print edition വോട്ടർപ്പട്ടിക തീവ്ര പുനഃപരിശോധന; പരാതികൾ പരിഹരിക്കുമെന്ന് രത്തൻ യു കേൽക്കർ

തിരുവനന്തപുരം : വോട്ടർപ്പട്ടിക തീവ്ര പുനഃപരിശോധന സംബന്ധിച്ച് രാഷ്ട്രീയ പാർടികളുടെ യോഗത്തിൽ ഉയർന്ന പരാതികൾ പരിഹരിക്കുമെന്ന് മുഖ്യ തെരഞ്ഞെടുപ്പ് ഓഫീസർ ഡോ. രത്തൻ യു കേൽക്കർ പറഞ്ഞു. ശനി വൈകിട്ടുവരെ വിതരണംചെയ്തത്‌ 4696493 (16.86 ശതമാനം) എന്യൂമറേഷൻ ഫോറമാണ്‌. 13 ബിഎൽഒമാർ ഫോറം വിതരണം പൂർത്തീകരിച്ചു. ഓൺലൈനായി സമർപ്പിക്കാനുള്ള സംവിധാനം സജ്ജമാക്കി.

സമയബന്ധിതമായി നടപടി പൂർത്തിയാക്കണം. പ്രവാസി വോട്ടർമാർക്ക്‌ പ്രത്യേക കോൾ സെന്റർ തുടങ്ങും. അവർക്ക്‌ പ്രത്യേകം ബോധവൽക്കരണം നൽകാനുള്ള നീക്കം നടത്തുന്നുണ്ട്‌. നോർക്കയുമായി സഹകരിച്ചാണ്‌ പ്രവർത്തനം നടത്തുക. ഭാഷാന്യൂനപക്ഷങ്ങൾക്ക്‌ ആവശ്യമായ ക്രമീകരണം ഏർപ്പെടുത്തും. കലക്ടർമാർക്ക്‌ ഇതുസംബന്ധിച്ച നിർദേശം നൽകും.

ഫോറം പൂരിപ്പിക്കാൻ വിദ്യാർഥികളുടെയും മറ്റ്‌ വളന്റിയർമാരുടെയും സഹായം തേടാം. വോട്ടർപ്പട്ടികയിൽ ഉൾപ്പെടാത്തവർക്ക്​ ഡിസംബർ ഒമ്പതിനുശേഷമായിരിക്കും പുതിയ അപേക്ഷ സമർപ്പിക്കാനുള്ള അവസരമുണ്ടാവുക. കൂടുതൽ ബൂത്ത്‌ ലെവൽ ഏജന്റുമാരെ രാഷ്ട്രീയ പാർടികൾ അനുവദിക്കണം. പാർടികളുടെ പൂർണ സഹകരണം ഉറപ്പാക്കണമെന്നും യോഗത്തിൽ രത്തൻ യു കേൽക്കർ പറഞ്ഞു.