചു. അസ്വാഭാവിക മരണത്തിനെടുത്ത കേസിലാണ്‌ ഇപ്പോഴത്തെ അന്വേഷണം. ബത്തേരി ഡിവൈഎസ്‌പി കെ കെ അബ്ദുൾ ഷെരീഫിന്റെ നേതൃത്വത്തിലുള്ള പ്രത്യേക സംഘമാണ്‌ അന്വേഷിക്കുന്നത്‌. മരണവും സാമ്പത്തിക ഇടപാടുകളും അന്വേഷിക്കണമെന്ന്‌ ആവശ്യപ്പെട്ട്‌ കുടുംബം നേരിട്ട്‌ പരാതി നൽകാനുള്ള ഒരുക്കത്തിലാണ്‌. അടുത്ത ദിവസം പരാതി നൽകും. ഒപ്പം വിജിലൻസ്‌ അന്വേഷണവുമുണ്ട്‌. വിജയന്റെ മകൻ വിജേഷിന്റെ മൊഴി വിജിലൻസ്‌ രേഖപ്പെടുത്തി.